Say tantiya et manga 5 bilyon ya totoo so iilaloan ya manbantay na FIFA World Cup manlapud Nobyembre 20 anggad Disyembre 18, 2022. Iisipen na dakel ya makatulong so ontan iran sports event pian talagan mankakasakey iray totoo aliwa labat ya lapud saniiba ran manbabantay.

•   “Sarag ya umanen na sports so mundo. Walay pakayari ton mangimpluensya. Tan sarag ton pankakasakeyen iray totoo diad nikaduman paraan.”—Nelson Mandela, datin presidente na South Africa.

•   “Sarag na football . . . ya pankasakeyen so totoo lapud nalilikna dan ilalo, liket, aro, tan parehoy hilig da ed saray kaiba dan manbabantay.”—Gianni Infantino, presidente na FIFA. a

 Nagawaan kasi na World Cup odino arum nin sports event itan ya atagtagey ya goal? Wala ni kasi pag-asa ya niwalay kareenan tan pankakasakey?

 Diad sayan taon, aliwa labat ya football so iilaloan na totoo ya nagawad World Cup. Lapud saratan ya galaw, napantotongtongan na totoo iray isyu ed social tan politika ya lalanoren toy karapatan na too, panangidumaduma na lahi, tan aliwan patas ya ekonomya.

 Anggaman ontan, dakel nin siansia so totoon naliliketan ya manbantay ed saray international sports event ya singa say World Cup. Pero anggano labalabay na totoo, siansia nin agniiter na ontan iran event so permanentin pankakasakey. Imbes, ompapaway ditan iray ugali tan kagagawa ya mangipapaseseg na inkaapag-apag, ya napatnagan ed panaon ya tatawagen na Biblia ya “kaunoran iran agew.”—2 Timoteo 3:1-5.

 Karga na Biblia so tuan pag-asa parad pankakasakey na interon mundo. Impromisa na satan ya mankakasakey so amin ya totoo ed dalin panamegley na gobierno ed tawen ya tatawagen ya “say Panarian na Dios.”—Lucas 4:43; Mateo 6:10.

 Seguroen nen Jesu-Kristo, say Ari na satan ya Panarian, ya niwalay kareenan ed interon dalin. Ibabaga na Biblia:

•   “Ombulaslas so matunong, tan inerman a pasen et walay kareenan.”—Salmo 72:7.

•   “Iliktar to so mairap-bilay ya onkekerew na tulong . . . Iliktar to ra ed panagpairap tan karuksaan.”—Salmo 72:12, 14.

 Natan ni labat et pankakasakeyen la na bangat nen Jesus so minilyon ya totoo ed 239 ya dalin. Inaral day agmanbusol na kapara dan too. Pian naaruman ni antam, basaen so serye na saray artikulo ya say title to et “Naekal so Pambubusolan!”