Tepet na Saray Manbabasa

Talaga Kasin Walay Diablo?

On, ibabangat na Biblia a talagan walay Diablo, tan sikatoy sakey a persona. Balet, ibabaga na saray kritiko ed Biblia a kalokoan labat itan. Inkuan dan si Satanas a Diablo et simbolo labat na kaugsan a walad totoo.

Nepeg tayo kasin pankelawan no akin a nawewetwet iray totoo nipaakar ed si Satanas? Andi. Bilang ilustrasyon: Pian agnabidbir so sakey a kriminal, nayarin punasen toy fingerprints to ed nanggawaan toy krimen diad ontan et nitultuloy toy ilegal a gagawaen to. Mipadpara, si Satanas et sakey a marundunong a kriminal a kontento lan mangimaneobra ed saray bengatla, tan mangisugsog na kaugsan. Malinlinew ya imbaga nen Jesus a si Satanas so walad benegan na mauges a kipapasen na totoo. Tinawag nen Jesus si Satanas bilang “say prinsipe na sayan mundo.”​—Juan 12:31.

Iner so nanlapuay Diablo? Dati et sikatoy sakey a perpekton anghel a manaayam ed tawen, balet pinagmaliw ton Diablo so inkasikato sanen pinirawat ton sikato so dayewen na totoo, imbes a say Dios. Isasalaysay na Biblia so impantongtong nen Satanas tan si Jesus, a diad satan et pinmaway so makasarilin ambisyon na Diablo. Sinali nen Satanas a ‘padakmomoen si Jesus pian mangigalang’ ed sikato.​—Mateo 4:8, 9.

Ontan met, diad samay impitongtong to’d Dios a nirekord ed libro na Job, pinmatnag so motibo nen Satanas. Gawaen toy amin pian ibeneg na totoo so Dios.​—Job 1:13-19; 2:7, 8.

Nonoten pa: Panon a nibagan si Satanas et sakey labat a simbolo na kaugsan a walad arum, anta akapitongtong ed si Jehova a Dios tan ed si Jesu-Kristo? Imposiblin walay kaugsan ed Dios tan ed Anak to! Malinlinew sirin a si Satanas et peteg a persona​—sakey a mauges ya espiritu ya anggapoy respeto to ed si Jehova tan ed si Jesus.

Say mismon mauges a kipapasen na katooan et paneknek lan talagan walay Diablo. Saray nasyon et papaulyanan da labat lan nabulok iray kakanen anta walaray sakop dan ngalngali la ompatey ed eras. Manitipon iray armas a turobos a makapatey tan parepareho ran pakaderalan. Saray kagagawa ra et pansesengegay polusyon. Ingen bulag iray totoo ed lapuan na sayan maruksa tan makapatey iran kagagawa. Akin?

Ibabagay Biblia a si Satanas et ‘binulag toy isip na saray agmananisia.’ (2 Corinto 4:4) Pian nimaneobray katooan, manguusar si Satanas na agnanengneng ya organisasyon. Sikato so “katawan na saray demonyo.” (Mateo 12:24) Singa say lider na sindikato a sarag ton kontrolen so baleg ya ilegal ya organisasyon anggan agkabat na totoo to, uusaren nen Satanas so mapalikdon organisasyon to, a tugyopen na mauges iran anghel, pian kontrolen so dakel a totoo a kaslakan et anggapoy kaam-amta ra.

Misalsalamat itayo ta impaamtay Biblia no siopan talaga si Satanas a Diablo tan say organisasyon to! Kanian makapanggawa itayoy paraan pian nalabanan so impluensya to. Oniay ipapaseseg na Biblia: “Ontulok kayo . . . ed Dios; balet onsumpa kayo ed diablo, et sikato so onarawi ed sikayo.”​—Santiago 4:7.