Si Harold Corkern, a katulongan na Publishing Committee na Mananguley ya Ulop, et angiter na nibased Biblian paliwawa ya say tema to et “Ipatnag so Sigpot a Potensyal Mo.” Wala ray regular ya ombibisitad Warwick ya manpapaliwawa pian pasesegen iray mankikimey.

Sarayan amputin plastik ya akasakbong ed bilding so manproprotekta ed saray mankikimey pian nasumpal day trabaho da no winter. Sayan parte na bilding so pangipasenan na dining room, infirmary, kitchen, tan laundry.

Ipaparaan na saray electrician so pangikabit na saray wire. Masulok lan 12,000 metro (40,000 feet) so inusar ya kable ed saray residence building. Ginmapon tampol so kimey ed electrical kayarin asaliw so property ed Warwick tan mantultuloy itan anggad nasumpal so proyekto.

Iikdan na duct tape na sakey ya mantratrabaho so balkonahe pian iprepara ed waterproofing. Saray balkonahe ed sankatageyan ya grado et pupuranisan na polymethyl methacrylate (PMMA)—sakey iyan likido ya onawet pian magmaliw ya water-resistant ya plastik.

Sanaman mantratrabahod electrical ya mangikakabit na wire parad saray kuarto ed residence.

Manguugto iray mankikimey diad temporaryon dining room. Masulok ya 2,000 totoo so papakanen kada ugto.

Iiyan na saray mankikimey iray balatyang parad basement na maintenance building.

Saray sulat na ugugaw ya misasalamat ed saray mankikimey ed panagpaalagey. Dakel so manboboluntaryo na pigaran agew labat. Diad tua, manga 500 balon boluntaryo so onsasabi sinimba. Nen Pebrero, manga 2,500 so nankimey ed Warwick kada agew.

Manga 60 porsiento na proyekto so asumpal la. Diad baetan na Enero tan Abril 2015, asumpal ya nipaalagey iray residence building tan say structure na Offices/Services Building. Diad saratan met ya bulan, inggapo na saray mankikimey so pangiyan na saray konkreton dingding diad Maintenance Building, panggawa na saray dadalanan ya mangikonekta ed saray residence, tan say pangapiger ed dam diad Sterling Forest Lake (Blue Lake).

Saya so nanengneng manlapud leksab na stair tower. Saray inupaan ya contractor so nanggawa ed structure na sayan limaran gradon tower, tan saray boluntaryon Tasi so nambuhos na semento.

Anggano ambetebetel so panaon, iiyan na saray mankikimey so balatyang parad first floor. Ngalngali 127 sentimetro (50 inches) ya snow so pinmelag ed Warwick manlapud Enero anggad Marso. Wala ray manpapala na snow pian nituloy so kimey, tan wala met iray heater ed pigaran lugar pian napetangan iray mankikimey.

Marso 12, 2015​—Visitor Parking

Oniay nanengneng manlapud tower crane, no akaarap ed Residence B.

Onkokonsulta ed saray drowing iray tubero diad Resident Parking Garage. Masulok ya 3,400 naaprobaan ya drowing so kaukolan parad interon proyekto.

Akalugan ed boom lift iray mankikimey ya mangipepeket na plastik pian protektaan so bilding. Dakel so gagawaen ya training pian naseguro ya anggapoy narisgo diad pangusar na saray lift tan arum ya kagawaan. Kaibad sarayan training so nipaakar ed boom lift tan scissor lift, proteksion no napelag, orientation, respirator, tan saray signal.

Nanengneng ed bandad sagur iray residence building. Nen manampot so Abril, dakel so ginawan kimey ed mechanical tan electrical diad Residence A, B, tan D, ya nanengneng ed sayan litrato. Diad Residence C (agnanengneng ed sayan litrato), inggapo so pangiyan na drywall, tile, tan panagpinta.

Duaran mankikimey ya akalugan ed lift so mangipupuranis ed padir na vapor-permeable air barrier. Manga duay bulan so kaukolan pian naikdan na barrier so sakey ya residence building.

Ipapaalagey na saray mason so granite ya padir. Diad sayan parte na bilding so pangipasenan ed receiving dock tan nanduruman support services.

Sinalatan na sakey ya inupaan ya diver so daan ya valve diad Blue Lake. Diad sakey labat ya pindot, onatapew so danum ed lake pian ag-ondelap no walay bagyo.