Daiset so Manuley, Dakel so Nabendisyonan

NANLAPU la nen panaon na saray apostol, mamipili la so Dios ed saray totoo na pigaran matoor a Kristiano pian tagibien to. Lapud agaylay kabaleg na pananguman a naeksperiensya na sarayan tagibi, indeskribe itan na Biblia bilang kianak lamet. Say gagala na kianak lamet et pian iparaan irayan lingkor na Dios ed panuley da’d tawen. (2 Timoteo 2:12) Pian makapanuley ira, kaukolan a paolien ira ed bilay diad tawen. (Roma 6:3-5) Ditan et “manari ra ed tapew na dalin” kaibay Kristo.​—Apocalipsis 5:10; 11:15.

Balet, ibabaga met na Biblia a wala ni ray arum a makaawat na andi-anggaan a kililiktar nilikud ni ed saray nianak lamet. Ibabaga na Biblia (namparan diad Hebreon Kasulatan odino tatawagen met a Daan a Sipan, tan diad Kristianon Griegon Kasulatan a tatawagen  met a Balon Sipan) a gagala na Dios ya iliktar so duaran grupo na totoo. Say unona et melag a grupo a manuley ed tawen tan say komadua et baleg a grupo ya uleyan diad dalin. Alimbawa, imanoen pay insulat nen apostol Juan ed saray kaagian ton nianak lamet. Oniay inkuan to nipaakar ed si Jesus: “Sikato so manamaandi kasalanan tayo, tan aliwa lambengat ed saray kasalanan tayo [samay melag a grupo], noag met kasalanan na lapag a mundo [samay baleg a grupo].”​—1 Juan 2:2.

Onia met so insulat nen apostol Pablo: “Say maseseg a pampilalek na pinalsa [samay baleg a grupo] aalagden to so kipatnag na saray anak na Dios [samay melag a grupo].” (Roma 8:19-21) Antoy labay ya ibaga di apostol Juan tan Pablo? Nia ay: Saramay nianak lamet et magmaliw a kabiangan na gobierno ed tawen. Pian anto? Pian nabendisyonan so minilyon a totoo a manayam diad dalin, ya uleyan na gobierno na Dios. Kanian oniay imbangat nen Jesus ya ipikasi na saray babangatan to: “Onsabi komon so panarian mo. Nagawa komon so linawam, unong ed tawen, ontan met ed dalin.”​—Mateo 6:10.

Diad Hebreon Kasulatan met et nabasa tayo so kiliktar na sayan duaran grupo. Singa bilang, imanoen pay imbaga nen Jehova ed laki nen Jesus a si Abraham: “Dia ed ilalak mo [samay melag a grupo] so pakapikapalaranan na saray amin a nasyon [samay baleg a grupo].” (Genesis 22:18) On, nabendisyonan so amin a nasyon panamegley na “ilalak” nen Abraham.

Siopa itan ya “ilalak”? Si Jesu-Kristo, tan kaiba iramay nianak lamet, salanti, saray tinagibin anak na Dios. Oniay impaliwawa nen apostol Pablo: “No sikayo kien kayo nen Kristo, ontan sirin ilalak kayo nen Abraham.” (Galacia 3:16, 29) Antoray niiter a bendisyon ed totoo na amin a nasyones panamegley na “ilalak”? Say kagalangan a naalay pabor na Dios tan say pakawalaan na andi-anggaan a bilay diad paraison dalin. Oniay impropesiya nen salmistan David: “Say matunong tawiren to so dalin tan manayam diman lawas.”​—Salmo 37:29; Isaias 45:18; Apocalipsis 21:1-5.

On, say panuley ed tawen et para labat ed pigaran apili, balet saray benepisyo na satan, salanti, say andi-anggaan a bilay diad dalin tan amin ni ran katekep ton bendisyon, et parad dakel a totoo. Komon ta sikayon sankapamilyaan et kaiba a mangawat ed andi-anggaan a bendisyon na Panarian na Dios.

[Litrato ed pahina 12]

Minilyon a totoo so nabendisyonan na andi-anggaan a bilay diad dalin. Sakey ka met kasi ed sikara?