1, 2. Dicon ta hopi importante pa nos cultiva fe? Splica esey cu un ilustracion.

FE. Un palabra chikito cu ta representa un cualidad hopi bunita. Pero ora nos ta papia di fe, ta bon pa nos conect’e mesora cu un otro palabra: “Urgente!” Pasobra si nos no tin fe, nos mester busca manera pa cultiv’e urgentemente. Anto si nos tin fe, ta urgente e ora ey pa nos proteh’e y aliment’e. Dicon?

² Supone cu bo ta crusando un desierto hopi grandi. Bo tin mester di awa urgentemente. Asina cu bo haya un poco awa, lo bo tin cu proteh’e contra solo pa e no seca. Pero tambe lo bo tin cu haya un manera pa keda yena bo boter di awa. Wel, awe nos ta biba den un desierto spiritual, si, den un mundo cu no ta interesa den adora Jehova, y caminda berdadero fe—mescos cu e awa—ta scars y ta seca di biaha si bo no proteh’e y keda yen’e of aliment’e. Nos tin mester di fe urgentemente, pasobra mescos cu nos no por sobrevivi sin awa, asina tambe nos relacion cu Jehova no por sobrevivi sin fe.—Rom. 1:17.

3. Con Jehova ta yuda nos fortalece nos fe, y kico ta dos cos importante cu nos mester haci?

³ Jehova sa cu nos tin mester di fe urgentemente, y e sa tambe con dificil ta awe pa cultiva fe y manten’e fuerte. Pesey el a duna nos ehempelnan cu nos por imita. Jehova a inspira apostel Pablo pa skirbi: “Imita esnan cu pa medio di fe y pasenshi ta ricibi loke Dios a priminti.” (Heb. 6:12) Pesey e organisacion di Jehova ta anima nos hopi pa haci nos best pa imita e ehempel di homber- y muhernan fiel, manera esnan cu nos a analisa den e buki aki. Pero kico mas nos mester haci despues di a analisa nan bida? Dos cos ta importante: (1) Sigui fortalece nos fe y (2) tene nos speransa bon cla na mente.

4. Kico ta mustra cu Satanas ta un enemigo di fe, pero dicon esey no mester spanta nos?

⁴ Sigui fortalece bo fe. E pio enemigo di fe ta Satanas, e gobernante di e mundo aki. El a comberti mundo den un tipo di desierto caminda ta dificil pa cultiva fe. Satanas ta hopi mas poderoso cu nos. Acaso nos mester tin miedo cu nos lo no por desaroya nos fe y fortalec’e? Claro cu no! Jehova, e Amigo di tur hende cu kier cultiva berdadero fe, ta sigura nos cu si E ta na nos banda, nos por opone Diabel y hasta pon’e huy for di nos! (Sant. 4:7) Nos ta resisti Diabel ora cu nos ta saca tempo tur dia pa cultiva y fortalece nos fe. Con asina?

5. Splica con e homber- y muhernan fiel menciona den Bijbel a cultiva fe.

⁵ Manera nos a mira, e homber- y muhernan fiel menciona den Bijbel no a nace cu fe. Nan  bida ta duna prueba cu fe ta un fruta di Jehova su spirito santo. (Gal. 5:22, 23) Nan tabata haci oracion pa pidi Jehova yuda nan, y cada biaha el a haci nan fe mas fuerte. Laga nos imita nan, y no lubida nunca cu Jehova gustosamente ta duna su spirito santo na hende cu ta pidie y cu ta actua na harmonia cu nan oracionnan. (Luc. 11:13) Kico mas nos por haci?

6. Con nos por saca e mayor beneficio for di e relatonan di Bijbel?

⁶ Den e buki aki nos a trata solamente un par di ehempel di personanan cu tabatin un fe remarcabel. Tin masha hopi mas! (Lesa Hebreonan 11:32.) For di cada un di e personahenan aki nos por siña hopi cos. Pues, ta bale la pena pa nos tuma tempo pa, hunto cu oracion, nos haci un estudio personal profundo di nan bida. Si nos ta djis lesa e relatonan tocante e personanan di fe aki aribariba, esey lo no ta suficiente pa fortalece nos fe manera mester ta. Pa beneficia plenamente di nos lesamento, nos tin cu tuma tempo pa considera e contexto y investiga e background di e relatonan di Bijbel. Si nos keda corda cu e homber- y muhernan imperfecto ey tabatin “mesun sintimentonan cu nos”, nan ehempel lo bira mas real pa nos. (Sant. 5:17) Nos lo por pone nos mes na nan luga y imagina con nan a sinti ora nan a enfrenta e mesun tipo di problema- y retonan cu nos tambe ta enfrenta awe.

7-9. (a) Con e homber- y muhernan di fe di tempo biblico lo a reacciona si nan tabatin cu adora Jehova na e manera cu nos ta hacie awe? (b) Dicon nos tin cu sigui fortalece nos fe cu obra?

⁷ Un otro manera cu nos por fortalece nos fe ta pa medio di e cosnan cu nos ta haci, pasobra Bijbel ta bisa cu “fe sin obra ta morto.” (Sant. 2:26) Djis imagina bo con contento e homber- y muhernan cu nos a analisa den e buki aki lo tabata si nan a haya e tarea di haci e trabou cu Jehova ta pidi nos haci awe.

⁸ Abraham, por ehempel, a uza altarnan simpel di piedra den desierto pa adora Jehova. Con bo ta kere Abraham lo a reacciona si Jehova a bis’e cu e por a rindi adoracion na dje hunto cu gruponan organisa di sirbidor di Jehova? Kico si e por a reuni hunto cu e rumannan ey den Salonnan di Reino agradabel y na congresonan grandi, caminda e promesanan cu el a mira “di aleu” ta ser analisa y splica detayadamente? (Lesa Hebreonan 11:13.) Anto Elias mester a ehecuta e profetanan malbado di Baal, mientras cu e tabata purba di sirbi Jehova bou di mando di un rey malbado y apostata. Con bo ta kere Elias lo a reacciona si Jehova a bis’e cu su tarea tabata pa haci bishitanan amical cerca e hendenan pa duna nan un mensahe di consuelo y speransa? Muy probablemente e homber- y muhernan di fe menciona den Bijbel lo no a duda mes pa acepta e oportunidad pa adora Jehova manera nos ta hacie awe.

⁹ Pues, laga nos sigui fortalece nos fe pa  medio di obra. Di e manera ey nos realmente ta imita e ehempel di e homber- y muhernan di fe cu nos ta lesa di dje den Dios su Palabra inspira. Manera e Introduccion a trece padilanti, mas y mas nos lo cuminsa mira nan como amigo. Y den futuro cercano nos lo biba hunto cu nan, y nan lo ta nos amigonan di berdad.

10. Ki goso nos lo sinti den Paradijs?

¹⁰ Tene bo speransa bon cla na mente. Homber- y muhernan fiel semper a haya fortaleza den e speransa cu Dios a duna nan. Abo tambe ta haya fortaleza for di esey? Por ehempel, pensa un rato riba ki dushi lo ta di por topa sirbidornan fiel di Dios ora nan lanta den e ‘resureccion di hende husto.’ (Lesa Echonan 24:15.) Bo a pensa caba riba algun pregunta cu lo bo kier haci nan?

11, 12. Den e mundo nobo, kico lo bo kier puntra (a) Abel? (b) Noe? (c) Abraham? (d) Ruth? (e) Abigail? (f) Ester?

¹¹ Por ehempel, lo bo ta ansioso pa puntra Abel con su mayornan tabata? Of lo bo kier puntr’e: “Bo a yega di papia cu e kerubinnan cu tabata vigila e entrada di Eden? Nan a contesta bo?” Kisas lo bo kier puntra Noe: “Bo tabatin miedo di e gigantenan? Con bo a cuida tur e bestianan ey den e arca henter un aña?” Y si bo topa Abraham, kisas lo bo por puntr’e: “Bo tabatin contacto cu Sem? Ken a siña bo tocante Jehova? Tabata dificil pa bay for di Ur?”

¹² Bo a pensa caba riba e preguntanan cu lo bo kier haci e muhernan fiel cu lo ser resucita? “Ruth, kico a convence bo pa bira un sirbidor di Jehova?” “Abigail, bo tabatin miedo di conta Nabal cu bo a yuda David?” “Ester, con a para cu abo y Mardokeo despues di loke nos a lesa den e relato di Bijbel?”

13. (a) Kico hende cu resucita kisas lo kier puntra bo? (b) Kico bo ta pensa di e speransa di topa cu homber y muher fiel di antiguedad?

¹³ Claro cu e homber- y muhernan fiel ey tambe lo tin masha hopi pregunta pa bo. Lo ta hopi emocionante pa conta nan tocante e periodo culminante di e ultimo dianan y con Jehova a bendiciona su pueblo durante e tempo dificil ey. Sin duda, nan lo keda hopi conmovi ora nan tende con Jehova a cumpli cu tur su promesanan. Den e mundo nobo, nos lo no tin nodo di uza nos imaginacion mas pa pensa con e sirbidornan leal di Dios cu ta ser menciona den Bijbel tabata. Nan lo ta hunto cu nos den Paradijs! Pesey, sigui haci bo best awor pa nan ta real pa bo. Sigui imita nan fe. E ora ey boso, como bon amigo, lo por sigui sirbi Jehova hunto pa semper!