“SEMPET ka ed kakanayon mo, tan ibalitam ed sikara so amin a ginawa nen Jehova ed sika tan say panangasi ya impanengneng to ed sika,” so kuan nen Jesu-Kristo. Sikatoy nayarin walad Gadara ed saman, diad bandad bukig na Dayat na Galilea. Katongtong toy sakey a laki ya labay toy magmaliw ya patumbok to. Napatnagan ed imbaga nen Jesus ya amta toy ugali na totoo—labalabay dan istoryaen ed kakanayon da iray makapainteres tan importante ed sikara.—Mar. 5:19.

Ontan nin siansiay ugali na totoo natan, lalo lad arum ya kultura. Kanian no say sakey ya too et mandadayew lad tuan Dios ya si Jehova, labay ton ipaamta met ed saray kakanayon to so balon pananisia to. Balet panon so nepeg ya panggawa tod satan? Panon ton nasabi puso na saray kakanayon ton dumay relihyon da odino agmanisiad Dios? Mangiiter so Biblia na positibo tan realistikon simbawa.

Nen inmunan siglo, si Andres so sakey ed saramay inmunan akaamta ya si Jesus so Mesias. Siopay angibalitaan ton tampol ed satan? “Unona et aromog [nen Andres] so agi ton si Simon, tan inkuan to ed sikato: ‘Aromog mi lay Mesias’ (a no ipatalos et mankabaliksay, Kristo).” Inyakar nen Andres si Pedro ed si Jesus, kanian awalaan na pankanawnawa si Pedro ya magmaliw a disipulo nen Jesus.—Juan 1:35-42.

Kalabas na manga anem taon, nen walad Joppe si Pedro, sikatoy ingganggan ya onlad Cesarea tan ombisitad abung nen Cornelio, sakey ya opisyal ed armada. Siopay asabian nen Pedro tan saray kakaiba to diad abung nen Cornelio? “On, tatalaranan la ra nen Cornelio tan tinipon to iray  kakanayon to tan maapit a kakaaro to.” Kanian awalaan na pankanawnawa iray kakanayon nen Cornelio ya narengel so ibaga nen Pedro tan mandesisyon base ed satan.—Gawa 10:22-33.

Antoy naaralan tayod ginawa di Andres tan Cornelio?

Agnanalagar si Andres o si Cornelio ya walay onsabin pankanawnawa. Inkabat ya mismo nen Andres si Pedro ed si Jesus tan impatawag nen Cornelio iray kakanayon to pian narengel day ibaga nen Pedro. Balet agda pinilit o pinatitan iray kakanayon da pian magmaliw ya papatumbok nen Kristo. Antoy naaralan mod satan? Balibali no aligen tayo ra. Sarag tayoy manggaway paraan pian ninabang tayod sikara so katuaan tan nakabat da ray kaagian tayo. Balet rerespetoen tayo nin siansiay kanepegan dan mandesisyon tan agtayo ra pipiliten. Pian nanengneng tayo no panon tayon natulongan iray kakanayon tayo, ikonsidera tayoy alimbawa di Jürgen tan Petra, sanasawan taga Germany.

Inyaralan na saray Tasi nen Jehova si Petra tan ag-abayag et abautismoan. Say asawa ton si Jürgen et opisyal na militar. Nen unaan, aglabay nen Jürgen so desisyon na asawa to. Balet sinmabi panaon ya atalosan ton ipupulong na saray Tasi so katuaan ed Biblia. Indedika to met so bilay tod si Jehova tan natan et elder lad kongregasyon. Antoy nibaga ton makatulong pian nasabi puso na kanayon ya walaay duman pananisia?

Imbaga nen Jürgen: “Agtayo ra pipiliten tan agtayo pulong a pulong ed sikara. Ompan mas lalon agda labay no ontan. Mas maabig no sagpaminsan et mataktika tayon manginabang na katuaan ed sikara. Makatulong met no ikabat tayo rad agagi ya kaedaran da tan parehoy interes da. Onapit so liknaan da no ontay gawaen tayo.”

Kinmiwas ya tampol si apostol Pedro tan saramay kakanayon nen Cornelio nen arengel day mensahe na Biblia. Wala ra met balet so arum nen inmunan siglo ya abayag so inkiwas da.

Wala ray pigaran kanayon nen Jesus ya anisiad sikato. Alimbawa, posible ya kakapinsan to ra di apostol Santiago tan Juan, tan panginaen toy ina ran si Salome. Nayarin si Salome et sakey ed saramay “dakel niran bibii, a manlilingkor ed sikara [si Jesus tan saray apostol] ya inusar da iray kayamanan da.”—Luc. 8:1-3.

Say arum balet ya kapamilyaan nen Jesus et agtampol angipatnag na pananisia. Singa bilang, kayari impanpabautismo nen Jesus, nantitipon iray totoo ed sakey ya abung pian ondengel ed sikato. “Balet sanen nadngel itan na kakanayon to, sikatoy nila ra pian alaen da, ta ibabaga ra: ‘Aderal lay ulo to.’” Ag-abayag, nen si Jesus et kinatongtong na saray agagi to nipaakar ed onsublay ya laen to, agto imbagad sikara so espisipiko iran detalye. Akin? Lapud “diad tua, agmanisia ed sikato iray agagi to.”—Mar. 3:21; Juan 7:5.

Antoy naaralan tayod paraan na impantrato nen Jesus ed saray kakanayon to? Sikatoy agsinmyodot nen imbaga ran aderal lay ulo to. Kayari impatey tan inkioli to, labay ton napaseseg iray kakanayon to kanian nampanengneng ed agi tod ina a si Santiago. Lapud satan et aliwan si Santiago  labat so akombinse ya si Jesus so Mesias noagta ontan met ed arum nin agagi to. Kanian kaiba ira na saray apostol tan arum ni ya akaawat na masanton espiritu diad sakey a kuartod tagey diad Jerusalem. Kalabas na panaon, si Santiago tan si Judas ya agi to met ed ina et awalaan na marakep iran pribilehyo diad Kristianon kongregasyon.—Gawa 1:12-14; 2:1-4; 1 Cor. 15:7.

Singa nen inmunan siglo, natan et wala met iray kapamilyan mabayag so ikiwas da. Singa si Roswitha ya aktibon Romano Katoliko nen abautismoay asawa to bilang Tasi nen Jehova nen 1978. Lapud debotado ed relihyon to, diad gapo et kontrad impan-Tasi nen asawa to. Balet kayari pigaran taon, agla tanton onsusumpa tan anengneng ton ibabangat na saray Tasi so katuaan. Nen 2003 et abautismoan met si Roswitha. Akin et anguman? Imbes ya onsyodot si masiken tod isusumpa to, inikdan toy Roswitha na pankanawnawan manguman. Antoy nibaga nen Roswitha? “Kaukolan so mananos, mananos, tan dakel ya anos.”

Abautismoan si Monika nen 1974, tan kayari samploran taon et nan-Tasi met so duaran anak ton lalaki. Say asawa ton si Hans et agmet kontrad relihyon da, balet nen 2006 labat abautismoan. Diad satan ya naeksperiensya da, antoy nibaga na sayan pamilya? “Manmatoor ed si Jehova, tan agmo ikokompromisoy pananisiam.” Siempre, impaseguro dad si Hans ya ag-angumay panangaro dad sikato. Tan ag-ira naandiay ilalo ya awaten to lanlamang so katuaan.

Aminsan et deneskribe nen Jesus so katuaan a singa danum ya mangiter na bilay ya andi-anggaan. (Juan 4:13, 14) Labay tayon nainawaan iray kakanayon tayo ed iyinum day ambetel tan malinew ya danum na katuaan. Tan agtayo labay ya aliling to et naparukan ira lapud pipiliten tayo ran oninum na dakdakel a danum. Akadepende ed paraan na pangipaliwawa tayod pananisia tayo no kasin nainawaan o naparukan ira. Ibabaga na Biblia ya “say puso na maptek aralen to so onebat” tan “say puso na makabat ibangat to so sangi to, tan mangiyarum na pakaaral ed saray bibil to.” Panon tayon niyaplika iyan simbawa?—Uli. 15:28; 16:23.

Alimbawa, no labay ya ipaliwawa na asawan bii so pananisia to ed asawa to, kaukolan ton ‘aralen so iyebat to.’ Pilien ton maong so ibaga to tan agbengatbengat ya mansalita. Agto ipalikna ya mas matunong odino mas atagey. Say maalwar ya panagsalita to et makarepresko tan agpansengegay kolkol. Kapigan ya mas relaks tan mainomay ya asinggeran so asawa to? Anto ray labalabay ton pantongtongan o basaen? Kasin interesado ed science, politika, o isports? Antoy gawaen to pian magmaliw ya interesadoy mister to ed Biblia balet siansia nin rerespetoen toy liknaan tan opinyon to? Maabig no nonoten to iratan pian natulongan ya mansalita tan onkiwas tekep na pakatalos.

On, pian nasabi so puso na kapamilya tayon aliwa nin Tasi, sandaraiset tayon ipaliwawa so pananisia tayod sikara. Balet aliwan satan labat so kaukolan, nepeg tayon tekepan na maong ya ugali so ibabaga tayo.

“Lanang ya iyaplika iray prinsipyo na Biblia diad inagew-agew. Epektibo itan ya paraan ya naimano na saray kakanayon, anggano agda ipalikas,” so kuan nen Jürgen, ya abitla nen niman. Ontan met so kuan nen Hans, ya abautismoan ngalngali 30 taon manlapud impanpabautismo nen asawa to. “Importante so maabig ya Kristianon kondukta pian nanengneng na kanayon so positibon epekto na katuaan ed bilay tayo.” Nepeg ya nanengneng na saray kakanayon tayo ya say pidumaan na pananisia tayod arum et positibo, aliwan negatibo o makapasyodot.

Angiter si apostol Pedro na importantin simbawa ed saray asawan bibii ya agmananisia so asawa ra: “Manpasakop kayo ed kaasawaan yon dili, ta no bilang wala ray ag-ontutulok ed salita, magmaliw iran matulok lapud ugali yo anggano agkayo mansalita, ta nanenengneng da so masimpit ya ugali yo ya atekepan na aralem a panagrespeto. Tan napatnagan komon so ganggana yo, aliwan diad panaglapir na buek tan panagsulong  na saray alahas a balitok odino ilalatop iran kawes, noagta diad inkatoo a walad dalem na puso ya asulongan na agnaderal a kawes, salanti, say mareen tan maulimek ya espiritu, a mabmabli ed imaton na Dios.”—1 Ped. 3:1-4.

Imbaga nen Pedro ya say sakey ya asawan laki et nasagyat ed maong ya ugali na asawa to. Satan ya prinsipyo so sankanonot na sakey a sister a si Christa. Manlapu lad impanpabautismo to nen 1972, labay ton sabiey puso na asawa to panamegley na ugali to. Asali met nen asawa to so inyaralan na saray Tasi, balet agni kinmiwas. Akaatendi met lad saray aral tan wala la ray kakaaro tod kongregasyon. Nirespeto na saray agagi so kanepegan ton manpili. Antoy ginawa nen Christa pian nasabi toy puso na asawa to?

“Determinado ak ya gawaen so panlabayan nen Jehova. Tan gagawaen koy anggaay nayarian ko ya panamegley na maong ya ugalik et nasagyat koy asawak ‘anggano agak mansalita.’ No anggapo met so nasumlang kon prinsipyoy Biblia, gagawaen koy labay to. Tan siempre, rerespetoen koy desisyon to tan inmatalek ko lad Jehova iray bengabengatla.”

Nanengneng tayod ginawa nen Christa ya importante so pangikonsiderad liknaan na kakanayon. Agto papaulyanay espiritual iran bengatla, singa say regular ya piaral tan pampulong. Balet sankanonot to met ya walay kanepegan nen asawa to ed panangaro, panaon, tan atension to. Maong sirin no ikonsidera tan talosan tayoy liknaan na saray agmananisian kanayon tayo. ‘Amin a bengatla et walay panaon to,’ so kuan na Biblia. Kaibad satan so panaon ya iter tayod kapamilyaan tayo, lalo lad asawa ya agmananisia. No sankaiba kayo, makapantongtong kayo. Apaneknekan ya no maong so komunikasyon, ag-ira manermen, agda naliknan ag-ira importante, tan ag-ira manimon.—Ecl. 3:1.

“Importantin ipanengneng ya inaro tayoy kapamilya tayo tan ipikasi tayo,” so kuan nen Holger, ya say ama to et abautismoan 20 taon kayarin nampabautismo so arum ya membro na pamilya. Inyarum nen Christa ya ‘agbalot naandiay ilalo ya mandayew lanlamang so asawa tod si Jehova tan awaten toy katuaan.’ Nepeg ya positibo tayon lanang ed saray kakanayon tayon dumay pananisia ra, tan agtayo nanaekalay ilalo.

Labay tayon mansiansian marakep so relasyon tayod saray kakanayon tayo pian walay pankanawnawa ran naamtaan so katuaan tan onsabid puso ra so mensahe na Biblia. Tan nepeg ya gawaen tayo itan “tekep na inkaulimek tan aralem a respeto.”—1 Ped. 3:15.