E Palabra di Jehova Ta Bibo

Puntonan Sobresaliente di e Buki di Jeremias

E CATASTROFNAN cu Jeremias a proclama pa su mes pueblo lo mester a parce horibel y spantoso! E tempel glorioso cu a fungi como centro di adoracion pa mas cu tres siglo lo a ser kima te na suela. E stad di Jerusalem y e tera di Juda lo a keda desola, nan habitantenan hiba preso. Un registro di e proclamacionnan di huicio aki y otronan mas nos ta haya den e di dos buki mas grandi di Bijbel, e buki di Jeremias. E buki ta conta tambe loke Jeremias personalmente a pasa aden segun cu el a cumpli fielmente cu su ministerio pa 67 aña largo. E informacion den e buki ta den orden di topico, no orden cronologico.

Dicon e buki biblico di Jeremias mester interesa nos? Su profesianan cu a cumpli ta fortifica nos fe den Jehova como Esun cu ta cumpli cu su promesanan. (Isaias 55:10, 11) Den nos tempo tin similaridadnan cu Jeremias su trabou como profeta y cu e pueblo su reaccion riba su mensahe. (1 Corintionan 10:11) Es mas, e registro di e manera cu Jehova a trata cu su pueblo ta resalta Jehova su cualidadnan y lo mester tin un efecto profundo riba nos.​—Hebreonan 4:12.

“MI PUEBLO A COMETE DOS ECHO DI MALDAD”

(Jeremias 1:1–20:18)

Jeremias a ricibi su encargo como profeta den e di 13 aña di e reinado di Josias, Rei di Juda, y 40 aña prome cu e destruccion di Jerusalem na aña 607 prome cu nos era. (Jeremias 1:1, 2) E proclamacionnan cu Jeremias a haci principalmente durante e ultimo 18 añanan di e reinado di Josias, a saca na cla e maldad di Juda y a anuncia Jehova su huicionan contra Juda. Jehova a declara: “Lo mi haci Jerusalem un monton di ruina ... y lo mi haci e stadnan di Juda un desolacion, sin habitante.” (Jeremias 9:11) Dicon? Jehova di: “Pasobra mi pueblo a comete dos echo di maldad.”​—Jeremias 2:13.

E mensahe a trata tambe e restauracion di un resto arepenti. (Jeremias 3:14-18; 12:14, 15; 16:14-21) Sinembargo, e mensahero no a haya un bon acohida. ‘E oficial principal den e cas di Jehova’ a bati Jeremias y a pon’e den sepa henter anochi.​—Jeremias 20:1-3.

Contesta Riba Pregunta Biblico:

1:11, 12, NW​—Dicon e echo cu Jehova ta keda lanta en conexion cu su palabra ta ser liga cu “un spruit di palo di almendra”? “Despues di winter e palo di almendra ta esun cu ta florece prome cu tur.” (Versiculo 11, BPK, nota na pia di pagina) Den sentido figurativo,  Jehova a sigui ‘lanta tur dia tempran y manda’ su profetanan pa spierta su pueblo tocante su huicionan y tabata “keda lanta” te na nan cumplimento.​—Jeremias 7:25.

2:10, 11, NW​—Kico a haci e echonan di e Israelitanan infiel asina inusual? Aunke e nacionnan pagano di Kitim cu tabata situa den west y esnan di Kedar situa den oost kisas a trece diosnan di otro nacionnan pa agrega na esnan di nan mes, e idea di remplasa nan diosnan completamente pa diosnan stranhero tabata un cos inusual. Sinembargo, e Israelitanan a bandona Jehova; nan a pone e gloria di e Dios bibo un banda pa duna gloria na diosnan falso sin bida.

3:11-22; 11:10-12, 17​—Dicon Jeremias a inclui e reino di dies tribu di noord den su declaracionnan formal, a pesar cu Samaria a cai na aña 740 prome cu nos era? Pasobra e destruccion di Jerusalem na aña 607 tabata un expresion di Jehova su huicio contra henter e nacion di Israel, no contra Juda so. (Ezekiel 9:9, 10) Ademas, despues di caida di e reino di dies tribu, Jerusalem a sigui representa e interesnan​—of prospecto pa restauracion​—di e reino ei, ya cu e mensahenan di e profetanan di Dios a sigui inclui e Israelitanan.

4:3, 4​—Kico e mandamento aki ta nifica? Hudiunan infiel tabatin cu prepara, suavisa y limpia e tera di nan curason. Nan tabatin cu “circuncida” nan curason, es decir, kita tur pensamento, sintimento y motivacion impuro. (Jeremias 9:25, 26; Echonan 7:51) Esaki a rekeri un cambio den estilo di bida, esta, stop di haci loke tabata malo y bai haci loke a trece e bendicion di Dios.

4:10; 15:18​—Den ki sentido Jehova a gaña su pueblo rebelde? Den tempo di Jeremias, tabatin profeta “ta profetisa cu engaño.” (Jeremias 5:31; 20:6; 23:16, 17, 25-28, 32) Jehova no a stroba nan di proclama mensahenan engañoso.

16:16​—Kico Jehova tabata kiermen cu e “ta bai manda busca hopi piscado” y “hopi yagdo”? Esaki kisas a referi na manda ehersitonan enemigo pa busca Hudiunan infiel riba ken Jehova lo a ehecuta su huicio. Sinembargo, en bista di loke Jeremias 16:15 ta declara, e versiculo lo por ta referi tambe na busca pa haya e Israelitanan arepenti.

20:7, NW​—Den ki manera Jehova a ‘uza su forsa’ contra Jeremias y a gañ’e? Como cu Jeremias a confronta apatia, rechaso y persecucion ora e tabata proclama e huicionan di Jehova, lo e por a sinti cu e no tabatin e forsa pa sigui padilanti. Sinembargo, Jehova a uza su forsa contra e inclinacion ei di Jeremias y a dun’e e poder pa sigui padilanti. Pues Jehova a gaña of nek Jeremias dor di uz’e pa haci loke e profeta mes a pensa cu lo e no por a haci.

Les pa Nos:

1:8. Tin biaha Jehova sa libra su pueblo for di persecucion, podise dor di lanta huesnan imparcial, dor di remplasa oficialnan hostil pa oficialnan mas rasonabel of dor di duna su adoradonan e fortalesa pa persevera.​—1 Corintionan 10:13.

2:13, 18. Israelitanan infiel a comete dos echo di maldad. Nan a bandona Jehova, e fuente sigur di bendicion, guia y proteccion. Y nan a bai coba nan propio rembaknan figurativo dor di purba sera aliansanan militar cu  Egipto y Asiria. Den nos tempo, si un hende bandona e Dios berdadero na fabor di filosofia- y teorianan humano y politica mundano ta mescos cu remplasa “e fuente di awa bibo” pa “rembak kibra.”

6:16. Jehova a urgi su pueblo rebelde pa para keto un rato, samina nan mes y bolbe na “e bereanan” di nan antepasadonan fiel. Acaso nos no mester samina nos mes tempo tempo pa wak si realmente nos ta canando den e caminda cu Jehova kier pa nos cana?

7:1-15. E echo cu e Hudiunan a pone nan confiansa den e tempel, y a mir’e como un sorto di amulet protectivo, no a salba nan. Nos mester cana pa medio di fe, no pa medio di bista.​—2 Corintionan 5:7.

15:16, 17. Mescos cu Jeremias, nos por lucha contra desanimacion. Nos por haci esei dor di haya placer den estudio personal di Bijbel significativo, dor di halsa e nomber di Jehova den e trabou di predica y siña hende y dor di evita mal asociacion.

17:1, 2. E picanan di e pueblo di Juda a haci nan sacrificionan desagradabel pa Jehova. Impuresa moral ta haci nos sacrificionan di alabansa inaceptabel.

17:5-8. Hende y institucionnan ta merece nos confiansa solamente te na e grado cu nan ta actua na harmonia cu e boluntad di Dios y cu principionan biblico. Pa loke ta trata asuntonan manera salbacion y berdadero pas y siguridad, lo ta sabi di nos parti pa pone nos confiansa solamente den Jehova.​—Salmo 146:3.

20:8-11. Nos no mester laga indiferencia di hende, oposicion of persecucion fria nos entusiasmo pa e trabou di predica e Reino.​—Santiago 5:10, 11.

“PONE BOSO NEK BOU DI E YUGO DI REI DI BABILONIA”

(Jeremias 21:1–51:64)

Jeremias a proclama huicio contra e ultimo cuater reinan di Juda y tambe contra e profetanan falso, e wardadonan iresponsabel y e sacerdotenan corupto. Referiendo na e resto fiel como bon figo, Jehova a bisa: “Mi bista lo ta fiha riba nan pa bon.” (Jeremias 24:5, 6) Tres profesia den capitulo 25 ta resumi e huicionan cu e capitulonan despues ta splica mas detayadamente.

E sacerdotenan y e profetanan a traha un complot pa mata Jeremias. Su mensahe tabata cu nan tin cu sirbi rei di Babilonia. Jeremias a bisa Rei Sedekias: “Pone boso nek bou di e yugo di rei di Babilonia.” (Jeremias 27:12) Sinembargo, “Esun cu a plama Israel lo recoh’e.” (Jeremias 31:10) Jehova a haci un promesa na e Recabitanan debi na nan fieldad. Rei a laga “sera Jeremias den e plenchi di e guardianan.” (Jeremias 37:21) Jerusalem a ser destrui, y mayoria di su habitantenan a ser hiba preso. Jeremias y su secretario, Baruk, tabata entre un grupo chikito di hende cu no a ser hiba preso. A pesar di e spiertamento di Jeremias pa nan no bai Egipto, e grupo morto spanta ei a bai toch. Capitulonan 46 pa 51 ta relata e mensahe cu Jeremias a papia relaciona cu e nacionnan.

Contesta Riba Pregunta Biblico:

22:30​—E decreto aki a anula Hesucristo su derecho di subi e trono di David? (Mateo 1:1, 11) No, e no a hacie. E decreto a prohibi cualkier descendiente di Joakim di “sinta riba trono di David ... na Juda.” Hesus lo mester a goberna for di shelo, no for di un trono na Juda.

 23:33, NW​—Kico ta “e carga di Jehova”? Den tempo di Jeremias, e declaracionnan formal y importante cu e profeta a expresa relaciona cu e destruccion di Jerusalem tabata un carga pa su paisanonan. Pero e pueblo cu no a presta atencion, na su turno, tabata asina un carga pa Jehova cu lo el a rechasa nan. Den e mesun manera, e mensahe biblico relaciona cu e benidero destruccion di cristiandad ta un carga pa cristiandad, y e hendenan cu no ta haci caso di e mensahe ta un carga pisa pa Dios.

31:33​—Den ki sentido e lei di Dios ta skirbi riba curason? Ora un persona ta stima e lei di Dios asina tanto cu e tin e deseo ferviente di haci e boluntad di Jehova, nos por bisa cu e lei di Dios ta skirbi riba su curason.

32:10-15​—Cu ki proposito a traha dos documento di e mesun transaccion? E documento cu a keda habri tabata pa consulta. E documento seya a fungi como reserva pa verifica e exactitud di esun habri si tabata necesario. Jeremias a pone un ehempel pa nos ora cu el a sigui proceduranan legal rasonabel asta ora a trata di un famia di dje y un compañero di fe.

33:23, 24​—Ta di cua “dos famianan” e versiculonan aki ta papia? Uno ta e famia real mediante e descendencia di Rei David, y e otro ta e famia sacerdotal di e descendientenan di Aaron. E destruccion di Jerusalem y di e tempel di Jehova a laga parce cu Jehova a rechasa e dos famianan aki y cu lo e no tin un reino riba Tera mas ni lo a rebiba su adoracion.

46:22​—Dicon e bos di Egipto ta ser compara cu e zonido di un colebra? Esaki kisas a referi na e zonido di Egipto ora e tabata bati retirada despues di a sufri un derota den bataya. E por ta referi tambe na e stem suak di e nacion debi na un of otro desaster cu el a experencia. E comparacion ta mustra tambe cu tabata en vano cu e Faraonan Egipcio tabatin un imagen di e colebra sagrado riba nan corona, supuestamente pa haya proteccion di Uatchit, e diosa colebra.

Les pa Nos:

21:8, 9; 38:19. Asta na ultimo ora, Jehova a duna e habitantenan no arepenti di Jerusalem e chens di scohe, aunke cu nan a merece di muri. Si, Jehova “su misericordianan ta grandi.”​—2 Samuel 24:14; Salmo 119:156.

31:34. Ta un gran consuelo di sa cu ora Jehova pordona hende, e no ta bolbe corda riba nan picanan y tuma accion contra nan den futuro.

38:7-13; 39:15-18. Jehova no ta lubida nos sirbishi fiel, cu ta ensera “sirbi e santonan.”​—Hebreonan 6:10.

45:4, 5. Mescos cu tabata e caso durante e ultimo dianan di Juda, “e ultimo dianan” di e actual sistema di cosnan no ta tempo pa nos busca “cosnan grandi”, manera rikesa, prominencia of siguridad material.​—2 Timoteo 3:1; 1 Juan 2:17.

JERUSALEM NA CANDELA

(Jeremias 52:1-34)

Tabata aña 607 prome cu nos era. Sedekias tabata den e di 11 aña di su reinado. Rei Nabucodonosor di Babilonia a sitia Jerusalem durante e ultimo 18 lunanan. Riba e di shete dia di e di cinco luna di e di 19 aña di reinado di Nabucodonosor, Nabuzaradan, e capitan di guardia, “a yega” Jerusalem. (2 Reinan 25:8) Podise para na su campamento pafo di e murayanan di e stad, Nabuzaradan a evalua e situacion y a plania kico nan lo haci. Tres dia despues, riba e di dies dia di luna, el a “bin” of drenta den Jerusalem, y a pega e stad na candela.​—Jeremias 52:12, 13.

Jeremias a duna un relato detaya di e caida di Jerusalem. Su descripcion tabata un base pa canticanan di lamento. E composicionnan aki ta aparece den e buki biblico di Lamentacionnan.

[Plachi na pagina 8]

E declaracionnan formal di Jeremias a inclui e huicio di Jehova contra Jerusalem

[Plachi na pagina 9]

Con Jehova a ‘uza su forsa’ contra Jeremias?

[Plachi na pagina 10]

“Manera e bon figonan aki, asina bon lo mi considera e presonan di Juda.”​—Jeremias 24:5