Nabasa ed Biblia iray balibalin bilin ya talagan makatulong ed bilay tayo. No lanang mon basaen tan unoren mo ray naaralan mo ditan, “amin a gawaen [mo] et onaligwas.” (Salmo 1:1-3; Josue 1:8) Nakabat mo met so Dios tan say Anak to ya si Jesus. Atan ya gawaen mo et nayarin manresulta ed kaligtasan mo.​—Juan 17:3.

Panon mon igapo so pambasam na Biblia? Depende ed sika no labay mon basaen so Biblia manlapud gapo anggad sampot, odino sarag to met ya per topic so basaen mo. Alimbawa, ompan labay mon basaen iramay parte ya tungkol ed history na bansan Israel tan no anto ray ginawa na Dios parad sikara nensaman. Wala met iray parte na Biblia ya pakabasaan no panon ya ginmapo so kongregasyon na saray Kristiano nen inmunan siglo tan no panon iran dinmakel. No manbasa ka na sakey ya grupo na saray kapitulo kada agew, nabasam so interon Biblia ed sakey taon.

No labay mon iplano so pambasam na Biblia ya inagew-agew, odino pian nabasam itan ya intero ed sakey taon, odino labay mo ni labat ya igapon basaen, makatulong iyan eskedyul. I-download tan i-print iyan eskedyul ed panagbasa na Biblia, tan igapom la natan so manbasa.