Pronto Lo No Tin Odio Mas!
Hasta si nos logra saca odio for di nos mes curason, nos no por forsa otro hende pa haci mescos. Pesey, hende inocente lo sigui ta victima di odio. Pues, ta ken por caba cu odio pa semper?
Ta Jehova Dios so por caba cu odio pa semper. Y esey ta exactamente loke Bijbel ta priminti cu Dios lo haci.—Proverbionan 20:22.
DIOS LO ELIMINA TUR LOKE TA CAUSA ODIO
-
1. SATANAS E DIABEL. Ta Satanas ta responsabel pa e odio cu nos ta mira awe. Dios lo destrui Satanas y tur esnan cu mescos cu ne ta odia otro hende.—Salmo 37:38; Romanonan 16:20.
-
2. SATANAS SU MUNDO MALBADO. Dios lo caba cu tur loke cu ta promove odio, incluso politiconan corupto y lidernan religioso cu ta promove odio. Ademas, Dios lo elimina e sistema comercial cu ta golos y cu ta probecha di hende.—2 Pedro 3:13.
-
3. IMPERFECCION DI HENDE. Bijbel ta splica cu tur hende a hereda imperfeccion, esta, e tendencia di pensa, sinti y haci loke ta robes. (Romanonan 5:12) E tendencia pa odia otro hende ta un di e sintimentonan robes cu imperfeccion ta causa. Dios lo yuda nos elimina tur e pensamento- y sintimentonan robes ey, y e ora ey lo no tin odio mas.—Isaias 54:13.
BIJBEL TA PRIMINTI UN MUNDO SIN ODIO
-
1. LO NO TIN INHUSTICIA MAS. E Reino di Dios, un gobierno husto den cielo, lo goberna riba Tera pa semper. (Daniel 2:44) Lo no tin prehuicio ni intolerancia mas. Dios lo caba cu tur inhusticia cu hende ta enfrentando awor.—Lucas 18:7.
-
2. TUR HENDE LO BIBA NA PAZ. Ningun hende lo no sufri pa motibo di violencia of guera. (Salmo 46:9) Como cu tur hende riba Tera lo ta pacifico, Tera lo ta un luga safe pa biba.—Salmo 72:7.
-
3. TUR HENDE LO BIBA DEN CONDICION PERFECTO. Tur hende riba Tera lo demostra amor berdadero na otro. (Mateo 22:39) Nada lo no pone hende sufri mas; hende lo no sinti nan tristo mas pa motibo di pensamento- of recuerdonan doloroso. (Isaias 65:17) Den e tempo ey, lo no tin odio mas, y hende “lo deleita nan mes den paz abundante.”—Salmo 37:11.
Abo lo tin gana di biba den un mundo asina? For di awor, principionan di Bijbel ta yudando hende vence odio. (Salmo 37:8) Esey ta loke miyones di testigonan di Jehova rond mundo ta haciendo. Aunke nan ta bin for di diferente cultura y background, nan ta manera un famia uni cu ta stima otro.—Isaias 2:2-4.
Testigonan di Jehova lo ta contento pa yuda otro hende haya sa con nan ta trata cu inhusticia y discriminacion. Loke bo siña por yuda bo tiki tiki pa reemplasa bo odio pa amor. Bo por siña con pa trata tur hende bon—hasta hende cu por parce di ta malagradecido of yen di odio. Como resultado, lo bo ta feliz for di awor, y bo amistad cu otro hende lo bira mas mihor. Y e parti mas importante ta cu lo bo siña con pa biba bou di Dios su Reino cu lo caba cu odio pa semper.—Salmo 37:29.
You May Also Like
E TOREN DI VIGILANCIA
Kico e Reino di Dios Lo Logra?
Hesus tabata sa cu e Reino di Dios ta e unico gobierno cu por resolve e problemanan cu tin riba Tera. Kico e Reino a haci caba cu ta duna nos e confianza ey?
SPIERTA!
Con Prehuicio Por Ser Elimina?
Kico ta cuater cos cu e Reino di Dios lo haci pa elimina prehuicio?
