SI BO ta un mayor, bo por compronde e sintimentonan expresa den e ehempelnan ey? Ora bo haya bo mes den situacionnan similar, kisas bo ta puntra bo mes: ‘Mi mester disciplina mi yiu? Si ta si, con?’ Of, ‘ta malo pa disciplina yiu?’

Den Bijbel e palabra “disciplina” no ta djis un otro palabra pa castigo. Disciplina ta relaciona principalmente cu instruccion, educacion y coreccion. E no tin nada di haber cu abuso ni crueldad.—Proverbionan 4:1, 2.

Nos por compara e disciplina cu un mayor ta duna cu trahamento den un hardin. Un hardinero ta prepara su tera, muha su matanan y duna nan vitamina. Ademas, e ta proteha nan contra pest y mal yerba. Segun cu e matanan ta crece, rato rato e hardinero tin cu snoei nan pa yuda nan crece den e direccion corecto. E hardinero sa cu e por uza un combinacion di varios tecnica pa yuda e matanan crece na un manera saludabel. Asina tambe, mayornan ta educa nan yiunan na diferente manera. Pues, mescos cu un hardinero ta snoei mata, asina un mayor ta uza disciplina pa corigi mal conducta for di trempan pa yuda nan yiunan crece den e direccion corecto. Pero si e hardinero no snoei e matanan cu cuidou, nan por sufri daño permanente. Mescos tambe, mayornan mester duna disciplina cu amor.

Jehova, e Dios cu Bijbel ta papia di dje, ta un bon ehempel pa mayornan den esaki. E disciplina cu Dios ta duna su sirbidornan obediente ta asina eficaz y agradabel cu nan ta yega na “stima disciplina.” (Proverbionan 12:1) Nan ‘no ta rechasa e disciplina di SEÑOR, ni aborece su reprendemento.’ (Proverbionan 3:11) Bo por yuda bo yiu reacciona faborablemente na bo disciplina ora bo imita e tres maneranan clave cu Dios ta hacie. Dios ta duna disciplina na un manera: (1) amoroso, (2) rasonabel y (3) consistente.

Dios ta duna disciplina cu amor y motiva pa amor. Bijbel ta bisa: “Esun cu SEÑOR ta stima, e ta reprende, mescos cu un tata ta reprende e yiu cu e tin delicia den dje.” (Proverbionan 3:12) Ademas, Jehova ta ‘yen di compasion y gracia, y e no ta rabia lihe.’ (Exodo 34:6) E no ta sin gevoel ni e no ta duna disciplina na un manera cruel. Tampoco e no ta papia na un manera sarcastico of uza palabra skerpi y critica constante; e cosnan ey ta “manera hinca di spada” y por haci dolor.—Proverbionan 12:18.

Ta berdad cu ningun mayor no por imita Dios su ehempel perfecto di dominio propio completamente. Pero hasta ora bo pasenshi yega na su limite den momentonan dificil, corda semper cu si bo duna castigo cu rabia, e straf lo ta di mas y lo no duna e resultadonan desea. Ademas, esey no ta disciplina mes. Al contrario, e ta un señal di cu bo a perde cabes.

Di otro banda, ora bo ta duna disciplina cu amor y dominio propio, e resultado lo ta mihor. Awor, laga nos wak con George y Nicole, dos di e mayornan menciona na comienso, a trata cu nan situacion.

“Ora cu porfin Jordan a yega cas, ami cu mi casa tabata cunsumi, pero nos a controla nos emocionnan mientras nos tabata scucha su splicacion. Ya cu tabata asina laat, nos a dicidi di laga e asunto pa mainta. Nos a haci oracion hunto y bay drumi. Su manece, nos tabata den un mihor posicion pa papia riba e asunto na un manera calmo, y nos a logra yega na nos yiu su curason. El a reconoce su fout mesora y no tabatin problema pa acepta e restriccionnan cu nos a pone p’e. Nos ta hopi contento cu nos a realisa cu ora un hende duna un contesta lihe den su rabia, e no ta haya bon resultado. Si nos tuma tempo pa scucha prome, casi semper cosnan ta sali mihor.”—George.

“Mi tabata hopi rabia ora mi a mira cu mi yiu homber a dal su ruman muher sin motibo. En bes di reacciona mesora, mi a mand’e bay den su camber pasobra mi tabata mucho rabia pa tuma un decision rasonabel. Mas despues, ora mi tabata mas trankil, na un manera firme mi a splica mi yiu homber cu violencia no ta aceptabel y mi a mustr’e con el a laga su ruman muher sinti. Esaki a duna un bon resultado. El a pidi su ruman muher despensa y a dun’e un brasa.”—Nicole.

Si, pa disciplina por ta eficaz, hasta ora bo tin cu straf bo yiu, e mester ta semper motiva pa amor.

Semper Jehova ta duna su disciplina “manera mester ta.” (Jeremias 30:11; 46:28) E ta tene cuenta cu tur circunstancia, hasta loke no ta asina bisto. Con mayornan por imit’e? Stephen, kende a ser menciona na comienso, ta splica: “Nos no por a compronde dicon Natalie a keda insisti cu e no a horta e renchi. Maske esey a dal nos duro, nos a purba toch di tene cuenta cu su edad y su grado di madurez.”

Nicole su casa, Robert, tambe ta purba di tene cuenta cu tur circunstancia. Ora e muchanan comporta nan mes malo, bes tras bes e ta puntra su mes: ‘Esaki ta algo cu ta pasa un biaha so of e ta bay bira un mal custumber? Ta cansa e muchanan ta? Ta malo nan ta sinti nan? E mal comportacion aki ta un señal di un otro problema?’

Mayornan rasonabel ta corda tambe cu mucha no ta adulto chikito. Apostel Pablo a reconoce esaki ora el a bisa: “Tempo mi tabata mucha, mi tabata papia manera mucha, pensa manera mucha.” (1 Corintionan 13:11) Robert ta bisa: “Un cos cu ta yuda mi tene un punto di bista balansa y evita di exagera e asunto ta di corda kico mi mes tabata haci ora mi tabata chikito.”

Ta hopi importante pa bo tin expectativanan realistico y na mes momento no hustifica of tolera conducta of actitud robes. Ora bo tene cuenta cu bo yiu su capacidad-, limitacion- y otro circunstancianan, bo por ta sigur cu bo disciplina lo ta balansa y rasonabel.

Malakias 3:6 ta bisa: “Ami, SEÑOR, no ta cambia.” Sirbidornan di Dios ta sinti nan mes sigur pasobra nan tin pleno confianza den e palabranan ey. Mucha tambe lo tin e mesun sintimentonan ey ora nan haya disciplina consistente. Si bo disciplina ta varia segun bo beis, bo yiu por keda confundi of hasta sinti su mes frustra.

Corda cu Hesus a bisa: “Laga boso ‘si’ ta si, y boso ‘no’, no.” E palabranan aki ta aplica na criamento di yiu tambe. (Mateo 5:37) Pensa bon prome cu bo priminti di haci algo. Si bo spierta bo yiu cu si e comporta su mes malo e lo haya disciplina, zorg pa bo cumpli cu bo palabra.

Bon comunicacion entre e mayornan ta esencial pa duna disciplina consistente. Robert ta splica: “Si mi yiunan logra convence mi pa laga nan haci algo cu mi casa a bisa nan no caba, asina cu mi haya sa, mi ta cambia mi decision pa mi apoya mi casa.” Si mayornan no por yega na un acuerdo tocante con pa trata un situacion, ta bon pa nan bay papia riba e asunto nan so prome y yega na un decision unanime.

Si bo imita Jehova su disciplina amoroso, rasonabel y consistente, bo por ta sigur cu bo esfuersonan lo beneficia bo yiunan. Esaki por yuda bo yiunan crece y bira adultonan maduro, responsabel y balansa. Manera Bijbel ta bisa: “Instrui un mucha den e caminda cu e mester cana, y hasta ora cu e bira bieu e lo no aparta su mes for di dje.”—Proverbionan 22:6.