SARA a caba di traha, el a lanta para y wak leu. E tabata un muher sabi y su sirbientenan tabata traha duro y contento bou di su guia. Pero, Sara tambe tabata haci su parti. Imagina bo con mientras e tabata wak leu, e tabata duna su mannan masashi pa suavisa e dolor. Podise e tabata druk ta cose un pida paña pa lapi un scheur cu tabatin na nan tent, nan hogar. Despues di tanto aña, e tela diki di lana di cabrito di e tent a gasta debi na solo y awasero, loke sigur a pone Sara corda cu nan tabatin hopi tempo ta biba como nomada. Solo a cuminsa baha, y e rayonan di luz a cuminsa bira oraño. Mainta el a wak Abraham * bay y awor cu anhelo e tabata wak den mesun direccion, sperando riba dje. Su bunita cara a cuminsa briya y el a smile ora el a reconoce su esposo di leu riba un serito den cercania.

Ya un decada a pasa cu Abraham a crusa Riu Eufrates y bay cu su famia y grupo grandi di sirbiente na Canaan. Aunke nan no tabata sa unda nan tabata bay, Sara di buena gana a apoya su casa riba e biahe aki como cu e tabata sa cu su casa lo a hunga un papel importante den Jehova su proposito di produci un descendiente sumamente bendiciona y un nacion. Pero ki papel Sara lo a hunga? E tabata steriel, y awor e tabatin 75 aña. Kisas el a puntra su mes: Con Jehova su proposito lo cumpli mientras cu ta ami ta casa di Abraham? Ta di compronde cu e por tabata preocupa, of hasta por a perde pasenshi.

Kisas nos tambe ta puntra nos mes na ki tempo Dios su promesanan lo cumpli. Nos por perde pasenshi facilmente, vooral si nos ta wardando riba un promesa cu nos ta anhela pa cumpli. Pues, kico nos por siña for di e fe fuerte aki di Sara?

E famia a caba di sali for di Egipto. (Genesis 13:1-4) Nan tabata campa den e seronan halto oost di e stad Betel, of Luz, manera e Cananeonan tabata yam’e. Sara por a mira gran parti di e Tera Priminti for di e luga halto ey. Eynan tabatin pueblitonan Cananeo y camindanan cu a hiba biaheronan na teranan leu. Pero, esakinan no tabata nada na comparacion cu Sara su tera natal. El a lanta den Ur, un stad di Mesopotamia cu tabata keda 1.900 kilometer leu. El a bay laga hopi miembro di su famia, hopi comodidad di un stad prospero cu tabatin mercado y bazarnan, su cas confortabel cu muraya y dak y cu kisas hasta tabatin un sistema di tuberia di awa. Pero, si nos ta pensa cu Sara tabata wak den direccion oost cu tristeza riba su cara, pensando riba e comodidadnan di su tera natal, e ora ey nos no conoce e señora devoto aki.

Tuma nota kico apostel Pablo a skirbi bou di inspiracion mas o menos 2.000 aña despues. El a bisa tocante e fe di Sara cu Abraham: “Si di berdad nan a keda corda riba e luga for di unda nan a sali, nan lo tabatin oportunidad pa bay bek.” (Hebreonan 11:8, 11, 15) Ni Sara ni Abraham no a sinti nostalgia. Si nan a anhela e cosnan di pasado,  nan lo por a dicidi di bay bek. Sinembargo, si nan a bay bek, nan lo a perde e privilegio remarcabel cu Jehova tabatin pa nan. Y nan sigur lo a pasa pa olvido en bes di a bira un ehempel di fe fuerte cu a touch curason di miyones di hende.

En bes di wak pasado, Sara a wak futuro. Pesey el a sigui apoya su esposo durante su biahe den e pais, a yud’e desarma tent, muda cu e tou y bolbe arma tent. Pero ainda e tabatin cu enfrenta otro prueba- y cambionan. Jehova a bolbe confirma su promesa na Abraham, pero ainda e no a menciona nada di Sara.—Genesis 13:14-17; 15:5-7.

Awor, Sara a haya cu tabata tempo p’e papia cu Abraham tocante un plan cu e tabatin na mente. Imagina con su cara tabata cambia segun cu e tabata bisa: “Awor mira, SEÑOR no a laga mi haya yiu.” Despues el a pidi su casa pa haya yiu cu su cria, Agar. Bo por imagina bo con dificil lo tabata pa Sara pidi su casa algo asina? Awe, esaki por parce algo straño, pero den antiguedad no tabata nada straño pa un homber tuma un di dos casa, of un concubina, pa asina e produci un descendiente. * Bo ta kere cu kisas Sara a haci e peticion ey pasobra el a pensa cu di e manera ey Dios su proposito di produci un nacion pa medio di Abraham su descendiente lo a cumpli? En todo caso, e tabata dispuesto pa haci un sacrificio dificil. Con Abraham a reacciona? Nos ta lesa cu el “a scucha bos di [Sara].”—Genesis 16:1-3.

Acaso e relato kier laga nos compronde cu Jehova a anima Sara pa pidi Abraham algo asina? No. Mas bien, loke el a pidi ta revela cu e tabatin un punto di bista humano. El a kere cu ta Jehova a causa su problemanan, y e no por a imagin’e cu Dios lo por tabatin un otro solucion. Sara su solucion lo a trece dolor y problema p’e mes. Asina mes su idea a demostra cu e no tabata egoista. Den un mundo caminda mayoria di biaha hende ta pone nan mes interes prome cu tur otro cos, Sara su spirito di sacrificio propio ta sobresali, no ta berdad? Nos lo imita Sara su fe si nos ta dispuesto pa pone Dios su proposito prome cu nos propio interesnan.

No mucho tempo despues Agar a sali na estado. Awor cu e tabatin un yiu di Abraham den su bariga, kisas el a sinti cu e tabata mas importante cu Sara, y pesey a cuminsa despreci’e. Esey tabata un golpi duro pa Sara cu no por a haya yiu. Sara, cu permit di Abraham y cu e apoyo di Dios, a scual Agar na un manera cu Bijbel no ta revela. E añanan a bula bay despues cu Agar a duna luz na su yiu homber, Ismael. (Genesis 16:4-9, 16)  E siguiente biaha cu e relato ta menciona cu nan a haya un mensahe for di Jehova, Sara ya tabatin 89 aña y Abraham 99 aña. Anto esta un mensahe increibel esaki tabata!

Un biaha mas Jehova ta priminti su amigo Abraham cu lo E multiplica su descendiente. Ademas, Dios a cambia su nomber. Te na e momento ey, e tabata conoci como Abram. Pero Jehova a dun’e e nomber Abraham, cu ta nifica “tata di hopi nacion.” Y awor pa prome bes, Jehova a papia di e papel cu Sara lo tabatin den cumplimento di su proposito. Jehova a cambia su nomber Sarai, cu kisas ta nifica algo manera “pleitista”, (NW) y yam’e Sara, e nomber cu nos conoce mihor. Kico e nomber Sara ta nifica? E ta nifica “prinsesa.” (Wak nota na Genesis 17:15, BPK.) Jehova a splica dicon el a scoge e nomber ey pa e señora stima aki, ora el a bisa Abraham: “Lo Mi bendishon’é i pa medio di dje lo Mi duna bo un yu hòmber; sí, lo Mi bendishon’é i lo e bira mama di hopi nashon. Asta lo tin rei den su desendientenan.”—Genesis 17:5, 15, 16, BPK.

Jehova su pacto di produci un descendiente cu lo a bendiciona tur nacion lo a cumpli mediante e yiu homber di Sara. E nomber cu Dios a scoge pa e yiu tabata Isaak, cu ta nifica “e ta hari.” Na prome instante, ora Abraham a tende di Jehova su proposito pa bendiciona Sara cu un yiu di su mes, Abraham “a tira su curpa abou cu su cara te na suela y a hari.” (Genesis 17:17) E tabata asombra y masha contento. (Romanonan 4:19, 20) Y kico di Sara?

No mucho tempo despues, tres homber stranhero a bin na e tent di Abraham. Aunke nan a yega den higra di solo, e pareha biehito aki mesora a pura pa yama nan bishitantenan bonbini. Abraham a bisa Sara: “Haci lihe, prepara tres midi di hariña fini, mans’e, y traha pan.” Den antiguedad, mustramento di hospitalidad a encera hopi trabou. Abraham no a laga tur e trabou pa su casa y a pura pa mata un toro jong y prepara mas cuminda y bibida. (Genesis 18:1-8) E “hombernan” aki a resulta di ta angel di Jehova. Muy probablemente, apostel Pablo tabatin e suceso aki na mente ora el a skirbi: “No lubida di mustra hospitalidad, pasobra pa medio di esey, algun, sin cu nan tabata sa, a ricibi angel como huesped.” (Hebreonan 13:2) Abo por imita e excelente ehempel di hospitalidad di Abraham cu Sara?

Ora un di e angelnan a ripiti e promesa di Dios na Abraham cu Sara lo a duna luz na un yiu homber, Sara tabata for di nan bista den su tent ta scucha. E idea di duna luz na su edad a parc’e asina straño cu e no por a yuda, y el a hari den su mes, bisando: “Awor cu mi a bira bieu, lo mi tin placer, mi esposo siendo bieu tambe?” E angel a haci Sara un pregunta cla y raspa pa corigie: “Por tin algo cu ta mucho dificil pa SEÑOR?” E manera cu Sara a reacciona tabata manera cualkier hende lo a reacciona; e tabatin miedo y kier a defende su mes. El a responde: “Mi no a hari.” E angel a contest’e: “No, ma bo a hari si!”—Genesis 18:9-15.

E echo cu Sara a hari a demostra cu e tabata falta fe? No, di ningun manera. Bijbel ta bisa: “Pa medio di fe tambe Sara a ricibi poder pa concebi descendiente, hasta ora el a pasa e edad di haya yiu, ya cu el a considera cu esun cu a haci e promesa ta fiel.” (Hebreonan 11:11) Sara tabata conoce Jehova y tabata sa cu Jehova por cumpli cu cualkier promesa cu e haci. Nos tur mester di un fe fuerte asina. Pues nos lo haci bon di siña conoce e Dios cu Bijbel ta papia di dje mihor. Ora nos haci esey, nos lo mira cu Sara tabatin bon motibo pa confia den Dios. Jehova di berdad ta fiel y ta cumpli cu tur promesa cu e haci. Anto tin biaha, e por haci esey na un manera cu lo sorprende nos y pone nos hari.

Cu 90 aña di edad, porfin Sara por a disfruta di e momento cu el a spera riba dje henter su bida. El a duna luz na un yiu homber pa su esposo, kende  ya tabatin 100 aña. Abraham a yama e baby Isaak, of “e ta hari”, net manera Dios a bisa. Nos por imagina con Sara, cansa pero cu un smile di horea pa horea riba su cara, a bisa: “Dios a haci mi hari; tur hende cu tende lo hari hunto cu mi.” (Genesis 21:6) E regalo milagroso aki di Jehova sigur a haci Sara contento pa resto di su bida. Pero tambe el a trece responsabilidadnan grandi p’e.

Tempo Isaak tabatin cinco aña di edad, e famia a tene un fiesta pa celebra e echo cu el a kita for di pecho. Pero no ta tur cos a cana bon. Nos ta lesa cu Sara “a mira” un problema cu a sigui persisti. Ismael, Agar su yiu di 19 aña, tabata tenta e chikitin Isaak. Anto esaki no tabata djis pa pret. Despues apostel Pablo, bou di inspiracion, a yama loke Ismael a haci un persecucion. Sara a mira e tentamento aki pa loke e tabata: un menasa serio contra bienestar di su yiu. Sara tabata sa bon bon cu Isaak tabata mas cu djis su yiu; e tabatin un papel importante den e proposito di Jehova. Pues Sara a tuma un curashi pa papia cu Abraham sin draai rond di e asunto. El a pidi Abraham pa manda Agar y Ismael bay.—Genesis 21:8-10; Galationan 4:22, 23, 29.

Con Abraham a reacciona? Nos ta lesa: “E  asunto a duel Abraham masha pa motibo di su yiu homber.” Abraham tabata stima Ismael y su amor di tata a pone cu e no por a mira mas aya di e asunto. Pero Jehova si a mira e asunto bon cla y pesey el a interveni. Nos ta sigui lesa: “Ma Dios a bisa Abraham: ‘No tene duele pa motibo di e mucha ni pa motibo di bo cria; kico cu Sara bisa bo, scuch’e, pasobra ta door di Isaak bo descendientenan lo wordo conta.’” Jehova a sigura Abraham cu e lo a percura pa Agar y su yiu, y fiel Abraham a obedec’e.—Genesis 21:11-14.

Sara tabata un bon casa pa Abraham, esta, un bon compañera p’e. E no a djis bisa su casa loke cu e kier a tende. Ora Sara a mira un problema, algo importante cu por tabatin un efecto riba e famia y nan futuro, el a papia francamente cu su esposo. Nos no mester mira su frankesa como un falta di respet. Eigenlijk, despues apostel Pedro, kende tambe tabata casa, a referi na loke Sara a haci como un ehempel excelente di un esposa cu a mustra respet profundo pa su esposo. (1 Corintionan 9:5; 1 Pedro 3:5, 6) En realidad, si Sara a keda keto tocante e asunto ey, lo el a falta respet pa Abraham, pasobra esey lo por a trece consecuencianan grave pa Abraham y henter e famia. Cu amor Sara a bisa loke mester a ser bisa.

Hopi esposa ta balora Sara su bunita ehempel. For di dje nan ta siña con pa comunica habri y respetuosamente cu nan casa. Tin biaha, algun esposa kisas ta desea pa Jehova interveni manera el a haci den caso di Sara. Asina mes, nan ta siña for di Sara su fe fuerte, amor y pasenshi.

Aunke Jehova mes a yama e señora stima aki “prinsesa”, Sara no a exigi un trato special. Pesey, no ta nada straño cu tempo el a muri na edad di 127 aña, Abraham a “tene rouw pa Sara y [a] yor’e.” * (Genesis 23:1, 2) E tabata sinti hopi falta di su “prinsesa” stima. Sin duda, Jehova Dios tambe ta sinti falta di e señora fiel aki y tin tur intencion pa resucit’e den paradijs riba Tera. Tanto Sara como tur hende cu ta imita su fe, lo haya felicidad, paz y bida eterno.—Juan 5:28, 29.