Amor ta encera un cariño profundo pa otro hende. Un persona amoroso ta demostra cu echo y palabra kico e ta sinti pa esnan cu e ta stima, maske esey ta envolve sacrificio di su parti.

Moises tabatin un gran amor pa Dios. Con el a mustra esey? Wel, corda e palabranan di 1 Juan 5:3: “Amor pa Dios ta nifica cu nos ta cumpli cu su mandamentonan.” Moises a biba na harmonia cu e principio ey. Por ehempel, tur loke Dios a pidie haci—for di loke a parce e tarea di mas simpel, esta, di saca su bara riba Lama Cora, te na esun di mas dificil, esta, di enfrenta e Farao poderoso—Moises a obedece. Sea e mandamento tabata facil of dificil pa cumpli cu ne, loke Dios a ordena Moises, “asina el a haci.”—Exodo 40:16.

Moises a mustra amor na e otro Israelitanan. Nan tabata sa cu Jehova tabata guia su pueblo pa medio di Moises; pesey, nan a acudi na dje cu nan problemanan. Bijbel ta bisa: “E pueblo tabata para rond di Moises for di mainta te atardi.” (Exodo 18:13-16) Imagina con cansa Moises lo ­tabata keda despues di scucha e Israelitanan ­desahoga nan mes cerca dje pa oranan largo. Sinembargo, Moises tabata contento cu e por a yuda nan.

Ademas di scucha nan, Moises a haci oracion tambe pa e hendenan cu el a stima. Figura bo, el a hasta haci oracion pa esnan cu a trat’e malo. Por ehempel, ora Miriam, ruman muher di Moises, a murmura contra Moises, Jehova a dal Miriam cu lepra. En bes di alegra cu Dios a castiga Miriam, Moises mesora a haci oracion p’e, bisando: “O Dios, cur’e, mi ta pidi bo!” (Numbernan 12:13) Ta amor so por a motiva Moises pa haci e suplica sincero ey.

Nos por imita Moises ora nos ta desaroya un amor profundo pa Dios. E amor ey ta motiva nos pa obedece su mandamentonan “di curason.” (Romanonan 6:17) Ora nos ta obedece Jehova di curason, nos ta haci su curason contento. (Proverbionan 27:11) Esey ta bon pa nos mes tambe. Al fin y al cabo, ora nos ta sirbi Dios pa motibo cu nos ta stim’e di berdad, no solamente nos lo haci loke ta corecto, sino nos lo tin goso tambe den loke nos ta haci.—Salmo 100:2.

Tambe nos por imita Moises ora nos ta desaroya un amor abnega of sin egoismo pa otro hende. Ora nos amigonan of famianan bin cerca nos cu nan problemanan, amor lo motiva nos pa (1) duna nan atencion di curason, (2) pone nos mes na nan luga, of sinti loke nan ta sinti, y (3) laga nan sa cu nos ta interesa den nan.

Mescos cu Moises, nos por haci oracion pa nos sernan keri. Tin biaha nos por sinti nos malo cu nos no por yuda nan ora nan conta nos nan problemanan. Nos por hasta lamenta: “Ta duel mi cu e unico cos cu mi por haci pa bo ta oracion.” Pero corda: “Suplica di un hende husto tin hopi poder y ta masha efectivo.” (Santiago 5:16) En realidad, nos oracionnan lo por impulsa Jehova pa haci algo pa e persona cu di otro manera E lo no a haci. Bo no ta kere cu e mihor cos cu nos por haci pa nos sernan keri ta oracion? *

Bo no ta haya cu nos por siña hopi for di Moises? Maske e tabata un homber masha gewoon, el a pone un excelente ehempel di fe, humildad y amor. Mas nos imita su ehempel, mas esey lo beneficia nos mes y tambe otro hende.—Romanonan 15:4.