Si Smita, * a manedad na 35 ya tagad Dhaka, Bangladesh, et kabkabat ya maar-aro tan maasikason bii. Amta na dakel ya sikatoy makuli tan maliket ya asawa, tan labalabay ton ipaamtad arum iray naaaralan to nipaakar ed Dios. Balet abiglan maong so pamilya tan kakaaro to nen sikatoy biglan nansakit tan anggapo ni sakey simba et inatey!

Ontan met so reputasyon nen James tan say asawa to, ya manedad iray masulok a 30. Aminsan nen panaon na spring, binisita da ray kakaaro da ed West Coast na United States. Balet agla ran balot akapawil ed abung da ed New York. Legan iran wadman, inatey ira lapud graben aksidente ed luluganan. Ansakisakit itan parad saray inad-aro dad bilay tan saray katrabaho ra.

Balet anggano agka la onarawi, nanengneng mo ya dakdakel so nagagawan mauges tan paniirap. Dakel ya sibilyan tan sundalo so ompapatey diad guerra. Nabibiktima iray inosentin totoo lapud krimen tan karawalan. Antokaman so edad odino kipapasen ed bilay, anggapoy nipuera ed saray graben aksidente tan makapatey iran sakit. Anggapoy pipilien na saray kalamidad. Kasmak so diskriminasyon tan ag-inkahustisya. Ompan agawa met la itan ed sika.

Natural labat ya itepet iraya:

• Akin et nagagawa iray mauges a bengatla ed maong a totoo?

• Kasin say Dios so natetel?

• Kasin basta labat nagagawa iray kalamidad, odino lapud saray totoo?

• Kasin maniirap so sakey a too lapud Karma? *

• No walay makapanyarin-amin a Dios, akin et agto proprotektaan iray maong a totoo?

• Naandi ni kasi so kaugsan tan paniirap?

Pian naebatan iratan, walay duaran bengatla ya kaukolan tayon natalosan: Akin et nagagawa iray kaugsan, tan antoy gawaen na Dios ed saratan?