“Bo Plannan Lo Wordo Estableci”

DEN un melodia cu salmista David a compone, el a pidi den forma di oracion: “Crea den mi un curason limpi, o Dios, y renova un spirito recto den mi. Duna mi atrobe e goso di bo salbacion, y sostene mi cu un spirito voluntario.” (Salmo 51:10, 12) Despues di su pica cu Betsabe, David a arepenti, y den e versiculonan aki el a haci un suplica na Jehova Dios pa purifica su curason y dun’e e spirito​—of inclinacion mental​—pa haci loke ta corecto.

En realidad, ta crea Jehova ta crea un curason nobo den nos, asta duna nos un spirito nobo y voluntario? Of ta nos tin cu haci esfuerso pa obtene y proteha un curason limpi? Jehova “ta sondia curason”, pero te na ki grado e ta interveni den loke ta pasa den nos curason? (Proverbionan 17:3; Jeremias 17:10) Te con leu e ta influencia nos bida, nos motivacion- y accionnan?

E prome nuebe versiculonan di Proverbionan capitulo 16 ta mustra nos con nos por laga Dios dirigi nos bida di manera cu ‘nos plannan ta wordo estableci’ firmemente. (Proverbionan 16:3) Versiculo 10 te cu 15 ta enfoca riba e responsabilidad di un rei of gobernante.

Ken Ta Traha “e Plannan di Curason”?

“E plannan di curason ta pertenece na hende”, segun Proverbionan 16:1a. Claramente anto, “e plannan di curason” ta nos responsabilidad. Jehova no ta prepara nos curason milagrosamente ni e no ta duna nos un spirito voluntario. Ta nos tin cu haci e esfuerso pa haya conocemento exacto di su Palabra, Bijbel, medita riba e conocemento aki y siña pensa manera e ta pensa.​—Proverbionan 2:10, 11.

Sinembargo, e echo cu David a pidi “un curason limpi” y pa ‘renova su spirito’ ta mustra cu el a reconoce cu e tabatin un inclinacion pecaminoso y cu e tabatin mester di Dios su yudansa pa purifica su curason. Como hende imperfecto, nos por sinti e tentacion pa participa den “e obranan di carni.” (Galationan 5:19-21) Pa nos por mata ‘e miembronan di nos curpa terenal pa loke ta toca inmoralidad, impuresa, pasion, deseo malo, y golosidad’, nos tin mester di Jehova su yudansa. (Colosensenan 3:5) Ta masha importante anto pa nos pidi su yudansa den oracion pa asina evita cu nos ta cai den tentacion y tambe pa elimina inclinacionnan pecaminoso for di nos curason!

Nos lo por yuda otro hende cu e “plannan” di nan curason? Bijbel ta declara: “Tin hende ta papia sin pensa, manera hinca di spada, ma lenga di hende sabi ta trece curamento.” (Proverbionan 12:18) Ki ora nos lenga ta ‘cura’ otro hende? Solamente ora ‘e contesta di lenga ta bin di Jehova’, es decir, ora nos ta papia e palabranan corecto di e berdad di Bijbel.​—Proverbionan 16:1b.

Bijbel ta bisa cu “e curason ta mas engañoso cu tur cos y ta totalmente corupto.” (Jeremias 17:9) Nos curason figurativo ta inclina na hustifica su mes y gaña su mes. Spiertando nos pa e peliger aki, Rei Salomon di Israel di antiguedad a bisa: “Tur e camindanan di un hende ta limpi den su mes bista, ma SEÑOR ta pisa e  motibonan [“pero Jehova ta evalua spirito”, NW].”​—Proverbionan 16:2.

Amor propio por pone nos hustifica nos erornan, camufla caracteristicanan indeseabel di nos personalidad y sera wowo pa nos propio maldad. Pero Jehova si nos no por gaña. E ta evalua nos spirito. Un persona su spirito ta su inclinacion mental predominante y esei ta conecta cu su curason. Loke ta forma un persona su spirito ta depende principalmente di e actividad di e curason figurativo, locual ta ensera cosnan manera nos pensamento, emocion y motivacion. Jehova​—esun cu ta “sondia curason”​—ta evalua e spirito, y su huicionan ta imparcial y sin faboritismo. Lo ta sabi di nos parti pa proteha nos spirito, esta, nos inclinacion mental.

“Encomenda Bo Obranan” na Jehova

Pa nos traha plan nos tin cu pensa, y esei ta algo cu ta tuma luga den nos curason. Por lo general, plannan ta hiba na echo. Nos lo tin exito den nos intentonan? Salomon a bisa: “Encomenda bo obranan na SEÑOR, y bo plannan lo wordo estableci.” (Proverbionan 16:3) Encomenda nos obranan na Jehova ta nifica pone nos confiansa den dje, depende riba dje, pone nos mes bou di su autoridad; na moda di papia, baha e carga for di nos lomba y pon’e riba Jehova su lomba. E salmista a canta: “Encomenda bo caminda na SEÑOR, confia tambe den dje, y e lo hacie [of, lo e actua].”​—Salmo 37:5.

Sinembargo, pa nos plannan ta firmemente estableci, nan mester ta na harmonia cu e Palabra di Dios, y nan mester tin un bon motivacion nan tras. Ademas, nos mester pidi Jehova su yudansa y sosten, anto diligentemente haci nos best pa sigui e conseho biblico. Specialmente ora nos ta confronta prueba of dificultad, ta masha importante pa nos ‘tira nos carga riba Jehova’, pasobra ‘lo e sostene nos.’ De echo, “nunca e lo no permiti pa e husto wordo movi.”​—Salmo 55:22.

Jehova “A Traha Tur Cos cu un Proposito”

Ki resultado mas nos lo nota si nos encomenda nos obranan na Jehova? E Rei sabi a bisa: “SEÑOR a traha tur cos cu un proposito.” (Proverbionan 16:4a) E Creador di universo ta un Dios di proposito. Ora nos ta encomenda nos obranan na dje, nos bida lo ta yen di actividad significativo, liber di cosnan vano. Es mas, Jehova su proposito pa Tera​—y pa hende riba Tera​—ta eterno. (Efesionan 3:11) El a forma Tera y a cre’e “pa e wordo habita.” (Isaias 45:18) Ademas, su proposito original pa humanidad definitivamente lo bira un realidad. (Genesis 1:28) Un bida dedica na e Dios berdadero lo no caba nunca y lo tin proposito pa semper.

Jehova a traha “asta e malbado pa e dia di calamidad.” (Proverbionan 16:4b) Claro cu Dios no a crea e malbadonan, pasobra tur ‘su obranan ta perfecto.’ (Deuteronomio 32:4)  Sinembargo, el a permiti nan bin na existencia y sigui biba te ora cu e haya ta e momento oportuno pa ehecuta su huicio adverso. Por ehempel, Jehova a bisa Farao di Egipto: “Pa e motibo aki mi a permiti bo keda na bida, pa mustra bo mi poder y pa proclama mi nomber den henter mundo.” (Exodo 9:16) E Dies Plaganan y e destruccion di Farao y su ehersito den Lama Cora tabata en berdad demostracionnan memorabel di Dios su poder incomparabel.

Tambe Jehova por laga circunstancianan desaroya di tal manera cu e malbado inconcientemente ta cumpli cu su proposito. E salmista a bisa: “E furia di hende lo alaba bo; cu e restante di furia lo bo faha bo mes.” (Salmo 76:10) Jehova por permiti su enemigonan expresa nan furia contra su sirbidornan, pero te na e grado cu ta necesario pa disciplina su pueblo y asina entrena nan. Tur loke ta di mas, Dios ta tuma riba su mes y no ta permiti esei afecta su pueblo.

Mientras cu Jehova ta sostene su sirbidornan humilde, kico di hende orguyoso y arogante? E Rei di Israel a bisa: “Cada hende cu ta orguyoso di curason ta un abominacion pa SEÑOR; siguramente e lo no keda sin castigo.” (Proverbionan 16:5) Hende “orguyoso di curason” kisas ta uni pa sostene otro, pero nan lo no scapa castigo. Pues anto, lo ta sabi di nos parti pa cultiva e spirito di humildad sin importa cuanto conocemento nos tin of con capasita nos por ta of ki privilegionan di sirbishi nos por tin.

‘E Temor di Jehova’

Siendo cu nos a nace den pica, nos ta inclina na comete eror. (Romanonan 3:23; 5:12) Kico lo yuda nos evita di traha plannan cu lo hiba nos den mal caminda? Proverbionan 16:6 ta declara: “Pa medio di misericordia y berdad inikidad ta wordo expia, y pa medio di e temor di SEÑOR hende ta keda leu for di maldad.” Mientras cu Jehova ta expia of pordona nos picanan a base di su misericordia y berdad, ta e temor di Jehova ta loke ta frena nos di comete pica. Ta masha importante anto pa hunto cu amor pa Dios y aprecio pa su misericordia, nos cultiva temor di desagrad’e!

Nos ta cuminsa sinti e temor di Dios den nos curason ora nos desaroya un respet profundo pa Dios su poder impresionante. Djis pensa riba e poder cu su creacion ta refleha! Ora Dios a recorda Job di e manifestacion di su poder den e obranan di creacion, esei a yuda e patriarca corigi su manera di pensa. (Job 42:1-6) Nos tambe no ta haya motibo pa corigi nos manera di pensa ora nos lesa y medita riba e relatonan den Bijbel tocante Jehova su trato cu su pueblo? E salmista a canta: “Bin y mira e obranan di Dios; e ta temibel den su echonan pa cu e yiunan di hende.” (Salmo 66:5) Nos no mester considera Jehova su misericordia como algo di menos importancia. Ora e Israelitanan ‘a rebela y a haci Dios su spirito santo tristo, Jehova a cambia bira nan enemigo; el a bringa cu nan.’ (Isaias 63:10) Di otro banda, “ora cu un hende su caminda ta agrada SEÑOR, e ta pone asta su enemigonan keda na pas cu ne.” (Proverbionan 16:7) Temor di Jehova ta en berdad un gran proteccion!

E Rei sabi a bisa: “Mihor un tiki cu husticia, cu gran entrada cu inhusticia.” (Proverbionan 16:8) Proverbionan 15:16 ta declara: “Mihor djis un tiki, cu e temor di SEÑOR, cu gran tesoro, y problema hunto cu ne.” Un respet profundo pa Dios definitivamente ta necesario pa nos por keda riba e caminda di husticia.

‘E Curason di un Hende Ta Plania Su Caminda’

Dios a crea hende cu boluntad liber, nan por scohe entre bon y malo. (Deuteronomio 30:19, 20) Nos curason figurativo tin e capasidad di considera diferente opcion y enfoca riba un of mas di nan, y manera Salomon a indica, ta nos tin e responsabilidad di haci e escohencia. El a bisa: “E mente [of, “curason”, NW] di un hende ta plania su caminda.”  Despues di haci esei, Jehova “ta dirigi su pasonan.” (Proverbionan 16:9) Siendo cu Jehova por dirigi nos pasonan, lo ta un decision sabi si nos busca su yudansa pa ‘establece nos plannan’ firmemente.

Manera nos a menciona caba, e curason ta engañoso y por bai asina leu di rasona di un forma incorecto. Por ehempel, un persona kisas ta comete un pica, y su curason por cuminsa hustifica su mes. En bes di bandona su caminda pecaminoso, e persona kisas ta rasona cu Dios ta amoroso, bondadoso, misericordioso y cla pa pordona. En realidad, un persona asina a bisa den su curason: “Dios a lubida; el a sconde su cara; e lo no mira esaki nunca.” (Salmo 10:11) Sinembargo, no ta bon y ta asta peligroso pa abusa di Dios su misericordia.

“Peso y Balansa Husto” Ta di Jehova

Cambiando for di e topico di curason y e accionnan di hende pa esnan di un rei, Salomon a bisa: “Un sentencia divino ta riba lip di rei; su boca no mester faya ora cu e ta husga.” (Proverbionan 16:10) Esaki siguramente ta e caso di Hesucristo, e Rei entronisa. Su gobernacion riba Tera lo ta di acuerdo cu e boluntad divino.

E Rei sabi a identifica e fuente di husticia y rectitud, bisando: “Peso y balansa husto ta di SEÑOR, tur e piedranan-pa-pisa, cu ta den e saco, ta su obra.” (Proverbionan 16:11) Ta Jehova ta percura peso y balansa pa sirbi como norma di midi. E no a laga pa un rei determina eseinan. Tempo cu Hesus tabata riba Tera el a bisa: “Mi no por haci nada di mi mes. Manera mi ta tende, mi ta husga; y mi husgamento ta husto, pasobra mi no ta busca mi mes boluntad, sino e boluntad di Esun cu a manda mi.” Nos por spera husticia perfecto for di e Yiu, esun na ken e Tata “a duna tur huicio.”​—Juan 5:22, 30.

Kico mas nos por spera di un rei cu ta representa Jehova? E rei di Israel a bisa: “Ta un abominacion pa reinan haci maldad, pasobra un trono ta wordo estableci riba husticia.” (Proverbionan 16:12) E principionan husto di Dios ta dirigi e Reino Mesianico. E no tin ningun aliansa cu “un trono cu ta plania perversidad.”​—Salmo 94:20; Juan 18:36; 1 Juan 5:19.

Con pa Haya Aprobacion di un Rei

Con e subditonan di un rei mahestuoso mester reacciona? Salomon a bisa: “Lipnan husto ta e delicia di reinan, y nan ta stima esun cu ta papia loke ta corecto. Rabia di un rei ta manera mensaheronan di morto, ma un hende sabi lo calma esaki.” (Proverbionan 16:13, 14) E adoradonan di Jehova awe ta tuma e palabranan aki na pecho y ta tene nan mes ocupa den e trabou di predica e Reino y haci discipel. (Mateo 24:14; 28:19, 20) Nan sa cu e Rei Mesianico, Hesucristo, ta keda contento ora nan ta uza nan lipnan den e manera aki. En berdad, tabata sabi pa calma e rabia di un rei humano poderoso y busca su aprobacion. Ta mucho mas sabi pa busca aprobacion di e Rei Mesianico!

Salomon a sigui bisa: “Den e lus riba cara di rei tin bida, y su gracia ta manera un nubia di awasero di primavera.” (Proverbionan 16:15) “E lus riba cara di rei” ta nifica su aprobacion, mescos cu ‘e lus di Jehova su semblante’ ta indica aprobacion divino. (Salmo 44:3; 89:15) Mescos cu nubianan di awasero ta un garantia cu lo tin awa pa yuda e cosecha hecha, asina e gracia of aprobacion di un rei ta evidencia di cosnan bon cu lo bin. Bida bou di e reinado di e Rei Mesianico lo ta yen di bendicion y prosperidad, mescos cu tabata e caso na un escala chikito durante e reinado di Rei Salomon.​—Salmo 72:1-17.

Mientras nos ta warda pa e Reino di Dios tuma control di tur asunto bou di solo, laga nos busca su yudansa pa purifica nos curason. Ademas, laga nos pone nos confiansa den Jehova y cultiva temor di Dios. E ora ei nos por tin e pleno confiansa cu nos “plannan lo wordo estableci” firmemente.​—Proverbionan 16:3.

[Plachi na pagina 18]

Den ki sentido Jehova a traha “e malbado pa e dia di calamidad”?