1, 2. Ki klase di sufrimentu hende ta konfrontá awe, hibando hopi di nan na hasi ki pregunta?

DESPUES di un bataya teribel den un pais asotá pa guera, a dera e míles di sivilnan ku a ser matá, prinsipalmente hende muhé i mucha, den un solo graf rondoná di krus chikí. Riba kada krus tabatin skirbí: “Dikon?” Tin biaha esaki ta e pregunta di mas doloroso ku tur. Hende ta puntra esei yen di tristesa ora ku guera, desaster, malesa òf krímen kita bida di nan sernan kerí inosente, destruí nan kas òf kousa nan masha hopi sufrimentu den otro manera. Nan ke sa dikon tal tragedia ta sosodé ku nan.

² Dikon Dios ta permití sufrimentu? Si Yehova Dios ta todopoderoso, amoroso, sabí i hustu, dikon mundu tin asina tantu odio i inhustisia? Abo a yega di puntra bo mes e kosnan aki?

3, 4. (a) Kiko ta mustra ku no ta malu pa puntra dikon Dios ta permití sufrimentu? (b) Kiko Yehova ta pensa di maldat i sufrimentu?

³ Ta malu pa puntra dikon Dios ta permití sufrimentu? Tin hende ta preokupá ku si nan hasi un pregunta asina, esei ta nifiká ku nan no tin sufisiente fe òf ku nan ta mustra falta di rèspèt pa Dios. Sin embargo, ora bo lesa Beibel lo bo ripará ku hende fiel, temeroso di Dios, tabatin  pregunta similar. Por ehèmpel, profeta Habakuk a puntra Yehova: “Pakiko bo ta hasi mi mira inikidat, i ta hasi mi mira maldat? Sí, destrukshon i violensia ta mi dilanti; tin desunion i pleitu ta lanta.”—Habakuk 1:3.

⁴ Akaso Yehova a skual e fiel profeta Habakuk pasobra el a hasi tal pregunta? Nò. Mas bien Dios a inkluí Habakuk su palabranan sinsero den e registro inspirá di Beibel. Tambe Dios a yud’é haña un komprondementu mas kla di e asuntu i un fe mas grandi. Yehova ke hasi meskos pa bo. Kòrda ku Beibel ta siña ku ‘e ta perkurá pa bo.’ (1 Pedro 5:7) Dios ta odia maldat i e sufrimentu ku esei ta kousa, muchu mas ku kualke hende ta odia nan. (Isaias 55:8, 9) Dikon anto tin asina tantu sufrimentu den mundu?

5. Ki motibunan hende sa duna komo splikashon pa sufrimentu humano, pero kiko Beibel ta siña?

⁵ Hende di vários religion a bai serka nan lider- i guianan religioso pa puntra dikon tin asina tantu sufrimentu. Hopi biaha e kontesta ku nan ta haña ta ku sufrimentu ta Dios su boluntat i ku for di hopi tempu pasá  el a determiná tur kos ku mester sosodé, inkluso susesonan trágiko. Hopi otro hende ta tende komo kontesta ku Dios su kamindanan ta misterioso òf ku e ta laga hende muri—asta mucha—pa asina e por tin nan den shelu serka dje. Pero manera bo a siña, Yehova Dios nunka ta kousa loke ta malu. Beibel ta bisa: “Leu sea di Dios di hasi maldat, i di e Todopoderoso di kometé inikidat”!—Jòb 34:10.

6. Dikon hopi hende ta hasi e fout di kulpa Dios pa e sufrimentu ku tin den mundu?

⁶ Bo sa dikon hende ta hasi e fout di kulpa Dios pa tur e sufrimentu ku tin den mundu? Den hopi kaso, nan ta kulpa Dios Todopoderoso pasobra nan ta pensa ku é ta e berdadero gobernante di e mundu aki. Nan no sa un bèrdat simpel pero importante ku Beibel ta siña. Bo a siña e bèrdat ei den Kapítulo 3 di e buki aki. E berdadero gobernante di e mundu aki ta Satanas e Diabel.

7, 8. (a) Kon mundu ta reflehá e personalidat di su gobernante? (b) Kon imperfekshon humano i “tempu i suseso imprevisto” a kontribuí na sufrimentu?

⁷ Beibel ta deklará bon kla: “Henter mundu ta bou di kontròl di e malbado.” (1 Juan 5:19) Ora bo pensa un ratu riba esaki, bo no ta haña ku esei ta lógiko? E mundu aki ta reflehá e personalidat di e kriatura spiritual invisibel ku ta “gaña henter mundu.” (Revelashon 12:9) Satanas ta odioso, engañoso i kruel. Pues e mundu, bou di su influensia, ta yen di odio, engaño i krueldat. Esei ta un motibu pakiko tin asina tantu sufrimentu.

⁸ Un di dos motibu pakiko tin asina tantu sufrimentu ta ku—manera nos a trata den Kapítulo 3—humanidat ta imperfekto i pekaminoso for di tempu di e rebelion den e hòfi di Edén. Hende pekaminoso ta inkliná na lucha pa dominá otro, i esaki ta resultá den guera, opreshon i sufrimentu. (Eklesiastés 4:1; 8:9) Un di tres motibu pa  sufrimentu ta “tempu i suseso imprevisto.” (Eklesiastés 9:11, NW) Den un mundu ku no tin Yehova komo su Gobernante protektivo, hende kisas ta sufri pasobra pa kasualidat nan ta na e lugá robes na e momentu robes.

9. Dikon nos por ta sigur ku Yehova tin un bon motibu pa permití sufrimentu sigui?

⁹ Pa nos ta un konsuelo pa sa ku Dios no ta kousa sufrimentu. E no ta responsabel pa e gueranan, krímennan, opreshon òf asta desasternan natural ku ta pone hende sufri. Pero tòg nos ke sa: Dikon Yehova ta permití tur e sufrimentu aki? Si e ta e Todopoderoso, e tin e poder pa stòp e. Dikon anto e no ta usa su poder pa hasi esei? E Dios amoroso ku nos a siña konosé mester tin un bon motibu.—1 Juan 4:8.

10. Kiko Satanas a kuestioná, i kon?

¹⁰ Pa nos haña sa dikon Dios ta permití sufrimentu, nos tin ku bai bèk na e tempu ku sufrimentu a kuminsá. Ora Satanas a pone Adam ku Eva desobedesé Yehova, un kuestion importante a surgi. Satanas no a kuestioná Yehova su poder. Asta Satanas sa ku Yehova su poder no tin límite. Satanas mas bien a kuestioná Yehova su derecho di goberná. Dor di yama Dios un mentiroso ku ta skonde loke ta bon for di su súpditonan, Satanas a akusá Yehova di ta un mal gobernante. (Génesis 3:2-5) Satanas a bisa indirektamente ku lo a bai humanidat mas mihó sin Dios su gobernashon. Esaki tabata un atake kontra Yehova su soberania, esta, su derecho di goberná.

11. Dikon Yehova no a djis destruí e rebeldenan den Edén?

¹¹ Adam ku Eva a rebeldiá kontra Yehova. De echo, nan a bisa: “Nos no tin mester di Yehova komo nos Gobernante. Nos por disidí pa nos mes loke ta bon i loke ta malu.” Kon Yehova por a resolvé e kuestion ei? Kon lo e  por a siña tur kriatura inteligente ku e rebeldenan tabata ekiboká i ku su kaminda ta realmente esun mihó? Un persona lo por bisa ku Dios simplemente mester a destruí e rebeldenan i kuminsá di nobo. Pero Yehova a deklará su propósito di yena e tera ku desendientenan di Adam ku Eva, i e tabata ke pa nan biba den un paradeis riba tera. (Génesis 1:28) Yehova semper ta kumpli ku su propósito. (Isaias 55:10, 11) Ademas, destrukshon di e rebeldenan den Edén lo no a kontestá e pregunta ku a surgi relashoná ku Yehova su derecho di goberná.

12, 13. Duna un ehèmpel ku ta mustra dikon Yehova a permití Satanas bira gobernante di e mundu aki i dikon Dios a permití hende goberná nan mes.

¹² Laga nos duna un ehèmpel. Imaginá ku un dosente ta splika su alumnonan kon pa resolvé un sòm òf problema difísil di matemátika. Un alumno sabí pero rebelde ta pretendé ku e dosente su manera di resolvé e problema ta robes. Pa indiká ku e dosente no ta kapasitá, e rebelde aki ta insistí ku e sa un manera muchu mas mihó pa resolvé e problema. Algun alumno ta pensa ku e tin rason,  i nan tambe ta bira rebelde. Kiko e dosente mester hasi? Si e saka e rebeldenan for di klas, ki efekto esei lo tin riba e otro alumnonan? Nan lo kere ku e alumno rebelde i esnan ku a djòin e tin rason, tòg? Tur e otro alumnonan den klas lo por pèrdè rèspèt pa e dosente, pensando ku e tin miedu ku nan lo proba ku e ta robes. Pero suponé ku e dosente permití e rebelde mustra e klas kon é lo a solushoná e problema.

¹³ Yehova a hasi algu paresido na loke e dosente ta hasi. Kòrda ku e rebeldenan den Edén no tabata e únikonan enbolbí. Tabatin miónes di angel ta wak. (Jòb 38:7; Daniel 7:10) E manera ku Yehova a atendé e rebelion lo tabatin un gran efekto riba tur e angelnan ei i ku tempu riba tur kriatura inteligente. Pues, kiko Yehova a hasi? El a permití Satanas mustra kon Satanas lo a goberná humanidat. Tambe Dios a permití hende goberná nan mes bou di guia di Satanas.

14. Ki benefisio lo resultá di Yehova su desishon di permití hende goberná nan mes?

¹⁴ E dosente den nos ehèmpel sa ku e rebelde i e alumnonan ku a tuma parti p’e ta robes. Pero e sa tambe ku dor di duna nan e chèns di purba proba nan punto, henter e klas lo benefisiá. Ora e rebeldenan frakasá, tur alumno onesto lo mira ku e dosente ta esun kualifiká pa dirigí e klas. Nan lo komprondé dikon despues di esei e dosente lo saka ken ku rebeldiá for di klas. Asina tambe, Yehova sa ku tur hende i angel di kurason onrado lo benefisiá di mira ku Satanas i su kompañeronan rebelde a frakasá i ku hende no por goberná nan mes. Meskos ku Jeremias di pasado, nan lo siña e bèrdat sumamente importante aki: “O SEÑOR, mi sa ku e kaminda di hende no ta di dje mes; tampoko no ta keda na hende pa dirigí su pasonan.”—Jeremias 10:23.

15, 16. (a) Dikon Yehova a permití sufrimentu sigui pa asina tantu tempu? (b) Dikon Yehova no a prevení kosnan manera krímennan horibel?

¹⁵ Pero dikon Yehova a permití sufrimentu sigui pa asina tantu tempu? I dikon e no ta sòru pa kos malu no sosodé? Wèl, konsiderá dos kos ku e dosente den nos ehèmpel lo no hasi. Na promé lugá, lo e no stòp e alumno rebelde di presentá su kaso. Na di dos lugá, e dosente lo no yuda e rebelde proba su kaso. Asina tambe, konsiderá dos kos ku Yehova a determiná di no hasi. Na promé lugá, e no a stòp Satanas i esnan ku a tuma parti p’e di purba proba ku nan tin rason. P’esei tabata nesesario pa laga tempu pasa. Durante e míles di añanan di historia humano, hende a haña chèns di purba tur forma di goberná nan mes, esta, gobernashon humano. Humanidat a hasi algun avanse den siensia i riba otro terenonan, pero inhustisia, pobresa, kriminalidat i guera a bai di malu pa pió. Awor a keda demostrá ku gobernashon humano ta un frakaso.

¹⁶ Na di dos lugá, Yehova no a yuda Satanas goberná e mundu aki. Por ehèmpel, si Dios lo mester a prevení krímennan horibel, de echo lo e ta dunando sosten na e kaso di e rebeldenan, no ta bèrdat? Dios lo a laga hende pensa e ora ei ku kisas hende por goberná nan mes sin resultadonan desastroso, no ta bèrdat? Si Yehova lo mester a aktua den e manera ei, lo el a partisipá den un mentira. Sin embargo, “ta imposibel pa Dios gaña.”—Hebreonan 6:18.

17, 18. Kiko Yehova lo hasi ku tur e daño ku a resultá dor di e gobernashon di hende i dor di e influensia di Satanas?

¹⁷ Pero kiko di tur e daño ku a ser hasí durante e tempu largu di rebelion kontra Dios? Ta bon pa nos kòrda ku Yehova ta todopoderoso. P’esei e por i lo drecha e daño ku sufrimentu humano a kousa. Manera nos a siña kaba,  lo bai drecha e daño kousá na nos planeta dor di kombertí e tera den Paradeis. Lo eliminá e efektonan di piká pa medio di fe den Hesus su sakrifisio di reskate, i lo kanselá e efektonan di morto mediante e resurekshon. Pues anto, Dios lo usa Hesus “pa e destruí e obranan di Diabel.” (1 Juan 3:8) Yehova lo kumpli ku tur esaki nèt na tempu. Nos por ta kontentu ku e no a aktua mas promé, pasobra su pasenshi a duna nos e oportunidat di siña e bèrdat i sirbié. (2 Pedro 3:9, 10) Miéntras tantu, Dios a keda aktivo buskando adoradónan sinsero i yudando nan soportá kualke sufrimentu ku lo por bin riba nan den e mundu aki yen di problema.—Juan 4:⁠23; 1 Korintionan 10:13.

¹⁸ Tin hende kisas ta puntra nan mes: Dios no por a prevení tur e sufrimentu aki dor di krea Adam ku Eva di tal manera ku nan lo no por a rebeldiá? Pa kontestá e pregunta ei bo tin ku kòrda riba un regalo presioso ku Yehova a duna bo.

19. Ki regalo presioso Yehova a duna nos, i dikon nos mester apresiá su balor?

¹⁹ Manera a keda menshoná den Kapítulo 5, Dios a krea hende ku boluntat liber. Bo ta realisá ki un regalo presioso esei ta? Dios a traha masha hopi bestia mes, i por lo general ta instinto ta dirigí nan. Hende a traha algun robòt ku nan por programá pa sigui tur òrdu. Nos lo tabata felis si Dios a traha nos manera robòt? Nò. Nos ta kontentu ku nos tin e libertat di  skohe ki klase di persona nos lo ta, ki rumbo den bida nos lo sigui, ki amistatnan nos lo forma, etcetera. Nos gusta tin un sierto grado di libertat, i esei ta loke Dios ke pa nos tin.

20, 21. Kon ta e mihó manera ku nos por usa e regalo di boluntat liber, i dikon nos lo mester ke hasi esei?

²⁰ Yehova no ta interesá den sirbishi obligá. (2 Korintionan 9:7) Un ehèmpel. Ku kiko un mayor lo keda mas kontentu: ora un yu ekspresá su gratitut di kurason òf ora e hasié obligá? Pues e pregunta ta: Kon abo lo usa e boluntat liber ku Yehova a duna bo? Satanas, Adam i Eva a usa nan boluntat liber na e manera di mas malu. Nan a rechasá Yehova Dios. Kiko abo lo hasi?

²¹ Bo tin e oportunidat pa usa e regalo maravioso di boluntat liber na e mihó manera ku tin. Bo por djòin e miónes di personanan ku a tuma un posishon firme na banda di Yehova. Nan ta hasi Dios kontentu pasobra aktivamente nan ta partisipá den proba ku Satanas ta un mentiroso i un gran frakaso komo gobernante. (Proverbionan 27:11) Abo tambe por hasi esei dor di skohe e rumbo korekto di bida. Den e siguiente kapítulo nos lo splika esaki.