E AÑA aki ta haci net 100 aña cu testigonan di Jehova a presenta e “Foto-Drama di Creacion” pa prome biaha. Esaki ta un produccion cu a ser prepara specialmente pa yuda hende pone fe den Bijbel, e Palabra di Dios. Den un epoca cu e doctrina di evolucion, hopi critica riba Bijbel y duda a caba cu fe di hopi hende, e “Foto-Drama di Creacion” si a mustra cu Jehova ta e Creador.

Charles T. Russell, kende e tempo ey tabata dirigi e Studiantenan di Bijbel, constantemente tabata busca e manera mas mihor y mas rapido posibel pa plama e berdad di Bijbel. E tempo ey, e Studiantenan di Bijbel tabatin mas cu tres decada ta uza publicacion imprimi pa plama e berdad. Pero nan bista a cay riba un otro posibilidad: pelicula.

Den decada di 1890, industria cinematografico a cuminsa presenta pelicula den cua actornan no tabata papia. Na comienso di aña 1903, iglesia baptista a presenta un pelicula religioso den nan iglesia na New York. Pues na 1912, tempo cu Ruman Russell a cuminsa cu preparacion di e “Foto-Drama”, e industria cinematografico tabata den su fase inicial. Ruman Russell a realisa cu e sistema aki por a yuda plama e berdad di Bijbel na un manera cu nan lo no por a logra cu literatura so.

E produccion “Foto-Drama” tabatin un duracion di ocho ora, pero generalmente nan tabata present’e den cuater seccion. E produccion tabata consisti di, entre otro, grabacion di 96 discurso biblico cortico cu un orador bon conoci, kende tabatin un excelente stem, a nara. Hopi di e escenanan tabatin musica clasico. Rumannan habil tabata toca e grabacionnan di stem y musica riba tocadisco y tabata sincronisa esakinan cu e pelicula- y slidesnan di color; e pelicula- y slidesnan aki tabata presenta escenanan di varios relato biblico bon conoci.

Mayoria di e peliculanan y hopi di e slidesnan di glas tabata cumpra na studionan comercial. Artistanan profesional di Filadelfia, New York, Paris y London a pinta e escenanan pa e slidesnan di glas y pa e peliculanan. Algun team di e Departamento di Arte na Betel tambe tabata pinta varios cos pa e Foto-Drama; hopi biaha, nan tabata pinta escenanan pa e slidesnan nobo pa reemplasa esnan cu a kibra. Fuera di e peliculanan cumpra, nan  tabatin grabacion di miembronan di e famia di Betel cu nan a filma na Yonkers, New York. E rumannan aki a hunga rol di varios personahe biblico, manera Abraham, Isaak y e angel cu a preveni Abraham di sacrifica su yiu homber.—Gen. 22:9-12.

Un compañero di trabou di Ruman Russell a bisa prensa cu e medio aki ‘lo por pone miles di hende haya interes den e Scritura, mas cu cualkier otro cos cu a ser haci den pasado pa plama mensahe religioso.’ Con miembronan di clero a reacciona? Nan a apoya e sistema nobo aki pa alcansa e tantisimo hendenan cu tabatin hamber spiritual? Al contrario, lidernan di cristiandad en general a rechasa e “Foto-Drama” y algun a hasta uza astucia y trikinan baho pa stroba hende di wak e produccion aki. Por ehempel, tabatin un biaha cu un lider di cristiandad a laga corta coriente di e luga caminda nan tabata bay presenta e “Foto-Drama.”

A pesar di esey, hopi hende tabata bin e teaternan pa wak e “Foto-Drama”, cu tabata gratis. Na Merca so, e rumannan tabata pasa e “Foto-Drama” na casi 80 stad tur dia. Hopi hende a keda hopi impresiona ora cu pa prome biaha nan a mira un pelicula den cua actornan ta papia. Danki na e tecnologia, den un rato di ora nan por a mira sucesonan cu ta tuma luga durante un lapso di tempo; nan por a mira por ehempel con un puyito ta sali for di un webo of con un flor ta habri. Ademas, e escenanan cu tabatin di haber cu cosnan cientifico a resalta e sabiduria impresionante di Jehova. Y manera nos a menciona na comienso di e articulo aki, ora cu un persona a mira Ruman Russell riba pantaya ta introduci e “Foto-Drama”, el a haya cu ‘Ruman Russell a keda bibo-bibo den e pelicula.’

Tim Dirks, un autor y historiador riba tereno di trahamento di pelicula, a describi e “Foto-Drama” como ‘e prome produccion cinematografico cu a sincronisa pelicula- y slidesnan di color cu stem cu a haci un gran impresion.’ E peliculanan cu a ser produci prome cu e “Foto-Drama” tambe a haci uzo di algun di e tecnicanan aki pero nunca prome a combina nan tur den un solo produccion, y sigur no den un produccion basa riba Bijbel. Y niun di e peliculanan ey no a haya mas acogida cu e “Foto-Drama.” Den e prome aña so, un total di mas of menos nuebe miyon hende, na Norte America, Europa, Australia y Nueva Zelandia, a wak e “Foto-Drama”!

E prome presentacion di e “Foto-Drama” a tuma luga na New York, dia 11 di januari 1914. Shete luna despues, mundo a ser asota pa e desaster cu despues nan a yama e Prome Guera Mundial. Pero a pesar di esey, rond mundo, multitud di hende tabata sigui bin hunto pa wak e “Foto-Drama.” E imagennan bibo di e bendicionnan cu e Reino lo trece pa humanidad den futuro tabata un gran consuelo pa nan. No tin duda, pa e aña 1914, e “Foto-Drama” tabata den tur sentido un produccion realmente unico!