1. Akin a si Jehova so sankaunaan tan sankamaongan ya Ebanghelisador?

SAY ebanghelisador et sakey a mangiyaabawag na maong a balita. Si Jehova a Dios so sankaunaan tan sankamaongan ya Ebanghelisador. Kayari impanrebelde na inmunan atateng tayo, impaamta nen Jehova so maong a balita a say serpiente, si Satanas a Diablo et pateyen. (Gen. 3:15) Diad inlabas na saray siglo, pinuyanan nen Jehova so pigaran matoor a lalaki ya mangisulat ed saray detalye no panon a napasantoy apauges ya ngaran to, no panon a naekal so amin ya probleman ginawa nen Satanas, tan no panon a nagamoran na totoo so bendisyon ya abalang di Adan tan Eva.

2. (a) Antoy kaibad kimey na saray anghel? (b) Antoy imbangat nen Jesus ed saray ebanghelisador?

² Ebanghelisador met iray anghel. Kaibad kimey da so pangiyabawag ed maong a balita, tan ontulong ed arum a mangiyaabawag ed satan. (Luc. 1:19; 2:10; Gawa 8:26, 27, 35; Apo. 14:6) Si Miguel ya arkanghel balet ey? Sanen wadiad dalin bilang Jesus, imbangat toy kimey na sakey ya ebanghelisador. Talagan inusar nen Jesus so bilay to pian iyabawag so maong a balita!—Luc. 4:16-21.

3. (a) Anto so maong a balitan iyaabawag tayo? (b) Anto ran tepet so ebatan tayo bilang ebanghelisador?

³ Ingganggan nen Jesus iray disipulo ton magmaliw ya ebanghelisador. (Mat. 28:19, 20; Gawa 1:8) Oniay impaseseg nen apostol Pablo ed kaiba ton si Timoteo: “Gawam so kimey na sakey ya ebanghelisador, sigpot mon sumpalen so ministeryom.” (2 Tim. 4:5) Anto so maong a balitan iyaabawag tayo ran papatumbok nen Jesus? Kaibad saya so makaligliwan katuaan ya inaro itayo nen Jehova, say Ama tayod tawen. (Juan 3:16;  1 Ped. 5:7) Say manunan paraan na pangipapanengneng nen Jehova na panangaro to et panamegley na Panarian to. Kanian, maliket tayon ibabagad totoo ya amin a manpasakop ed uley na Panarian, ontulok ed Dios, tan manggawa na duga et magmaliw a kakaaro to. (Sal. 15:1, 2) Diad tua, gagala nen Jehova ya panampoten so amin ya kairapan. Ekalen to met so ermen ya resulta na kairapan. Talagan maong a balita itan! (Isa. 65:17) Bilang ebanghelisador, pantongtongan tayoy ebat ed duaran importantin tepet: Akin ya kaukolan a narengelan na totoo so maong a balita natan? Tan panon tayon sigpot a nasumpal so kimey tayo bilang ebanghelisador?

4. Anto ray lingon panmoria na arum nipaakar ed Dios?

⁴ Isip mo pan walay angibagad sikan tinaynan kayo na tatay yo. Insan wala ray mangibabagan sikatoy agmakaaro, maamot, tan maruksa. Wala ni ray mangibagan agmo la aanapen si tatay mo ta inatey la. Singa ontan met so ibabaga na dakel a totoo nipaakar ed Dios. Panisiaan dan say Dios et sakey a misteryo, imposiblin nakabat, odino maruksa. Alimbawa, wala ray relihyoson lider a mangibabagan papairapen na Dios iray mauges a totoo ed impierno. Ibabaga na arum ya manlalapud Dios iray kalamidad. Anggaman parehon biktima na sarayan nagagawa iray maong tan mauges a totoo, panisiaan dan dusa iraya na Dios.

5, 6. Antoy epekto na bangat ya ebolusyon tan palson doktrina ed saray totoo?

⁵ Ipipilit na arum ya anggapoy Dios. Singa bilang, imanoey bangat ya ebolusyon. Ibabaga na saray manisiad satan a basta labat linmesa so bilay tan anggapoy marunong ya Amalsa. Wala ni ra ingey mangibabaga ya say too et sakey a klase na ayep, kanian agla pankelawan no say sakey et walaay inaayep ya ugali. Panisiaan na arum ya kabiangan na bilay so ag-inkahustisya lapud natural labat kuno ya pairapen na saray mabiskeg iray makapuy. On, saramay manisiad ebolusyon et anggapoy dugan ilalo ra.

⁶ Malinew, pinaloor na bangat ya ebolusyon tan palson doktrina so paniirap na totoo ed sayan kaunoran iran agew. (Roma 1:28-31; 2 Tim. 3:1-5) Sarayan bangat et agbalot akapangiter na tua tan permanentin maong a balita. Imbes, singa impaimano nen apostol Pablo, nagmaliw laingen ya “ambilbilunget so kanonotan [na totoo], tan nisian ira ed bilay a kien na Dios.” (Efe. 4:17-19) Niarum ni, lapud bangat ya ebolusyon tan saray palson doktrina, aglabay ya awaten na totoo so maong a balitan manlalapud Dios.—Basaen so Efeso 2:11-13.

7, 8. Anto so alenleneg a paraan pian sigpot a natalosan na totoo so maong a balita?

⁷ Pian makapikareenan ed Dios, kaukolan ya panisiaan na totoo ya tua si Jehova tan dakel so maabig a rason pian onapit ed sikato. Natulongan tayo ran nawalaay pikakabat no pasesegen tayo ran aralen iray palsa. No lukas so nonot da, naamtaan day karunongan tan pakayari na Dios. (Roma 1:19, 20) Pian naapresya na saray totoo iray ginawa na Makapadinayew a Manamalsa, sarag tayon usaren so brosyur ya Pinalsa Kasi Bilay? tan The Origin of Life—Five Questions Worth Asking. Balet aliwan say panaral labat ed saray palsa so kaukolan a gawaen pian naebatan iray tepet a singa say: Akin ya aabuloyan na Dios so kairapan? Anto so gagala na Dios ed dalin? Kasin iyaansakit ak na Dios bilang indibidual?

 ⁸ Say alenleneg a paraan pian sigpot a natalosan na totoo so maong a balita nipaakar ed Dios tan say gagala to et diad panaral na Biblia. Talagan pribilehyo tayon tulongan iray totoo a naebatan iray tepet da! Pian nasabi tayoy puso na saray nakatongtong tayo, agtayo labat basta inabang so katuaan, noagta kaukolan tayo ran tangguyoren. (2 Tim. 3:14) Nagawaan tayo itan, no aligen tayoy alimbawa nen Jesus. Antoy ginawa to? Sikatoy angusar na saray epektibon tepet. Panon tayon naalig?

9. Pian awaten na totoo so maong a balita, antoy kaukolan tayon gawaen?

⁹ Akin a kaukolan tayoy mangusar na tepet diad panag-ebanghelyo a singa si Jesus? Imanoen iyan situasyon: Imbaga na doktor mo ya walay maong a balita tod sika. Onabig so sakit mo no manpa-opera ka. Nayarin manisia ka, balet panon to no imbaga to itan anta agto ka ni acheck-up? Seguradon mannonot ka ta anggan panon kamaong so sakey a doktor, kaukolan toy mantepet tan amtaen iray naliliknam ya sintomas antis to kan tambalen. Ontan met, no labay tayon tulongan iray totoo pian awaten day maong a balita na Panarian, kaukolan tayon aralen so epektibon panangusar na tepet. Natulongan tayo labat ira no naamtaan tayoy tuan kipapasen dad espiritual.

10, 11. Anto so nagawaan tayo no aligen tayoy paraan na panagbangat nen Jesus?

¹⁰ Amta nen Jesus a say pangusar na epektibon tepet et aglabat makatulong ed managbangat a nakabat so iyaaralan to noagta pian mibiang ed tongtongan. Alimbawa, sanen labay nen Jesus ya ibangat so kapaabebaan ed saray babangatan to, angiter na tepet a pannonotan da. (Mar. 9:33) Pian bangatan si Pedro a manrason base ed saray prinsipyo, angiter si Jesus na tepet a walay pampiliay ebat. (Mat. 17:24-26) Aminsan, pian naamtaan nen Jesus so walad puso na saray babangatan to, sikatoy angiter na nantutumbokan a tepet ya mamakiwas ed sikaran ibagay panmoria ra. (Basaen so Mateo 16:13-17.) Diad impangusar nen Jesus na saray tepet tan impanpaliwawa to, agto labat innabang so katuaan ed saray totoo. Sinabi toy puso ra tan pinakiwas to ran iyaplikay naaralan da.

¹¹ No aligen tayoy Jesus diad pangusar na epektibon tepet, nagawaan tayoy taloran bengatla. Naamtaan tayoy sankaabigan a paraan ya panulong ed totoo, napitongtongan tayo ray agmangawat, tan nabangatan tayo ray mapaabeban iyaplikay nanaaralan da. Pantongtongan tayo so taloran situasyon ya ontulong ed sikatayon mangusar na epektibon tepet.

12-14. Panon mon natulongan so anak mo pian makpel ton ninabang so maong a balita? Mangiter na alimbawa.

¹² Situasyon 1: Bilang ateng, antoy gawaen mo no mantepet so tinedyer ya anak mo no panon ton ipaliwawad kaklase to so nipaakar ed impamalsa? Siempre, labay mon tulongan pian makpel ton ninabang so maong a balita. Kanian imbes ya balawen odino basta mangiter na ebat, agta mas maabig no aligen moy alimbawa nen  Jesus diad pantepet pian ibaga toy panmoria to? Panon?

¹³ Kayari yon basaen so pigaran parte na brosyur ya The Origin of Life—Five Questions Worth Asking, tepetan mo no anto ran punto so akalay interes to. Paseseg mon mannonot na saray rason no akin ya manisian walay Amalsa tan no akin ya labay ton unorey Dios. (Roma 12:2) Ibagam ed sikato ya agkaukolan ya eksakton mipara so rason tod sika.

¹⁴ Ipaliwawam ed anak mo ya no mitongtong ed kaklase to, sarag ton aligen so paraan na impitongtong mod sikato. Ipaimano toy pigaran katuaan insan mangiter na tepet a pannonotan na katongtong to. Singa bilang, sarag ton ipabasa so kahon ed pahina 21 na brosyur ya Origin of Life, insan to itepet, “Tua kasi a say kapasidad na DNA a mankarga na impormasyon et siansian agnaparaan na anggan saray sankabaloan ya computer?” Nayarin say ebat na kaklase to et on. Kanian oniay nayarin onsublay ya itepet to, “No saray computer technician et agda nagawaan itan, panon a nagawaan itan na matter o bengatlan andiay kanonotan?” Pian nipasal moy anak mon mitongtong ed arum nipaakar ed pananisia to, manpraktis kayon lanang. No ipasal mon mangusar na epektibon tepet, natulongan mon manumpal ed kimey to bilang ebanghelisador.

15. Antoy nayarin itepet tayo pian natulongan so sakey ya ateista?

¹⁵ Situasyon 2: No manpupulong tayo, wala ray nakakatongtong tayon manduaruwa no kasin walay Dios. Singa bilang, nayarin ibaga na sakey a sikatoy ateista. Imbes ya manpatanir a tampol, sarag tayon tepeten no panon lan kabayag ya ontan so pananisia to tan akin. Kayari tayon dengelen tan pisalamatay impangibaga tod papanisiaan to, sarag tayon tepeten  no kasin parad sikato et mauges so pambasa na artikulon mamapaneknek ya walay Amalsa. No lukas so nonot na householder, nayarin ibaga ton anggapoy uges na pambasad saratan. Nayari tayo lan iyopresi so brosyur ya Pinalsa Kasi Bilay? odino The Origin of Life—Five Questions Worth Asking. Saray mataktika tan marespeton tepet et singa tombok a mangilukas ed puso na householder pian awaten toy maong a balita.

16. Akin ya agtayo labat basta ipabasa ed iyaaralan so ebat ed publikasyon ya aaralen?

¹⁶ Situasyon 3: No mangiyaaral tayo, nayarin ipapabasa tayo labat so ebat ed publikasyon ya aaralen tayo. Balet no oniay gawaen tayo, agtayo natulongan so iyaaralan ya onaligwas. Akin? Lapud no basaen labat na iyaaralan so ebat, nayarin agto itan nadalepdep tan posiblin ag-onaralem so espiritual a lamot to. No walay graben panamasegsegang, sikatoy singa tanaman ya maininomay a nalenes. (Mat. 13:20, 21) Pian ag-itan nagawa, kaukolan tayon tepetan so iyaaralan tayo no antoy nibaga tod saray nanaaralan to. Amtaen tayo no kasin panisiaan to iratan. Tan mas maabig met no tepetan tayo no akin ya panisiaan to iratan odino andi. Insan tayo tulongan ya mankatunongan base ed Kasulatan pian makapanggawa na dugan konklusyon. (Heb. 5:14) No epektibo so pangusar tayoy tepet, mas naseguro tayon onlamot ed katuaan iray iyaaralan tayo tan ag-ira napatitan o napalikdo na saray onsusumpa. (Col. 2:6-8) Anto ni nagawaan tayo pian nasumpal tayoy kimey tayo bilang ebanghelisador?

17, 18. Sano kaibam ed ministeryo so sakey ya agi, panon kayon mantulongan?

¹⁷ Imbaki nen Jesus iray babangatan ton manpulong ya sanderwa. (Mar. 6:7; Luc. 10:1) Ag-abayag, sinalambit nen Pablo iray “kakimeyan” to a ‘mansasagpot a kaiba to nipaakar ed maong a balita.’ (Fil. 4:3) Base ed satan ya alimbawa ed Biblia, ginapoan na saray manangipalapag na Panarian nen 1953 so pangipasal ed arum parad ministeryo.

¹⁸ Sano kaibam ed ministeryo so sakey ya agi, panon kayon mantulongan? (Basaen so 1 Corinto 3:6-9.) Lukasan mod Bibliam iray tekston usaren to. Dengel kan maong no sikatoy mansasalita odino say householder. Subaybayan moy tongtongan pian natulongan moy kaibam a mankatunongan no kaukolan. (Ecl. 4:12) Balet, tandaan: Ag-onsasalet sano epektiboy pankakatunongan na kaibam. No bastabasta kan mansalita, nayarin sikatoy nadismaya tan nawetwet so householder. No maminsan, matukoy met so mibiang ed tongtongan. Balet, kaukolan ya antikey labat so ibagam. Insan paulyan mon ituloy na kaibam so tongtongan.

19. Antoy lawas tayon nonoten, tan akin?

¹⁹ Panon kayon makapantulongan na kaibam legan kayon manaakar paonlad onsublay ya abung? Maabig no pantongtongan yo no panon yon napaaligwas so presentasyon yo. Paliisan yoy pangibagay negatibo nipaakar ed saray totood teritorya yo. Niarum ni, agyo paniistoryaan so kakapuyan na saray kapara tayon ebanghelisador. (Gal. 5:15) Lawas tayon nonoten ya sikatayoy pananginan a gawad pitek. Lapud agnaparaan a panangasi nen Jehova, inmatalek tod sikatayoy kayamanan, say ministeryo na maong a balita. (Basaen so 2 Corinto 4:1, 7.) Kanian, ipanengneng tayoy panamablid satan a kayamanan diad sigpot a panumpal ed kimey tayo bilang ebanghelisador.