Dios a duna nos un regalo unico—e habilidad di comunica cu ne y expresa nos sintimento den oracion. Profeta David a pidi Dios den oracion: “Abo cu ta scucha oracion, cerca bo tur hende ta bin.” (Salmo 65:2) Pero con nos por haci oracion di tal manera cu Dios ta scucha nos y bendiciona nos?

Salmo 62:8 ta bisa: “Drama [bo] curason” dilanti Dios. Ora nos haci oracion na Dios, nos por expresa nos sintimentonan di mas profundo. E Todopoderoso ta balora nos oracionnan cu nos ta haci di curason.

Dios tin hopi titulo, manera Allah, Creador y Señor. Pero e tin solamente un nomber personal. “Ami ta Jehova. Esey ta mi nomber.” (Isaias 42:8, NW) E nomber di Jehova ta aparece mas o menos 7.000 biaha den e Santo Scritura. Hopi profeta a uza Dios su nomber personal. Abraham a bisa: “Jehova, por fabor, ... laga mi sigui papia [cu bo].” (Genesis 18:30, NW) Anos tambe mester uza Dios su nomber, Jehova, ora nos haci oracion.

Dios ta compronde nos pensamento- y sintimentonan sin importa ki idioma nos ta papia. Su Palabra ta sigura nos: “Dios no ta haci distincion di persona, sino cu e ta acepta tur hende di tur nacion cu ta tem’e y cu ta haci loke ta corecto.”—Echonan 10:34, 35.

Pero pa nos haya Dios su bendicion, no ta oracion so nos mester haci. Den e siguiente articulonan, nos lo bay wak kico mas nos mester haci.