Sarag Mo Kasin Kabaten a Maong so Dios?

Baleg a kagalangan no inabuloyan ka na sakey ya importantin too a sikatoy tawagen mo ed ngaran to. Saramay atagey so posisyon da et maslak a tatawagen ed saray titulo, a singa say “Mr. President,” “Your Excellency,” odino “Your Honor.” Kanian seguradon maliket ka no ibaga’d sika na ontan a too ya, “Tawag mo ak la’d ngaran ko.”

DIAD Biblia et ibabaga na tuan Dios ed sikatayo: “Siak si Jehova, satan so ngaran ko.” (Isaias 42:8) Dakel so titulo na Dios, a singa say “Amalsa,” Makapanyarin-amin,” tan Soberanon Katawan,” balet papagalangan to iray matoor a lingkor to ta aabuloyan to ran tawagen da ed mismon ngaran to.

Singa bilang, sanen indedika so templo ed Jerusalem et oniay gapo na pikakasi nen Arin Solomon: “O Jehova.” (1 Arari 8:22, 23) Onia met so imbaga nen propetan Elias diad pikakasi to: “Denglen mo ak, O Jehova.” (1 Arari 18:37) Tan sanen akikasi ed Dios si propetan Isaias parad bansan Israel, oniay imbaga to: “Sika O Jehova, sika so Ama mi.” (Isaias 63:16) On, labay nen Jehova a sikatoy tawagen tayo ed ngaran to.

Anggaman importante a tawagen tayoy Jehova ed ngaran to, aliwan magenap itan pian nibaga tayon kabkabat tayo la. Oniay isisipan nen Jehova ed toon mangaaro tan manmamatalek ed sikato: “Sikato so ipasen ko ed tagey [odino, iliktar ko], nisengeg ed kinabat to so ngaran ko.” (Salmo 91:14) Unong ed sayan teksto, kaukolan a kabat na too so ngaray Dios pian sikatoy protektaan To. Mapatnag sirin a wala ni mas aralem a kabaliksan na pakapikabat ed ngaran na Dios. Anto itan? Tan antoy kaukolan mon gawaen pian nakabkabat moy Jehova?