E prome 60 minuut di e bida di un baby pafo di e bariga di un mama ta un momento hopi crucial di ahuste pa e baby. Dicon? Pasobra mamanan cu forma un laso cu nan yiu recien naci durante e momento crucial aki ta mehora crecemento y desaroyo di nan yiunan masha hopi mes. *

Kico ta pone un mama cuida su baby recien naci cu hopi amor? Profesor Jeannette Crenshaw ta splica den The Journal of Perinatal Education cu e nivel halto di e hormoon cu yama oxitocina “ta stimula sintimentonan materno despues di parto ora e mama mishi, wak y cria su yiu recien naci na pecho.” Un otro hormoon cu e mama ta produci na e momento ey “ta yuda un mama pa forma un relacion cu su baby” y ta fortalece e relacion ey. Dicon esey ta asina importante?

Ta nos amoroso Creador, Jehova Dios, * a crea e laso intimo entre un mama cu su baby. Rey David a bisa cu ta Dios “a saca [e] for di bariga di [su] mama” y a pon’e sintie sigur den brasa di su mama. El a resa: “For di mi nacemento mi a wordo entrega na bo; for di den bariga di mi mama bo tabata mi Dios.”—Salmo 22:9, 10.

ALGO PA PENSA RIBA: Si Dios a crea un sistema asina complica pa haci sigur cu un mama humano lo ta pendiente di e necesidadnan di su yiuchi y satisface esakinan cu hopi amor, no ta logico cu Dios lo mustra interes den cada un di nos cu ta “descendiente di Dios”?—Echonan 17:29.

Hesucristo, kende conoce e Creador mas mihor cu tur hende, a siña nos: “No ta pa un cen preto nan ta bende dos mofi? Sinembargo, ni un di nan lo no cay na suela sin cu boso Tata sa. Pa loke ta boso, el a conta hasta e drachinan di cabey riba boso cabes. Pues, no tene miedo: boso ta bal mas cu hopi mofi.”—Mateo 10:29-31.

Masha poco di nos ta presta atencion na cada paharito cu nos mira, corda pa nos ripara ki ora un di nan ta cay na suela. Pero nos Tata celestial si sa ora cada un di nan ta cay. Y den Dios su bista hamas ni un paharito, ni yen di paharito, ta bal mas  cu un hende. Pues, e les cu nos ta siña ta bon cla: Bo no mester “tene miedo” nunca cu Dios no ta worry cu bo. Al contrario, e ta sumamente interesa den bo.

Bijbel ta sigura nos:

• “E wowonan di SEÑOR ta tur caminda, vigilando malo y bon.”—PROVERBIONAN 15:3.

• “E wowonan di SEÑOR ta riba e hustonan, y su horeanan ta atento pa scucha nan sclamacion.”—SALMO 34:15.

• “Lo mi regociha y keda contento den bo misericordia, pasobra bo a mira mi afliccion; bo tabata sa di e angustianan di mi alma.”—SALMO 31:7.

Si nos sa cu Dios ta hopi interesa den nos bienestar y ta cuida nos cu yen di amor, esey lo haci un diferencia den nos bida? Sigur cu si, manera Hannah, * di Inglatera, ta splica:

“Masha hopi biaha mi tabata pensa cu Jehova no ta stima mi y cu e no ta contesta mi oracionnan pasobra mi tabata falta fe. Mi tabata pensa cu Dios ta castiga mi y no ta worry cu mi pasobra mi no ta importante. Mi tabata sinti cu Dios no ta interesa den mi.”

Pero awor si Hannah no ta duda mas cu Jehova ta pendiente di dje y ta stim’e. Dicon su punto di bista a cambia? Hannah a splica: “Mi no a cambia di awe pa mañan. Mi ta corda cu hopi tempo pasa un discurso di Bijbel tocante e sacrificio di rescate di Hesus a haci un impacto grandi riba mi. E discurso a convence mi cu Jehova ta stima mi. Y ora mi oracionnan a ser contesta, hopi biaha mi tabata yora pasobra mi por a mira cu Jehova ta stima mi. Ademas, mi estudio di Bijbel y e reunionnan cristian a siña mi mas tocante Jehova, su personalidad y kico e ta sinti pa nos. Awor mi ta mira cla cla cu Jehova ta sostene nos y stima nos tur y cu e ta masha deseoso pa cuida cada un di nos.”

Loke Hannah a bisa ta hopi animante. Pero con bo por tin sigur cu Dios ta compronde nos y cu nos sintimentonan ta importante p’e? E siguiente articulo lo contesta e pregunta ey.