Inyanak ak ed Paddington, sakey ya matoon lugar diad London, England. Sankakaiba kami di nanay ko tan saray taloran atsik. Tataynanan kamin lanang nen tatay ko lapud problema tod alak.

Nen ugaw ak, imbangat ak nen nanay ko ya manpikasi kada labi. Walay melag ya Bibliak ya Salmo labat so karga to, tan inggawaan ko iratan na tono pian nakansion ko. Walay atandaan kon abasak ed sakey ed saray librok: “Onsabi agew ya anggapo lay nabuas.” Lapud saya et agak makaugip ta sankanonot koy nagawad arapen. Inisip ko: ‘Segurado ya aliwan onia labat so bilay.’ ‘Akin et wadia ak?’ Agko labay so ompatey!

Labay kon nasali so espiritismo. Sinalik so mitongtong ed saray inatey, ombisita ed saray sementeryo kaiba iray kakaarok ed eskuelaan, tan manbantay na horror. Parad sikami et eksayting tan makapataktakot iman.

Ginmapon nagmaliw ya maguloy bilay ko nen samploy taon ko labat. Akaaral ak ya mansigarilyo, tan nagmaliw itan ya bisyok. Insan mansusungap ak met lay marihuana. Nen 11 so taon ko, oniinum ak met lay alak. Anggano agko labay so taway to, labalabay koy liknaan ya abuek. Labalabay ko met so musika tan onsayaw. Lanang ak met ya oonlad saray party tan nightclub. Ontatakas ak no labi tan onsesempet ak antis ya onliwawa. Lapud naksawan ak ed ontumbok ya agew, mabetbet ya agak onloloob ed eskuelaan. Tan no onloob ak, oniinum ak antis na saray klasek.

Abebbebay grades ko diad sampot ya taon kod eskuelaan. Diman labat naamtaan nen nanay ko so aliwliwan kagagawak kanian adismaya tan mamapasnok. Nankolkol kami, tan linmayas ak ed abung. Akiayam ak ya agano ed boyfriend kon si Tony. Sikatoy mantatakew tan manlalako na druga tan kabkabat ya sobran bayolenti. Alukonan ak tan diad edad ya 16 et angiyanak ak na sakey a laki.

Unaan kon akabat iray Tasi nen Jehova nen wala ak ed ayaman parad saray ina ya anggapoy asawa kaiba iray anak  da. Inikdan ak na kuarto ditan na saray walad autoridad. Walay duaran Tasin bibii ya regular ya ombibisita ed arum ya kabataan ya ina. Sakey agew et akila ak ed pantotongtong da. Labay kon pruebaan ya aliwa iray Tasi. Pero sansakey dan naebatan so dakel ya tepet ko, ya kalmado tan malinew manlapud Biblia. Maomaong tan mauyamo ira, tan labalabay ko itan. Kanian pinmayag ak ya iyaralan da ak na Biblia.

Walay naaralan kod Biblia ya anguman ed bilay ko. Manlapu la nen ugaw ak, antakot koy ompatey. Balet natan naamtaan koy bangat nen Jesus nipaakar ed kioli! (Juan 5:28, 29) Ontan met, naaralan ko ya say Dios et walay malasakit to ed siak a mismo. (1 Pedro 5:7) Tan say talagan akaapekto ed siak et say Jeremias 29:11, ya kuan to: “‘Ta amtak iray bengatlan nononoten ko parad sikayo,’ so imbaga nen Jehova, ‘say kareenan, tan aliwan say kadederal, pian ikdan ta kayoy maong ya arapen tan ilalo.’” Diad saman et ginmapo ak lan manisia ya walay ilalok ya manbilay ya andi-anggaan diad Paraison dalin.—Salmo 37:29.

Impanengneng na saray Tasi nen Jehova so tuan panangaro ed siak. Nen first time koy inmatendi ed aral da, maar-aro ira tan balibali liknaan ko—amin et makaaro! (Juan 13:34, 35) Duman maong itan ed panagtrato ed siak na sakey a relihyon ed lugar mi. Inawat ak na saray Tasi anggano onman so situasyon ko. Inikdan da ak na panaon, panag-asikaso, tan atension, pati tulong a kaukolan ko. Aliknak ya singa ak kabiangan na baleg a pamilya, sakey ya maar-aron pamilya.

Lapud panaaral koy Biblia, anengneng ko ya kaukolan koy manggawa na pananguman ed bilay ko pian naabot ko ray atagey ya estandarte na Dios ed moral. Nairapan ak ya itunda so pansisigarilyok. Ontan met, wala ray musika ya mas aaruman day panlabay kon onsungap na marihuana, kanian sinalatan ko ray dedengelen kon musika. Labay kon lanang ya malinew so isip ko kanian tinundaan koy onlad saray party tan nightclub pian agak natukson oninum. Tan nananap ak na balon kakaaro ya maong so impluensya dad siak tan makatulong ed balon kabibilay ko.—Proverbio 13:20.

Diad saman, si Tony et ginmapo met lan manaral na Biblia ed saray Tasi nen Jehova. Lapud naeebatan na saray Tasi iray tepet to ed Biblia, akombinse met la ed katuaan a nanaaralan to. Nanggawa na baleg iran pananguman ed bilay to: iniwasan to ray bayolenti ya kakaaro to, agla mantatakew, tan agla onsusungap na marihuana. Pian talagan napaliket mi si Jehova, atalosan mi ya kailangan min umanen so imoral a kabibilay mi tan ikdan na seguridad so anak mi. Kanian nankasal kami nen 1982.

Atandaan ko ya nananap ak ed saray magasin ya Panag-bantayan tan Onliing! * na saray istorya na totoon akapanggawa na pananguman ya labay kon gawaen. Talagan apaseseg ak ed saray alimbawa ra! Apabiskeg ak ya mansagpot ya maong tan ag-onsuko. Lanang ak ya manpipikasi ed si Jehova ya agkomon onsusuko ed siak. Abautismoan kami nen Tony bilang Tasi nen Jehova nen Hulyo 1982.

Say pikakaarok ed si Jehova a Dios so angisalba ed bilay ko. Naeksperiensya mi met nen Tony so tulong nen Jehova diad mairap iran panaon. Naaralan mi so mantiwala ed Dios ed saray mairap a situasyon, tan nalilikna mi ya sikatoy lanang ya ontutulong tan onsusuporta ed pamilya mi.—Salmo 55:22.

Nanliketan koy intulong ed anak kon laki tan bii ya kabaten met si Jehova. Ontan met so naliliknak natan ya nanenengneng koy ananak da ya kakabaten da met so Dios.

Agak la natan nanaaburido no labi ed pannononot ed arapen odino ipapatey. Sikami nen Tony et busy ya sinimban ombibisita ed nanduruman kongregasyon na saray Tasi nen Jehova pian natulongan iran ombiskeg so pananisia ra. Mimila kami ed sikara ya ibangat ed arum ya nayari met iran nawalaan na bilay ya andi-anggaan no ipanengneng day pananisia ed si Jesus.