PASCAL a lanta den un bario pober di Costa di Marfil y tabata anhela un mihor bida. E tabata un boxdo amateur y tabata blo puntra su mes: ‘Na unda lo mi por haya chens di bira un strea di deporte y gana hopi placa?’ Ora e tabatin 20 pico aña, el a dicidi cu Europa tabata e luga caminda e por logra esey. Pero como cu e no tabatin e papelnan necesario pa yega eynan, lo e tabatin cu drenta ilegalmente.

Na 1998, cu 27 aña di edad, Pascal a cuminsa cu su biahe pa Europa. El a crusa frontera, drenta Gana, pasa door di Togo y Benin y finalmente a yega e stad Birni NKonni na e pais Niger. Eynan e parti realmente peligroso di su biahe lo a cuminsa. Pa e por a sigui cu su biahe pa yega Europa, e tabatin cu haya lift riba un truck y crusa Desierto di Sahara. Anto ora e yega Lama Mediteraneo, lo e tabatin cu subi un barco y nabega bay Europa. Esey tabata su plan, pero dos cos a pasa na Niger cu a cambia tur cos.

Di prome, placa a caba cu ne. Di dos, el a topa Noe, un pionero cu a cuminsa studia Bijbel cu ne. Loke el a siña a conmov’e profundamente y a cambia su punto di bista di bida. El a reemplasa su metanan material cu metanan spiritual. Pascal a batisa na december 1999, y na 2001 el a cuminsa traha pionero den e stad na Niger caminda el a siña e berdad. El a haci esey pa demostra su gratitud na Jehova. Kico Pascal ta pensa di su sirbishi? El a bisa: “Mi ta disfrutando plenamente di bida!”

Mescos cu Pascal, hopi ruman a descubri cu pa nan haya mas satisfaccion den bida nan mester concentra riba metanan spiritual. Pa logra e metanan ey, algun ruman a bandona Europa y a bay biba na Africa pa sirbi den areanan caminda tin mas necesidad di predicador di e bon noticia di Reino. En realidad, rond di 65 testigo di Jehova di Europa—entre 17 pa 70 aña—a muda pa Benin, Burkina Faso, Niger y Togo (paisnan di West Africa) pa yuda den e trabou di predica. * Kico a motiva nan pa tuma e paso grandi ey, y con a bay cu nan?

Anne-Rakel di Dinamarca a conta: “Mi mayornan a sirbi como misionero na Senegal. Semper nan tabata papia cu asina un entusiasmo tocante e bida di misionero cu mi tambe tabata kier un bida asina.” Un 15 aña pasa, tempo cu Anne-Rakel tabatin 20 pico aña, el a muda pa Togo, caminda e ta sirbi den un congregacion di idioma di seña. Con e decision ey a anima otro rumannan? El a bisa: “Despues mi ruman muher chikito y mi ruman homber tambe a bin biba na Togo.”

Aurele ta un ruman homber casa di Francia cu tin 70 aña. El a conta: “Cinco aña pasa, ora mi a baha cu  pensioen, mi por a scoge entre dos cos: hiba un bida keto y trankil na Francia mientras cu mi ta warda Paradijs bin of haci algo pa expande mi sirbishi.” Aurele a scoge pa expande su sirbishi. Un tres aña pasa, e cu su esposa, Albert-Fayette, a muda bay Benin. Segun Aurele: “E mihor cos cu nos a yega di haci den nos bida tabata di pone nos mes disponibel pa sirbi Jehova akinan.” Y el a bisa tambe cu un sonrisa: “Por cierto, parti di nos teritorio canto di costa ta parce Paradijs.”

Clodomir cu su esposa, Lysiane, a muda di Francia pa Benin 16 aña pasa. Na cuminsamento, nan tabata sinti hopi falta di nan famia y amigonan na Francia, y nan tabatin miedo cu nan lo no por a adapta nan mes na e bida nobo eynan. Pero nan no tabatin nodi preocupa. Nan ta disfruta sin fin di nan sirbishi. Clodomir a bisa: “Durante e 16 añanan aki, nos tabatin e privilegio di yuda un promedio di un persona pa aña acepta e berdad.”

Sébastien cu Johanna, un pareha di Francia, a bay biba na Benin na aña 2010. Sébastien a conta: “Tin masha hopi cos di haci den congregacion. Nos sirbishi akinan ta manera un spoedcursus di entrenamento teocratico!” Con e hendenan ta reacciona den sirbishi? Johanna a bisa: “E hendenan tin hopi sed pa e berdad. Hasta ora nos no ta predica, hende ta para nos riba caya pa haci pregunta tocante Bijbel y pa haya nos publicacionnan.” Ki efecto e echo cu nan a muda tabatin riba nan matrimonio? Sébastien a comenta: “El a haci nos matrimonio mas fuerte. Ta dushi pa pasa henter dia den sirbishi hunto cu mi casa.”

Eric cu su esposa, Katy, ta sirbi como pionero den e parti menos pobla den noord di Benin. Un dies aña pasa, tempo nan tabata biba na Francia, nan a cuminsa lesa articulonan tocante sirbi caminda tin mester di mas predicador. Tambe nan a papia cu rumannan den sirbishi di tempo completo. Esaki a lanta den nan e deseo di bay biba afo, y esey ta loke nan a haci na aña 2005. E crecemento cu nan a mira ta impresionante. Eric a bisa: “Dos aña pasa, nos grupo den e stad di Tanguiéta tabatin 9 publicador; awor nos tin 30. Riba diadomingo, tin entre 50 pa 80 hende na reunion. E goso cu bo ta sinti ora bo mira un crecemento asina ta algo cu bo no por splica!”

Kico ta e dificultadnan cu algun ruman cu a bin yuda ­caminda tin mas necesidad ta experencia? Benjamin, di 33 aña, ta ruman homber di Anne-Rakel. Na aña 2000, na Dinamarca, el a topa un misionero cu tabata sirbi na Togo. Benjamin ta corda con ora el a bisa e misionero cu lo e kier traha pionero, e misionero a bis’e: “Wel, bo por traha pionero na Togo.” Benjamin a keda pensa riba esey. El a bisa: “E tempo ey mi no tabatin ni 20 aña ainda, pero mi dos ruman muhernan tabata sirbi caba na Togo. Di mes tabata mas facil pa mi bay eynan.” Pues, el a bay biba na Togo. Pero toch tabatin un dificultad. Benjamin a splica: “Mi no por a papia ni un palabra na Frances. E prome seis lunanan tabata duro pasobra tabata dificil pa mi comunica cu e hendenan.” Pero cu tempo, el a haci progreso. Awor Benjamin ta sirbi na Betel di Benin. E ta entrega literatura y ta yuda den departamento di computer.

Eric cu Katy, menciona anteriormente, a sirbi na Francia den un teritorio di otro idioma prome cu nan a muda bay Benin. Den ki sentido West Africa tabata diferente? Segun Katy: “No tabata facil pa haya un luga apropia pa biba. Nos a biba varios luna den un cas sin awa di cranchi y sin coriente.” Eric a sigui bisa: “Bisiñanan tabata toca muziek duro te laat anochi. Bo mester tene pasenshi cu cosnan asina y ser dispuesto pa adapta.” Pero tur dos ta di acuerdo cu esaki: “E goso di sirbi den un teritorio caminda nunca prome e hendenan a tende e berdad ta surpasa cualkier dificultad.”

Michel cu Marie-Agnès ta un pareha casa di Francia cu tin casi 60 aña di edad. Nan a muda pa Benin un cinco aña pasa. Na prome instante, nan tabata un poco preocupa. Michel a conta: “Algun hende a pensa cu e decision cu nos a tuma pa bay biba eynan tabata hopi riscante. Nan a compara esey cu un persona den circo cu ta cana riba un cabuya na halto pushando un garetia, y nos dos ta den e garetia. En berdad esey lo ta algo spantoso si bo no sa cu e persona ey ta Jehova. Pues, ta cu Jehova su yudansa mes nos a muda pa sirbi Jehova mihor.”

E rumannan cu tin experencia den sirbi caminda tin mester di mas predicador ta enfatisa e importancia di prepara bo mes bon. Esey ta encera: Plania di antemano. Siña adapta. Tene bo mes na un budget. Confia den Jehova.—Luc. 14:28-30.

Sébastien, menciona anteriormente, a conta: “Prome cu ami cu Johanna a muda, nos a purba di spaar durante dos aña. Nos a baha man na loke nos tabata gasta na recreo y a evita di cumpra cosnan innecesario.” Pa nan por sigui sirbi den exterior, nan ta traha tur aña un par di luna na Europa. Asina nan ta gana suficiente placa pa por traha pionero na Benin e resto di aña.

 Tin rond di 20 ruman muher soltera di otro pais cu ta sirbi caminda tin mas necesidad di predicador na West Africa. Marie-Thérèse ta un di nan. E tabata traha como chauffeur di bus na Francia, pero na 2006 el a tuma un aña buiten bezwaar pa traha pionero na Niger. No a dura hopi cu el a realisa cu esaki tabata e bida cu di berdad e tabata kier tin. Marie-Thérèse a conta: “Ora mi a bay Francia bek, mi a papia cu mi doño di trabou tocante mi deseo di ahusta mi orario, y e tabata dispuesto pa haci esey. Awor mi ta traha como chauffeur di bus na Francia di mei pa augustus, y mi ta sirbi como pionero na Niger di september pa april.”

Un cristian cu ta ‘busca prome e Reino’ por tin sigur cu Jehova lo percura pa ‘tur e otro cosnan necesario.’ (Mat. 6:33) Pa ilustra esaki, wak kico a pasa cu Saphira, un ruman muher soltera di Francia di casi 30 aña di edad cu ta traha pionero na Benin. Na 2011 el a bay Francia bek pa traha y gana suficiente placa pa mantene su mes un aña mas (su di seis aña) na Africa. Safira a conta: “Tabata diabierna, mi ultimo dia di trabou, pero eigenlijk lo mi mester a traha un dies dia mas pa mi por tin suficiente placa pa e aña binidero. A keda mi dos siman so mas na Francia. Mi a haci oracion y a splica Jehova mi situacion. Un poco despues di esey, un uitzendbureau a bel mi pa puntra si mi por a reemplasa un trahador pa dos siman.” Riba dialuna, Saphira a bay na e luga p’e siña e trabou cerca e trahador cu e tabatin cu bay reemplasa. Tabata un dushi sorpresa p’e ora el a haya sa cu e trahador tabata un ruman muher cristian cu tabatin mester di dies dia liber p’e por a bay Scol di Pionero. Saphira a sigui conta: “E ruman su hefe a nenga di dun’e liber, a menos cu nan haya un hende pa reemplas’e. Luga, e ruman tambe a roga Jehova pa yud’e!”

Algun ruman tin hopi aña ta sirbi na West Africa y eynan a bira nan cas. Otro rumannan a logra sirbi pa un par di aña eynan y despues nan a regresa nan pais di origen. Te awe e rumannan cu a bay yuda caminda tabatin mas necesidad ta beneficia di e añanan cu nan a sirbi eynan. Nan a siña cu loke ta duna berdadero satisfaccion den bida ta sirbi Jehova.