1, 2. (a) Dikon e echo ku nos a yega di tende di un hende famoso no ke men ku realmente nos konos’é? (b) Ki konfushon tin tokante Hesus?

TIN hopi hende famoso na mundu. Tin di nan ta bon konosí den nan propio komunidat, stat òf pais. Otronan ta konosí rònt mundu. Sin embargo, si bo djis sa nòmber di un persona famoso no ke men ku di bèrdat bo konos’é. Esei no ke men ku bo konosé detayenan di su background i kon e ta realmente komo persona.

² Hende rònt mundu a yega di tende algu tokante Hesukristu, maske el a biba riba tera un 2.000 aña pasá. Sin embargo, hopi hende no sa presis ta ken Hesus realmente tabata. Tin hende ta bisa ku e tabata simplemente un bon hòmber. Otronan ta pretendé ku e no tabata nada mas ku un profeta. Tambe tin hende ta kere ku Hesus ta Dios i ku mester ador’é. Bèrdat mester ador’é?

3. Dikon ta importante pa abo konosé e bèrdat tokante Hesus?

³ Ta importante pa abo sa e bèrdat tokante Hesus. Dikon? Pasobra Beibel ta bisa: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Juan 17:3) Sí, konosé e bèrdat tokante Yehova Dios i Hesukristu por hiba na bida eterno den un paradeis riba tera. (Juan 14:6) Ademas, Hesus a pone e mihó ehèmpel pa nos den kon pa biba i kon pa  trata otro hende. (Juan 13:34, 35) Den e promé kapítulo di e buki aki, nos a konsiderá e bèrdat tokante Dios. Awor laga nos analisá loke Beibel realmente ta siña tokante Hesukristu.

4. Kiko e títulonan “Mesias” i “Kristu” ta nifiká?

⁴ Hopi tempu promé ku Hesus a nase, Beibel a predisí binida di un persona ku Dios lo a manda komo e Mesias òf Kristu. Tantu e título “Mesias” (ku ta bin di un palabra hebreo) komo “Kristu” (ku ta bin di un palabra griego) ta nifiká “E Ungí.” Dios lo a ungi, es desir, nombra Esun primintí aki na un puesto spesial.  Den kapítulonan mas despues di e buki aki nos lo siña mas tokante e papel importante ku e Mesias ta hunga den kumplimentu di e promesanan di Dios. Tambe nos lo siña tokante e bendishonnan ku Hesus por trese pa nos for di awor. Pero promé ku Hesus a nase, hopi hende sin duda tabata puntra nan mes: ‘Ken lo resultá di ta e Mesias?’

5. E disipelnan di Hesus tabata plenamente konvensí di kiko relashoná kuné?

⁵ Den promé siglo di nos era, e disipelnan di Hesus di Názarèt tabata plenamente konvensí ku Hesus tabata e Mesias primintí. (Juan 1:41) Un di su disipelnan, un hòmber ku yama Simon Pedro, abiertamente a bisa Hesus: “Abo ta e Kristu.” (Mateo 16:16) Pero kon e disipelnan ei—i kon nos—por tin sigur ku Hesus realmente ta e Mesias primintí?

6. Kon nos por kompará e manera ku Yehova a yuda personanan fiel identifiká e Mesias?

⁶ E profetanan di Dios ku a biba promé ku Hesus, a predisí hopi detaye tokante e Mesias. E detayenan aki lo a yuda hende identifik’é. Nos lo por kompar’é asin’aki: Suponé ku nan a pidi bo pa bai na un parada di bùs hopi drùk òf na un stashon di trein òf na un aeropuerto pa buska un persona ku nunka bo a yega di topa. Lo no ta bon si un hende duna bo algun detaye di e persona? Asina tambe, pa medio di e profetanan di Beibel, Yehova a duna un deskripshon bastante detayá di loke e Mesias lo hasi i loke lo e pasa aden. Kumplimentu di e tantísimo profesianan aki lo a yuda personanan fiel identifik’é klaramente.

7. Menshoná dos profesia ku a kumpli en konekshon ku Hesus.

⁷ Konsiderá djis dos ehèmpel. Na promé lugá, mas ku 700 aña di antemano, profeta Mikeas a predisí ku Esun  primintí lo a nase na Bètlehèm, un stat chikí den e teritorio di Huda. (Mikeas 5:2) Na unda Hesus a nase? Wèl, presis den e stat ei! (Mateo 2:1, 3-9) Na di dos lugá, siglonan di antemano e profesia ku tin pará skirbí na Daniel 9:25 a señalá presis e aña ku e Mesias mester a aparesé: aña 29 di nos era. * Kumplimentu di e profesianan aki i otronan mas ta duna prueba ku Hesus tabata e Mesias primintí.

8, 9. Ki prueba ku Hesus tabata e Mesias a bira bisto na su boutismo?

⁸ Mas prueba ku Hesus tabata e Mesias a bira bisto kasi na fin di aña 29. Esei ta e aña ora ku Hesus a bai serka Juan Boutista pa ser batisá den Riu Hordan. Yehova a primintí Juan ku lo e dun’é un señal pa asina e por a identifiká e Mesias. Juan a mira e señal ei na Hesus su boutismo. Beibel ta bisa ku esaki ta loke a sosodé: “Despues di a wòrdu batisá, Hesus a sali mesora for di awa; i ata, e shelunan a wòrdu habrí i el a mira e spiritu di Dios baha manera un palomba i keda riba dje. I ata, un bos for di e shelunan, bisando: ‘Esaki ta mi Yu stimá, den kende mi tin goso.’” (Mateo 3:16, 17) Despues di mira i tende loke a sosodé, Juan no tabatin duda ku ta Dios a manda Hesus. (Juan 1:32-34) Na momentu ku Dios a drama su spiritu, òf forsa aktivo, riba Hesus e dia ei, Hesus a bira e Mesias òf Kristu, esun nombrá pa ta Lider i Rei.—Isaias 55:4.

⁹ Kumplimentu di profesia bíbliko i Yehova Dios su propio testimonio ta mustra bon kla ku Hesus tabata e Mesias primintí. Pero tambe Beibel ta kontestá dos otro pregunta importante tokante Hesukristu: Di unda el a bin, i ki klase di persona e tabata?

10. Kiko Beibel ta siña tokante Hesus su eksistensia promé ku el a bin na tera?

¹⁰ Beibel ta siña ku Hesus tabata biba den shelu promé ku el a bin na tera. Mikeas a profetisá ku e Mesias lo a nase na Bètlehèm i tambe ku Su orígen tabata “for di hopi tempu pasá.” (Mikeas 5:⁠2) Na hopi okashon Hesus mes a bisa ku el a biba den shelu promé ku el a nase komo hende. (Juan 3:13; 6:38, 62; 17:4, 5) Komo kriatura spiritual den shelu, Hesus tabatin un relashon spesial ku Yehova.

11. Kon Beibel ta mustra ku Hesus ta Yehova su Yu mas stimá?

¹¹ Hesus ta Yehova su Yu mas stimá, i ku bon motibu. E ta ser yamá “e primogénito di henter kreashon,” pasobra e tabata Dios su promé kreashon. * (Kolosensenan 1:15) Tin un kos mas ku ta hasi e Yu aki spesial. E ta e “Yu unigénito.” (Juan 3:16) Esaki ta nifiká ku Hesus ta e úniko kreá direktamente dor di Dios. Tambe Hesus ta e úniko ku Dios a usa ora Dios a krea tur otro kos. (Kolosensenan 1:16) Anto tambe Beibel ta yama Hesus “e Palabra.” (Juan 1:14) Esaki ta laga nos komprondé ku el a papia pa Dios, sin duda entregando mensahe i instrukshon na e otro yunan di e Tata, tantu e yunan spiritual komo humano.

12. Kon nos por sa ku e Yu primogénito no ta igual ku Dios?

¹² Akaso e Yu primogénito ta igual ku Dios, manera algun hende ta kere? Esei no ta loke Beibel ta siña. Manera nos a nota den e paragraf anterior, e Yu a ser kreá. Pues ta bisto ku e tabatin un kuminsamentu, miéntras ku Yehova Dios no tin kuminsamentu ni fin. (Salmo 90:2) E Yu  unigénito nunka no a yega di pensa mes pa purba di ta igual ku su Tata. Beibel ta siña bon kla ku e Tata ta mas ku e Yu. (Juan 14:28; 1 Korintionan 11:3) Yehova so ta “Dios Todopoderoso.” (Génesis 17:1) Pues anto, e no tin igual. *

13. Kiko Beibel ke men ora e ta referí na e Yu komo “e imágen di e Dios invisibel”?

¹³ Yehova i su Yu primogénito tabatin un amistat será ku otro pa míles di miónes di aña, hopi promé ku kreashon di e shelu yen di strea i e tera. Nan lo mester tabata stima otro masha hopi! (Juan 3:35; 14:31) E Yu stimá aki tabata meskos ku su Tata. Ta p’esei Beibel ta referí na e Yu komo “e imágen di e Dios invisibel.” (Kolosensenan 1:15) Sí, meskos ku un yu humano den vários manera por parse su tata masha hopi, asina e Yu selestial aki a reflehá e kualidatnan i personalidat di su Tata.

14. Kon tabata posibel pa Yehova su Yu unigénito nase komo hende?

¹⁴ Yehova su Yu unigénito boluntariamente a bandoná shelu i a bin na tera pa biba komo hende. Pero kisas bo ta puntra bo mes: ‘Kon por tabata posibel pa un kriatura spiritual nase komo hende?’ Pa logra esaki, Yehova a hasi un milager. El a transferí e bida di su Yu primogénito for di shelu te den matris di un bírgen hudiu ku tabata yama Maria. Ningun tata humano tabata enbolbé den esaki. Pues Maria a duna lus na un yu hòmber perfekto i a yam’é Hesus.—Lukas 1:30-35.

15. Dikon nos por bisa ku pa medio di Hesus nos ta siña konosé Yehova mihó?

¹⁵ Loke Hesus a bisa i hasi tempu ku e tabata riba tera ta yuda nos siña konos’é bon. Es mas, pa medio di Hesus  nos ta siña konosé Yehova mihó. Dikon ta asina? Kòrda ku e Yu aki ta un refleho perfekto di su Tata. Ta p’esei Hesus a bisa un di su disipelnan: “Esun ku a mira mi a mira e Tata.” (Juan 14:9) E kuater bukinan di Beibel konosí komo e Evangelionan—Mateo, Marko, Lukas i Juan—ta konta nos hopi kos tokante Hesukristu su bida, aktividatnan i kualidatnan personal.

16. Kiko tabata Hesus su mensahe prinsipal, i di unda su siñansanan a bin?

¹⁶ Hesus tabata bon konosí komo “Maestro.” (Juan 1:38; 13:13) Kiko el a siña hende? Su mensahe prinsipal tabata “e evangelio di reino,” esta, e bon notisia tokante e Reino di Dios, e gobièrnu selestial ku lo goberná henter e tera i lo trese bendishon sinfin pa hende obediente. (Mateo 4:23) Di ken e mensahe aki tabata? Hesus mes a bisa: “Mi siñansa no ta di mi, ma di Esun ku a manda mi,” esta, Yehova. (Juan 7:16) Hesus tabata sa ku su Tata ke pa hende tende tokante e bon notisia di e Reino. Den Kapítulo 8, nos lo siña mas tokante e Reino di Dios i kiko lo e logra.

17. Na unda Hesus a siña hende, i dikon el a hasi asina tantu esfuerso pa siña hende?

¹⁷ Na unda Hesus a siña hende? Tur kaminda ku el a haña hende: den kunuku i tambe den stat, den pueblito, den plasa i den nan kas. Hesus no a sinta warda pa hende bin serka dje. É a bai serka nan. (Marko 6:56; Lukas 19:5, 6) Dikon Hesus a hasi asina tantu esfuerso i dediká asina tantu tempu na prediká i siña hende? Pasobra esei tabata loke Dios tabata ke pa e hasi. Hesus semper a hasi e boluntat di su Tata. (Juan 8:28, 29) Pero tabatin un motibu mas pakiko el a prediká. El a sinti kompashon pa e multitutnan di hende ku a sali bin serka dje. (Mateo 9:35, 36) E hendenan ei a ser neglishá dor di nan lidernan religioso, kendenan lo mester tabata siña nan e bèrdat tokante Dios  i su propósitonan. Hesus tabata sa ku e hendenan tabatin hopi nesesidat di tende e mensahe di Reino.

18. Kua ta e kualidatnan di Hesus ku bo ta haña mas atraktivo?

¹⁸ Hesus tabata un hòmber di tierno kariño i ku hopi sintimentu. P’esei hende a konsider’é un persona bondadoso i fásil pa aserká. Asta mucha a sinti nan kómodo serka dje. (Marko 10:13-16) Hesus no a hasi distinshon di persona. El a odia korupshon i inhustisia. (Mateo 21:12, 13) Den e tempu ei, hende muhé a haña masha tiki rèspèt i tabatin tiki privilegio, pero e sí a trata nan ku dignidat. (Juan 4:9, 27) Hesus tabata realmente humilde. Na un okashon el a laba pia di su apòstelnan, un servisio ku normalmente ta un humilde kriá tabata hasi.

19. Menshoná algun ehèmpel ku ta mustra ku Hesus a mustra komprenshon pa e nesesidatnan di otro hende.

¹⁹ Hesus a mustra komprenshon pa e nesesidatnan di otro hende. Esaki tabata spesialmente bisto ora ku el a hasi milager òf kurashon ku poder di e spiritu di Dios.  (Mateo 14:14) Por ehèmpel, un hòmber ku lepra a bin serka Hesus i a bisa: “Si bo kier, bo por hasi mi bira limpi.” Hesus personalmente a sinti e hòmber aki su doló i sufrimentu. Motivá pa kompashon, Hesus a saka su man i mishi ku e hòmber, bisando: “Mi kier, sea limpi.” I e hòmber enfermo a kura! (Marko 1:40-42) Bo por imaginá kon e hòmber ei lo mester a sinti?

20, 21. Kon Hesus tabata un bon ehèmpel di fiel obedensia na Dios?

²⁰ Hesus a pone e mihó ehèmpel di fiel obedensia na Dios. El a keda fiel na su Tata selestial bou di tur sorto di sirkunstansia i apesar di tur tipo di oposishon i sufrimentu. Ku firmesa i éksito Hesus a logra resistí Satanas su tentashonnan. (Mateo 4:1-11) Na un tempu, algun miembro di Hesus su propio famia no a pone fe den dje, i asta nan a bisa ku “su kabes no ta bon!” (Marko 3:⁠21) Pero Hesus no a laga nan influensi’é; el a sigui  hasi e trabou di Dios gewon. Apesar di insulto i maltrato, Hesus a mustra dominio propio i nunka el a purba hasi daño na su opositornan.—1 Pedro 2:21-23.

²¹ Hesus a keda fiel te na morto, un morto kruel i doloroso na man di su enemigunan. (Filipensenan 2:8) Wak kiko el a soportá riba e último dia di su bida komo hende. El a ser arestá, akusá dor di testigunan falsu, sentensiá dor di huesnan korupto, chèrchá dor di multitutnan i torturá dor di sòldánan. Klabá na un staka, el a hala su último rosea i a grita: “Ta kumplí!” (Juan 19:30) Sin embargo, Hesus su Tata selestial a resusit’é na bida komo un persona spiritual riba e di tres dia despues ku el a muri. (1 Pedro 3:18) Un par di siman despues, el a regresá shelu. Einan el “a sinta na man drechi di Dios” i a warda pa risibí poder komo rei.—Hebreonan 10:12, 13.

22. Kiko Hesus a logra dor di keda fiel te na morto?

²² Kiko Hesus a logra dor di keda fiel te na morto? Hesus su morto de echo a habri kaminda pa nos por haña bida eterno den un paradeis riba tera, na armonia ku Yehova su propósito original. Den e siguiente kapítulo nos lo konsiderá kon e morto di Hesus ta hasi esei posibel.