LÈS 7
Kiko e Reino di Dios Ta?
1. Kiko e Reino di Dios ta?
Kiko ta hasi Hesus un Rei ideal?—MARKO 1:40-42.
E Reino di Dios ta un gobièrnu selestial. Lo e remplasá tur otro gobièrnu i lo kumpli ku Dios su boluntat tantu den shelu komo riba tera. E notisia tokante e Reino di Dios ta un bon notisia. Pronto e Reino di Dios lo satisfasé hende su nesesidat pa un bon gobièrnu. Lo e uni tur hende ku ta biba riba tera.—Lesa Daniel 2:44; Mateo 6:9, 10; 24:14.
Un gobièrnu mester tin un hende na kabes. P’esei, Yehova a nombra su Yu, Hesukristu, komo Rei di Su Reino.—Lesa Revelashon 11:15.
Wak e vidio Kiko e Reino di Dios Ta?
2. Dikon Hesus ta e Rei ideal?
E Yu di Dios ta e Rei ideal pasobra e ta bondadoso, i e ta para firme pa loke ta bèrdat. (Huan 1:14) Tambe e tin tur e poder ku e mester tin pa yuda hende pasobra lo e goberná tera kompleto for di shelu. Despues ku el a haña resurekshon, el a subi na shelu i a sinta warda na man drechi di Yehova. (Hebreonan 10:12, 13) Finalmente, Dios a dun’é poder pa kuminsá goberná.—Lesa Daniel 7:13, 14.
3. Ken lo goberná huntu ku Hesus?
Den Beibel, e grupo di hende ku lo goberná huntu ku Hesus den shelu ta ser yamá “e santunan.” (Daniel 7:27) E proménan di e grupo akí ku Dios a skohe ta Hesus su fiel apòstelnan. Te den nos tempu Yehova a sigui skohe hòmber i muhé fiel pa forma parti di e grupo akí. Meskos ku Hesus, nan ta resusitá ku un kurpa spiritual.—Lesa Huan 14:1-3; 1 Korintionan 15:42-44.
Kuantu hende ta bai shelu? Hesus a papia di un “tou chikitu.” (Lukas 12:32) Na tur nan lo ta 144.000, i nan lo goberná tera huntu ku Hesus.—Lesa Revelashon 14:1.
4. Kiko a sosodé ora Hesus a kuminsá goberná?
E Reino di Dios a kuminsá goberná na 1914. * E promé kos ku Hesus a hasi ora el a bira Rei tabata di tira Satanas i su demoñonan abou na tera. Satanas a bira furioso i a kuminsá kousa hopi problema riba tera. (Revelashon 12:7-10, 12) Desde e tempu ei, sufrimentu a oumentá drástikamente. Guera, hamber, epidemia i temblor ta parti di un “señal” ku pronto e Reino lo tuma mando kompleto di asuntunan riba tera.—Lesa Lukas 21:7, 10, 11, 31.
5. Kiko e Reino di Dios ta logrando?
Pa medio di un obra mundial di predikashon, e Reino di Dios ya kaba ta uniendo un multitut grandi di hende di tur nashon. Miónes di hende humilde ta someté nan na Hesus. Nan lo haña protekshon ora e Reino di Dios destruí e mundu malbado akí. Pues, ken ku ke benefisiá di e Reino di Dios mester siña obedesé Hesus.—Lesa Revelashon 7:9, 14, 16, 17.
Durante un periodo di 1.000 aña, e Reino lo kumpli ku Dios su propósito original pa humanidat. Tera kompleto lo bira un paradeis. Na fin di e periodo ei Hesus lo entregá e Reino bèk na su Tata. (1 Korintionan 15:24-26) Bo konosé un hende ku lo bo tin gana di konta di loke bo a siña tokante e Reino di Dios?—Lesa Salmo 37:10, 11, 29.
^ par. 6 Pa mas detaye tokante kon profesia bíbliko ta señalá na 1914, wak página 215-218 di e buki Kiko Beibel Ta Siña Realmente?
