E RELATONAN den e buki aki a sosodé di bèrdat. Nan ta saká for di e mihó buki na mundu, Beibel. E relatonan ta konta bo historia di mundu for di tempu ku Dios a kuminsá su kreashon, te n’e tempu aktual. Nan ta asta bisa kiko Dios ta primintí di hasi den futuro.

E buki aki ta duna bo un idea di loke tin skirbí den Beibel. E ta konta tokante e hendenan di Beibel i di loke nan a hasi. E ta mustra tambe ku Dios a duna hende e gran speransa di bida eterno riba tera den Paradeis.

Tin 116 relato den e buki aki. Nan ta dividí den ocho parti. Un blachi na prinsipio di kada parti ta bisa den poko palabra loke tin den e parti. E relatonan ta sigui otro n’e mesun órden ku nan a sosodé den pasado. Esei por yuda bo siña kiko a sosodé promé, i kiko a sosodé despues.

E relatonan ta ser kontá na un idioma simpel. Muchanan, hopi di boso mes por lesa nan. Mayornan, boso lo ripará ku boso yunan mas chikitu lo gusta pa boso lesa e relatonan pa nan bes tras bes. Boso lo mira ku e buki aki ta kontené hopi kos interesante pa hende di tur edat.

Tin teksto bíbliko na fin di kada relato. Ta konsehabel pa lesa tur e tekstonan aki den Beibel mes, pasobra ta riba nan e relato ta basá. Ora bo kaba di lesa un relato, repasá tambe e preguntanan pa estudio pa e relato ei ku bo ta haña despues di Relato 116, i purba kòrda e kontestanan.

Tekstonan bíbliko den e buki aki ta parafrasiá. Nan ta den idioma simpel, di manera ku mucha chikitu por kapta nan sentido. E referensianan na fin di kada relato ta mustra for di unda e historia ta saká.