1. Kico ta Dios su cualidad di mas importante, y con esey ta laga bo sinti?

BIJBEL ta bisa cu “Dios ta amor.” (1 Juan 4:8) Amor no ta djis un di su bunita cualidadnan, pero esun di mas importante. Cu otro palabra, Dios no solamente tin amor, sino e ta amor. Tur loke e ta haci ta basa riba amor. Esta maraviyoso pa sa cu e Creador di universo y di tur ser bibo ta un Dios di amor!

2. Ki siguransa e amor di Dios ta duna nos? (Wak e prome plachi.)

² E tierno cariño y amor cu Dios tin pa su creacion ta sigura nos cu su proposito pa humanidad lo cumpli sin falta. Esey lo resulta den hopi felicidad pa esnan cu ta obedece Dios. Por ehempel, debi na su amor, Jehova a “fiha un dia riba cua e ta bay husga henter mundo den husticia pa medio di un homber cu el a nombra”, esta, Hesus. (Echo. 17:31) Nos por ta sigur cu esaki lo tuma luga. Pa esnan cu ta obedece Dios lo tin un futuro maraviyoso cu lo dura pa semper.

3. Con futuro lo ta si Dios no tabatin amor pa humanidad?

³ Con futuro lo ta si Dios no tabatin amor pa hende? No ta dificil pa imagina esey. Si bo djis wak bek den historia di humanidad, lo bo ripara cuanto sufrimento hende a experencia bou di e gobernacion di hende y di e dios cruel di e mundo aki, Satanas e Diabel. (2 Cor. 4:4; 1 Juan 5:19; lesa Revelacion 12:9, 12.) Un cos ta sigur, futuro lo ta scur sin e amor di Dios.

4. Pakico Jehova a permiti Satanas y hende rebeldia contra su gobernacion?

⁴ Ora Satanas a rebeldia contra Dios su gobernacion, el a influencia e prome pareha pa haci mescos. El a cuestiona Jehova su soberania, esta, su derecho di goberna. En realidad, Satanas a pretende cu su manera di goberna ta mihor cu esun di e Creador. (Gen. 3:1-5) Jehova a duna Satanas un oportunidad pa purba di mustra cu e tin rason, pero Dios a permiti esaki temporalmente. Den su sabiduria, Jehova a laga suficiente tempo pasa pa mustra bon cla cu su gobierno ta e unico cu ta capacita pa goberna humanidad. Historia a mustra cu ni hende ni Satanas por goberna humanidad.

5. Kico e historia di humanidad a demostra?

⁵ Durante e ultimo 100 añanan, mas cu 100 miyon hende a muri den guera. Awe cosnan ta bayendo di malo pa pio. Esaki ta loke Bijbel a predeci cu lo pasa den “e ultimo dianan” di e sistema aki ora cu “hende malbado y gañadonan lo bay di malo pa pio.” (2 Tim. 3:1, 13) Historia a demostra cu loke Bijbel ta bisa ta berdad: “O SEÑOR, mi sa cu e caminda di hende no ta di dje mes; tampoco no ta keda na hende pa dirigi su pasonan.” (Jer. 10:23) Dios no a traha hende cu e capacidad of derecho di goberna nan mes sin su yudansa.

6. Dicon Dios a permiti maldad pa un tempo?

⁶ Ademas di mustra cu hende ta incapaz di goberna, e echo cu Dios a laga maldad sigui pa un tempo ta mustra cu ta solamente Dios su gobernacion por tin exito. Den futuro Dios lo destrui tur maldad. Despues di esey, si cualkier persona cuestiona Jehova su manera amoroso di goberna, Dios lo actua di biaha. E lo por uza e historia di humanidad como precedente pa mustra cu esnan cu rebeldia mester ser destrui mesora, y nunca mas e lo mester permiti maldad.

7, 8. Cua ta algun manera cu Jehova a demostra su gran amor?

⁷ Jehova a demostra su gran amor den varios manera. Por ehempel, pensa con impresionante e universo ta. Tin miles di miyones di galaxia, y cada un di nan tin miles di miyones di strea y planeta. Un di e streanan den nos Via Lactea (Melkweg) ta solo. Sin dje, bida riba Tera lo no ta posibel. Tur e creacionnan aki ta duna prueba cu tin un Creador, y nan ta mustra nos su cualidadnan manera poder, sabiduria y amor. Si, Dios “su cualidadnan invisibel, esta, su poder eterno y Divinidad, ta ser mira bon cla for di creacion di mundo padilanti, ya cu nan ta bisto den e cosnan traha.”—Rom. 1:20.

⁸ Dios a crea tur cos riba Tera pa beneficia esnan cu ta biba riba dje. El a  crea un bunita paradijs pa hende biba. El a duna nan un mente y curpa perfecto pa asina nan por biba pa semper. (Lesa Revelacion 4:11.) Ademas, “e ta duna tur ser bibu alimento. Su amor ta eterno.”—Sal. 136:25, BPK.

9. Ademas di amor, ki otro sintimento Jehova sa demostra y dicon?

⁹ Aunke Jehova ta un Dios di amor, tin algo cu e ta odia: maldad. Por ehempel, Salmo 5:4 te cu 6 ta bisa: “Abo no ta un Dios cu ta hiba gusto den maldad ... Bo ta odia tur esnan cu ta haci inikidad.” Y e ta sigui bisa: “SEÑOR ta aborece e homber dramado di sanger y gañado.”

10, 11. (a) Kico Jehova lo haci cu e malbadonan? (b) Con Jehova lo recompensa e hustonan?

¹⁰ Debi cu e ta un Dios di amor y ta odia maldad, e lo elimina tur maldad for di henter universo ora e resolve e cuestion tocante gobernacion na un manera satisfactorio. E Palabra di Dios ta priminti: “Hacidonan di maldad lo wordo corta kita afo; ma esnan cu spera riba SEÑOR lo hereda e Tera. Pasobra aki poco tempo e malbado lo no t’ey mas ... E enemigonan di SEÑOR lo ta manera flor di sabana: nan ta disparce—manera huma nan ta disparce.”—Sal. 37:9, 10, 20.

¹¹ Tambe Dios su palabra ta priminti: “E hustonan lo hereda e Tera, y lo biba den dje pa semper.” (Sal. 37:29) E hustonan “lo deleita nan mes den pas abundante.” (Sal. 37:11) Esaki lo tuma luga pasobra nos Dios amoroso semper ta haci lo mihor pa su fiel sirbidornan. Bijbel ta bisa: “Lo e seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas. E cosnan cu tabata pasa antes no t’ey mas.” (Rev. 21:4) Esta un futuro maraviyoso ta spera tur esnan cu ta aprecia e amor di Jehova y ta obedec’e como nan gobernante!

12. Ken ta ser considera como hende “sin culpa”?

¹² Bijbel ta bisa nos: “Tuma nota di e hende perfecto [of, “sin culpa”, NW], y observa esun cu ta recto; pasobra e hende di paz lo tin descendiente. Ma transgresornan conhuntamente lo wordo destrui; e descendientenan di e malbado lo wordo corta kita afo.” (Sal. 37:37, 38) E hende “sin culpa” ta siña conoce Jehova y su Yiu, y na un manera obediente e ta haci e boluntad di Dios. (Lesa Juan 17:3.) Un persona asina ta kere e palabranan na 1 Juan 2:17 cu ta bisa: “Mundo ta pasa bay y tambe su deseonan, ma esun cu ta haci e boluntad di Dios ta keda pa semper.” Segun cu e mundo ta yegando su fin, ta importante pa nos “spera riba SEÑOR y sigui su caminda.”—Sal. 37:34.

13. Kico ta e muestra mas grandi di Jehova su amor?

¹³ Aunke nos ta imperfecto, nos por sigui Jehova “su caminda.” Ademas, nos por tin un relacion intimo cu Jehova pa medio di e sacrificio di rescate di Hesus, cual ta e muestra mas grandi di Dios su amor. Esaki ta haci posibel cu tur esnan obediente por ta liber di pica y morto cu nan a hereda  for di Adam. (Lesa Romanonan 5:12; 6:23.) Hesus tabata fiel na su Tata pa miles di aña caba den cielo, pues Jehova tabatin confianza cu su Yiu lo keda fiel riba Tera. Como un Tata amoroso, sin duda a duel e pa mira e trato inhusto cu Hesus a haya ora e tabata riba Tera. Sinembargo, fielmente Hesus a apoya e soberania di Dios y a demostra cu un hende perfecto por mantene nan integridad na Jehova hasta bou di e circunstancianan di mas dificil.

14, 15. Kico e morto di Hesus a haci posibel?

¹⁴ A pesar di a enfrenta pruebanan hopi dificil, Hesus a keda leal na su Tata te na morto. Esta agradecido nos ta cu Hesus su morto a paga e prijs di rescate pa humanidad y a habri caminda pa nos por haya bida eterno den e mundo nobo! Apostel Pablo a mustra con grandi e acto di amor di parti di Jehova y Hesus tabata ora el a bisa: “De echo, mientras cu nos tabata debil ainda, Cristo a muri pa hende malbado na e tempo stipula. Pasobra masha poco biaha un persona lo muri pa un hende husto; si, pa un bon hende, kisas, un persona por risca muri. Pero Dios a demostra su amor pa nos di e manera aki: Cristo a muri pa nos mientras cu nos tabata pecador  ainda.” (Rom. 5:6-8) Apostel Juan a skirbi: “Pa medio di esaki Dios a revela e amor cu e tin pa nos: Dios a manda su Yiu unigenito na mundo pa nos por haya bida pa medio di dje. E amor ey ta nifica esaki: no ta nos a stima Dios, sino ta e a stima nos y a manda su Yiu como un sacrificio di reconciliacion pa nos picanan.”—1 Juan 4:9, 10.

¹⁵ Tocante Dios su amor pa humanidad, Hesus a bisa: “Dios a stima mundo asina tanto cu el a duna su Yiu unigenito, pa tur cu pone fe den dje no bay perdi, ma haya bida eterno.” (Juan 3:16) Jehova a duna su Yiu como rescate aunke esey a hacie hopi dolor. Esaki ta mustra cuanto amor e tin pa hende, y e amor ey lo dura pa semper. Pablo a bisa: “Mi ta convenci cu ni morto ni bida, ni angel ni gobierno, ni loke tin awor ni loke tin cu bin, ni podernan, ni haltura ni profundidad, ni ningun otro creacion lo por separa nos for di e amor di Dios expresa mediante Cristo Hesus, nos Señor.”—Rom. 8:38, 39.

16. Kico e Reino Mesianico ta, y ken Jehova a scoge pa ta e gobernante?

¹⁶ E Reino Mesianico ta un otro muestra di Dios su amor. Ken Jehova a nombra pa goberna? El a nombra su Yiu, kende ta stima humanidad y ta completamente cualifica pa goberna. (Prov. 8:31) Dios a scoge 144.000 hende pa goberna hunto cu Hesus den cielo. Nan sa kico ta nifica pa ta un ser humano, y nan lo uza e experencia ey ora nan resucita. (Rev. 14:1) E tema principal di Hesus su siñansa tabata e Reino, y el a siña su discipelnan haci oracion na e siguiente manera: “Nos Tata cu ta den cielo, bo nomber sea santifica. Laga bo Reino bin. Laga bo boluntad sosode, mescos cu den cielo, tambe riba Tera.” (Mat. 6:9, 10) Ora e peticion ey bira realidad, humanidad lo experencia bendicionnan sin fin.

17. Ki contraste tin entre e gobernacion di Hesus y esun di hende?

¹⁷ Ki un contraste tin entre Hesus su manera amoroso di goberna y e gobiernonan humano cu a causa e morto di miyones di hende den guera! Hesus ta interesa den hende y ta imita Dios su bunita cualidadnan, specialmente su amor. (Rev. 7:10, 16, 17) Hesus a bisa: “Bin cerca mi, boso tur cu ta traha duro y cu ta carga, y lo mi refresca boso. Tuma mi yugo riba boso schouder y siña di mi, pasobra mi tin un genio suave y un curason humilde, y boso alma lo keda refresca. Pasobra mi yugo ta suave, y mi carga no ta pisa.” (Mat. 11:28-30) Esta un bunita promesa esey ta!

18. (a) Kico e Reino di Dios ta haciendo desde 1914? (b) Kico nos lo considera den e siguiente articulo?

¹⁸ Profecia di Bijbel ta mustra cu e Reino di Dios a cuminsa goberna den cielo na aña 1914. For di e tempo ey, a reuni e resto di esnan cu lo goberna cu Hesus den cielo y tambe un “multitud grandi” di hende cu lo sobrevivi e fin di e sistema aki y drenta den e mundo nobo. (Rev. 7:9, 13, 14) Cuanto hende ta forma parti di e multitud grandi awe? Kico Dios ta rekeri di nan? E siguiente articulo lo contesta e preguntanan aki.