DURANTE e ultimo añanan di su bida, mi omo grandi Nikolai Dubovinsky, kende a sirbi Jehova pa hopi aña, a skirbi tocante su experencianan. El a skirbi tanto di e cosnan bon como e cosnan malo cu el a pasa aden, specialmente durante e tempo cu e trabou di predica tabata prohibi na ex Union Sovietico. A pesar di tur e dificultadnan cu el a pasa aden, semper el a keda fiel y e tabata stima bida. Hopi biaha Mo Nikolai tabata bisa cu e kier comparti su experencia cu e hobennan, pesey mi tin gana di conta boso algun di e experencianan aki. El a nace na aña 1926 den e pueblo di Podvirivka, cu ta keda den e provincia di Chernivtsi, Ucrania. El a bin di un famia campesino.

Mo Nikolai ta conta: “Un dia na aña 1941, Ivan, un di mi ruman hombernan mas grandi a trece varios publicacion cas, entre nan The Harp of God y The Divine Plan of the Ages, algun Toren di Vigilancia y varios foyeto chikito. Mi a lesa nan tur. Pa mi sorpresa mi a haya sa cu no ta Dios sino Diabel ta e fuente di tur e problemanan cu tin na mundo. Ademas di e publicacionnan ey, mi a lesa e Evangelionan y mi a ripara cu mi a haya e berdad. Cu hopi entusiasmo mi a cuminsa conta otronan tocante e Reino. Mas mi a studia e publicacionnan aki, mas mi a compronde e berdad y esey a duna mi mas gana di sirbi Jehova.

Door cu tabata tempo di guera, mi tabata sa cu lo mi sufri pa motibo di mi creencia pasobra mi no tabata dispuesto pa mata ningun hende. Pa mi prepara mi mes pa e pruebanan cu lo mi bay enfrenta, mi a cuminsa siña textonan di Bijbel manera Mateo 10:28 y 26:52 for di cabes. Mi tabata determina pa keda fiel na Jehova hasta si mi mester a muri.

Na aña 1944, ora mi a haci 18 aña, nan a yama mi pa drenta servicio militar. Ora mi a bay na e luga di inscribi, tabata e prome biaha den mi bida cu mi a topa cu otro hende cu tabatin e mesun creencia cu mi. Nan tambe tabatin edad pa cuminsa servicio militar. Na un manera firme nos a bisa e autoridadnan cu nos lo no participa den guera. Esey a pone nan rabia masha hopi, nan a menasa nos cu nan lo laga nos muri di hamber, forsa nos coba canal pa e soldaatnan of djis tira nos mata. Sin miedo nos a contesta: ‘Boso por haci kico cu boso kier cu nos. Pero nada lo pone nos kibra e mandamento di Dios: “No mata.”’—Exo. 20:13.

Cu tempo, nan a manda ami y dos otro ruman homber na Belarus pa traha den cunucu y pa drecha casnan cu a sufri daño. Ainda mi ta corda e efectonan horibel di guera cu mi a mira den e cunucunan di Minsk. Banda di caminda tabatin matanan carbonisa. Den e canalnan y den mondi tabatin cadavernan cu no a wordo dera y curpa hincha di cabaynan morto. Mi  a mira garoshinan di guera, armanan cu nan a laga atras y hasta restonan di un avion. Cu mi mes wowo mi por a mira e consecuencianan cu ta bin ora hende kibra Dios su mandamentonan.

Aunke e guera a caba na aña 1945, toch nan a sentencia nos na dies aña den prizon pasobra nos a nenga di participa den guera. Durante e prome tres añanan, nos no tabatin reunion ni literatura spiritual. Pa medio di carta nos a logra haya contacto cu algun ruman muher, pero despues nan a aresta nan tambe y sentencia nan na 25 aña den campo di trabou forsa.

Na 1950 nan a laga nos sali liber y nos por a bay cas pasobra nan a reduci nos sentencia. Mientras mi tabata den prizon, mi mama y mi ruman muher mas chikito cu yama Maria a bira testigo di Jehova. Mi ruman hombernan mayo no tabata Testigo ainda, pero nan tabata studia Bijbel si. Door cu mi tabata predica regularmente, e polisnan kier a manda mi prizon atrobe. Durante e tempo ey, e rumannan cu tabata encarga cu e trabou di predica a puntra mi pa yuda produci literatura den secreto. Mi tabatin 24 aña.”

Mo Nikolai a sigui conta: “E Testigonan tabata gusta bisa: ‘Si nan prohibi e trabou di predica riba tera, e lo sigui bou di tera.’ (Prov. 28:28) Den e tempo ey, nos tabata imprimi mayoria di nos publicacionnan den luganan secreto bou di tera. Mi prome ‘oficina’ tabata den un bunker bou di e cas di Dmitry, un di mi ruman hombernan mas grandi. Tin biaha mi tabata keda dos siman largo den mi bunker sin sali. De bes en cuando e lampi di kerosin tabata paga door cu no tabatin suficiente oxigeno. E ora ey mi tabata drumi y warda te ora e camber yena cu aire fresco.

 Un dia, un ruman homber cu tabata traha cu mi a puntra mi: ‘Nikolai bo a batisa caba?’ Aunke mi tabata sirbi Jehova pa 11 aña caba, mi no a batisa ainda. Pues nos a papia tocante e asunto, y e mesun anochi ey, cu 26 aña, mi a batisa den un lago. Tres aña despues mi a haya mas responsabilidad. Mi a bira un miembro di e Comite di Pais. E tempo ey, pa e trabou di predica por a sigui, nan tabata nombra rumannan cu no tabata cera pa tuma e luga di esnan cu tabata den prizon.”

Mo Nikolai a bisa: “E trabou di imprimi bou di tera tabata hopi mas dificil cu prizon. Pa evita e KGB mi no por a asisti na e reunionnan pa shete aña largo, y mi mes mester a zorg pa mi keda spiritualmente fuerte. Mi tabata wak mi famia solamente ora mi bishita nan, cual mi no por a haci hopi. Pero e echo cu nan tabata compronde e situacion cu mi tabata aden a encurasha mi hopi. Mi tabata sinti hopi cansa pasobra constantemente mi tabata bou di stress y semper mi mester a keda alerta. Nos mester tabata prepara pa cualkier cos. Por ehempel, un anochi, dos polis a bin na e cas unda mi tabata kedando. Mi a bula for di un bentana na e otro banda di e cas y mi a core bay den mondi. Ora mi a yega na un area caminda no tabatin luga pa sconde, mi a scucha un zonido straño. E zonido tabata manera un tipo di fluitmento. Despues di un rato mi a ripara cu nan tabata tirando y cu e zonido straño tabata di e balanan di scopet. Un di mi persiguidonan a subi riba un cabay y a sigui tira te ora cu su balanan a caba. Un di e balanan a dal mi den mi man. Despues cu nan a core mi tras pa 5 kilometer, mi a logra scapa door di sconde den mondi. Mas despues ora mi tabata den corte, nan a bisa mi cu e polisnan a tira 32 biaha.

Door cu mi a pasa asina hopi tempo bou di tera, mi a bira bleek y esey a pone cu di biaha hende por a ripara kico mi tabata haciendo. Pesey mi tabata bay den solo mas tanto posibel. Tambe mi salud a bay atras door di ta asina hopi bou di tera. Na un ocasion mi no por a asisti na un reunion importante cu algun ruman hombernan pasobra mi tabata sangra for di mi nanishi y boca.”

Mo Nikolai ta sigui conta: “Riba 26 di januari 1957 nan a aresta mi atrobe. Seis luna despues Corte Supremo di Ucrania a duna e veredicto.  Nan a sentencia mi na morto pa medio di peloton di fusilamento, pero door cu nan a kita e pena di morto den e pais, nan a cambia mi sentencia pa 25 aña den prizon. Nan a sentencia ocho di nos na un total di 130 aña den camponan di trabou forsa. Nan a manda nos na e camponan di Mordvinia, unda tabatin mas o menos 500 Testigo. Nos tabata reuni den gruponan chikito pa studia E Toren di Vigilancia den secreto. Despues cu un guardia a lesa algun di nos revistanan cu nan a confisca, el a bisa: ‘Si boso sigui lesa e revistanan aki, niun hende por pone boso perde boso fe.’ Semper nos tabata purba di haci nos trabou na un manera diligente, y tin biaha nos tabata haci hasta mas di loke nan tabata pidi nos. Toch e comandante a bisa: ‘E trabou cu boso ta haci akinan no ta importante. Loke nos mester ta boso lealtad.’”

Na aña 1967, ora Mo Nikolai a sali for di e campo di trabou forsa, el a yuda establece algun congregacion na Estonia y St. Petersburg, Rusia. Na comienso di 1991, nan a anula e veredicto cu e corte a tuma na aña 1957 pasobra nan no tabatin suficiente evidencia pa mustra cu Mo Nikolai a comete un crimen. Durante e tempo ey, hopi testigo di Jehova cu a sufri maltrato a ser declara inocente. Na aña 1996, Mo Nikolai a muda pa e stad di Velikiye Luki den e provincia di Pskov, cu ta keda mas o menos 500 kilometer for di St. Petersburg. El a cumpra un cas chikito y na 2003 nan a traha un Salon di Reino riba su tereno. Awe tin dos congregacion progresivo ta reuni eynan.

Ami cu mi esposo ta sirbi na e sucursal di testigonan di Jehova na Rusia. Na maart 2011, algun luna prome cu el a muri, Mo Nikolai a bishita nos pa ultimo biaha. Nos a sinti nos conmovi pa su bunita palabranan. Cu un briyo den su wowo el a bisa: “Ora mi mira tur cos cu ta pasando, ta parce cu e di shete dia di cana rond di Jerico ya a cuminsa.” (Jos. 6:15) E tabatin 85 aña. Aunke su bida no tabata facil, el a expresa su mes cu e siguiente palabranan: “Esta contento mi ta cu mi a sirbi Jehova den mi hubentud! Mi nunca a lamenta e decisionnan cu mi a tuma.”