Si María Isabel et maseseg ya kalangweran a manangipalapag diad syudad na San Fernando ed Chile, sakey a bansa ed South America. Say pamilya ra et kabiangan na etnikon grupo a tatawagen ya Mapuche. Masetseseg iran ontutulong pian walay naporman balon kongregasyon a Mapudungun, say lenguahe na saray Mapuche.

Sanen naamtaan dan say Memoryal na impatey nen Kristo et nagawa met ed salitan Mapudungun tan walay inimprintan 2,000 ya kopya na imbitasyon, nanisip si María Isabel no antoy nitulong to. Anonotan toy ginawa na arum a Tasin kalangweran ya pinulongan da ray kaklase tan maestra da. Imbaga to iyad saray ateng to, tan nantongtongan da ya mannonot si María Isabel na paraan pian nibunog so imbitasyon ed eskuelaan. Anto kasi ginawa to?

Unona, kinmerew si María Isabel na permiso ed eskuelaan pian nipaskil tod gate imay imbitasyon. Inabuloyan da tan indayew da ni ingen ed satan ya naisip to. Diad tua, aminsan ya kabuasan et inyanunsio na prinsipal da diad loudspeaker imay nipaakar ed imbitasyon!

Insan, kinerew lamet nen María Isabel ya onlad kada classroom. Sanen inabuloyan na saray manbabangat diman, tinepetan toy kada klase no siopad sikaray Mapuche. “Say amtak manga 10 o 15 labat so estudyante ya Mapuche,” so inkuan to, “amayamay manaya—akapangiter ak na 150 ya imbitasyon!”

Tinepet na sakey ya biin akaimano ed imbitasyon ya akapaskil ed gate na eskuelaan no siopay pitongtongan nipaakar ed samay Memoryal. Abigla sanen say pitongtongan to manaya et ugaw ya 10 años to ni labat! “Say abaloan ton pitongtongan to et mas matatken,” so makakaimis ya imbaga nen María Isabel. Sanen naikdan to la na imbitasyon tan kaaruman ya impormasyon, inala nen María Isabel so address to may bii pian nabisita to kaibay atateng to, diad ontan et nipaliwawa dan maong ed sikato so Panarian na Dios. Malikeliket iray 20 ya manangipalapag a kabiangay grupo a mansasalitay Mapudungun sanen samay bii tan 26 nin interesado ya Mapuche so inmatendid Memoryal. Natan et kongregasyon la iman ya grupo!

Antokaman so edad mo, kasin makapanggawa ka met na paraan pian naimbitaan mo ray kaklasem o katrabahom ya onatendid Memoryal, publikon paliwawa, odino distriton kombension? Akin ta no man-research kad saray publikasyon tayo tan basam iray eksperiensyan pakaaralan mo no panon ya magmaliw a mabunga so planom? Insan, kerew kad si Jehova na masanton espiritu pian makapanpakpel kan manpulong. (Luc. 11:13) No gawaen mo itan, nailaloan mon maabig tan makapaseseg so resulta na saray implanon maong ya sagpot mo.