LES 2
Rebeca Kier A Haci Jehova Contento
Rebeca tabata un mucha muher cu a stima Jehova. Su casa tabata yama Isaak. E tambe a stima Jehova. Con Rebeca cu Isaak a conoce otro? Con Rebeca a mustra cu e kier a haci Jehova contento? Ban lesa mas di nan dos.
Isaak tabata yiu homber di Abraham y Sara. Nan tabata biba na un pais cu tabata yama Canaan. E hendenan cu tabata biba eynan no tabata sirbi Jehova. Pero Abraham tabata kier pa su yiu casa cu un mucha muher cu si ta sirbi Jehova. Pesey el a manda un di su crianan, kisas Eliezer, pa busca un casa pa Isaak. El a pidie bay na un luga cu tabata yama Haran, caminda Abraham tabatin algun famia ta biba.
Rebeca tabata gusta traha. El a saca awa pa e camelnan
Eliezer a bay hunto cu mas cria di Abraham. Nan mester a cana, cana, bay hopi leu mes. Nan a bay cu dies camel carga cu cuminda y regalo. Con Eliezer por tabata sa cua mucha muher e tabatin cu scoge pa Isaak? Ora Eliezer y e otro crianan a yega Haran, nan a para na un pos pasobra Eliezer tabata sa cu un ora pa otro hende lo bin pa saca awa. El a haci oracion na Jehova y a bisa: ‘Si mi pidi un mucha muher duna mi awa anto e duna ami y mi camelnan tambe awa, e ora ey lo mi sa cu ta e mucha muher ey bo a scoge.’
Net e ora ey, un mucha muher a yega na e pos. Tabata Rebeca! Bijbel ta bisa cu e tabata hopi bunita. Ora Eliezer a pidie un tiki awa, Rebeca a bisa: ‘Sigur no! Mi ta bay saca awa pa abo y pa bo camelnan tambe.’ Bo sa, ora camel tin sed, nan ta bebe masha hopi awa mes. Esey kiermen cu Rebeca mester a keda core bay bin hopi biaha pa saca awa for di e pos. Wak e plachi. Bo ta mira con duro e ta traha?— Eliezer lo a keda boca habri ora el a mira con Jehova a contesta su oracion.
Eliezer a duna Rebeca hopi regalo bunita. Rebeca a invita Eliezer y e otro crianan pa bay cas di su tata. Eliezer a splica Rebeca su famia ta pakico Abraham a mand’e cerca nan y con Jehova a contesta su oracion. Rebeca su famia tabata contento pa e casa cu Isaak.
Rebeca a bay Canaan cu Eliezer y a casa cu Isaak
Pero, bo ta kere cu Rebeca mes kier a casa cu Isaak?— Rebeca tabata sa cu ta Jehova a manda Eliezer. Pesey, ora cu Rebeca su famia a puntr’e si e kier a bay Canaan y casa cu Isaak, el a bisa: ‘Si, mi kier bay.’ El a bay mesora cu Eliezer. Ora nan a yega Canaan, el a casa cu Isaak.
Door cu Rebeca a haci loke Jehova tabata kier, Jehova a haci cos bon p’e. Hopi aña despues, Hesus a nace di e famia di Rebeca! Si abo ta manera Rebeca y bo haci Jehova contento, e lo haci cos bon pa abo tambe.
