LÈS 19
Testigunan di Yehova Ta Kristian Berdadero?
Komo Testigunan di Yehova, nos ta kere ku nos ta kristian berdadero. Dikon nos ta kere esei? Laga nos analisá e siguiente puntonan: Riba kiko nos ta basa nos kreensianan? Dikon nos ta yama nos mes Testigunan di Yehova? Kon nos ta demostrá ku nos ta stima otro?
1. Riba kiko Testigunan di Yehova ta basa nan kreensianan?
Hesus a bisa: “[Dios su] palabra ta e bèrdat.” (Huan 17:17) Meskos ku Hesus, semper Testigunan di Yehova a basa nan siñansanan riba Palabra di Dios. Laga nos wak historia di Testigunan di Yehova, kendenan un tempu tabata konosí komo Studiantenan di Beibel. Rònt di aña 1870, un grupo di Studiante di Beibel a kuminsá analisá Beibel huntu pa haña sa kiko Beibel ta siña realmente. Nan a basa nan kreensianan riba Beibel asta ora nan kreensianan no tabata na armonia ku loke e iglesianan tabata siña hende. Despues, nan a kuminsá kompartí e bèrdatnan di Beibel ku nan a siña ku otro hende. a
2. Dikon nos ta yama nos mes Testigunan di Yehova?
Yehova ta yama su sirbidónan su testigunan pasobra nan ta papia e bèrdat tokante dje. (Hebreonan 11:4–12:1) Por ehèmpel, den tempu bíbliko, Dios a bisa su pueblo: “Boso ta mi testigunan.” (Lesa Isaías 43:10.) Beibel ta yama Hesus “E Testigu Fiel.” (Revelashon 1:5) Pues, na aña 1931 nos a skohe e nòmber Testigunan di Yehova. Ta un onor pa karga e nòmber akí!
3. Kon Testigunan di Yehova ta mustra amor meskos ku Hesus?
Hesus tabata stima su disipelnan mashá. Nan tabata manera famia p’e. (Lesa Marko 3:35.) Di mes manera, Testigunan di Yehova ta un famia mundial i uní. Ta p’esei, nos ta yama otro ruman. (Filemon 1, 2) Ademas, nos ta kumpli ku e siguiente mandato: “Stima henter e hermandat.” (1 Pedro 2:17) Testigunan di Yehova ta mustra amor na otro na vários manera. Por ehèmpel, nos ta yuda nos rumannan na tur parti di mundu ku ta pasa den difikultat.
KIKO MAS NOS POR SIÑA?
Laga nos siña mas tokante e historia di Testigunan di Yehova i wak mas prueba ku ta mustra ku di bèrdat nos ta kristian berdadero.
Kristian berdadero ta basa nan siñansanan riba Beibel i ta kompartí loke nan ta siña for di Beibel ku otro hende
4. Nos ta basa nos kreensianan riba Beibel
Yehova a profetisá ku den tempu di fin hende lo haña mihó komprondementu di e bèrdatnan di Beibel. Lesa Dánièl 12:4. Despues, analisá e siguiente pregunta:
-
Kiko “lo oumentá” den e pueblo di Dios segun ku nan ta analisá loke Beibel ta bisa?
Wak kon Charles Russell huntu ku algun otro Studiante di Beibel a kuminsá studia Beibel. Pasa e VIDIO. Despues, analisá e siguiente pregunta:
-
Den e vidio, kon Charles Russell i e otro Studiantenan di Beibel tabata studia Beibel?
Bo tabata sa?
Tin biaha, nos ta ahustá e manera ku nos ta komprondé sierto bèrdat di Beibel. Dikon nos ta hasi esei? Wèl, meskos ku ora solo ta sali gradualmente nos por mira sierto detaye di un paisahe mihó, asina Dios ta laga nos komprondé e bèrdatnan di Beibel progresivamente. (Lesa Proverbionan 4:18.) Pues, aunke Beibel no ta kambia, nos ta ahustá nos kreensianan segun ku nos ta haña mihó komprondementu di e bèrdatnan ku tin den Beibel.
5. Nos ta prediká e bèrdat tokante Yehova
Dikon nos ta yama nos mes Testigunan di Yehova? Pasa e VIDIO. Despues, analisá e siguiente pregunta:
-
Dikon e nòmber Testigunan di Yehova ta un nòmber adekuá pa nos?
Dikon Yehova a skohe hende pa nan por ta su testigunan? Debí ku tin hopi mentira tokante Dios, su testigunan lo a identifik’é komo e Dios berdadero. Laga nos trata djis dos di e mentiranan ei.
Algun iglesia ta siña nan miembronan ku Dios ke pa nan usa imágen ora di ador’é. Pero esei ta bèrdat? Lesa Levítiko 26:1. Despues, analisá e siguiente preguntanan:
-
Kiko Beibel ta siña realmente? Kiko Yehova ta pensa tokante uso di imágen?
Algun iglesia ta siña nan miembronan ku Hesus ta Dios. Pero esei ta bèrdat? Lesa Huan 20:17. Despues, analisá e siguiente preguntanan:
-
Kiko Beibel ta siña realmente? Dios i Hesus ta e mesun persona?
-
Kon bo ta sinti bo awor ku bo a haña sa e bèrdat tokante Yehova i su Yu? Kon bo ta haña e echo ku Yehova a manda su Testigunan pa konta otro hende e bèrdat ei? Abo tambe lo tin gana di siña hende e bèrdat ei?
6. Nos ta mustra amor na otro
Beibel ta kompará e kristiannan ku diferente parti di un kurpa humano. Lesa 1 Korintionan 12:25, 26. Despues, analisá e siguiente preguntanan:
-
Kiko kristian berdadero mester hasi ora otro kristian ta pasa den difikultat?
-
Kiko bo a mira entre Testigunan di Yehova ku ta mustra ku nan tin amor pa otro?
Ora Testigunan di Yehova na sierto parti di mundu ta pasa den difikultat, Testigunan di Yehova di rònt parti di mundu ta purba di yuda nan mesora. Pa wak un ehèmpel di esaki, pasa e VIDIO. Despues, analisá e siguiente pregunta:
-
Kon e esfuersonan ku Testigunan di Yehova ta hasi pa yuda nan rumannan ta mustra ku nan ta stima otro?
Kristian berdadero ta mustra amor i ta yuda hende
LOKE HENDE SA BISA: “Testigunan di Yehova ta djis un otro religion mas.”
-
For di ki tempu Yehova ta yama su sirbidónan su testigunan?
RESÚMEN
Testigunan di Yehova ta kristian berdadero. Nos ta un famia mundial ku ta sirbi Yehova. Nos ta basa nos kreensianan riba Beibel i ta siña otro hende e bèrdat tokante Yehova.
Repaso
-
Dikon nos a skohe e nòmber Testigunan di Yehova?
-
Kon nos ta mustra amor na otro?
-
Bo ta kere ku Testigunan di Yehova ta kristian berdadero?
MAS INFORMASHON INTERESANTE
Siña mas tokante e historia di Testigunan di Yehova.
Wak ehèmpel di un siñansa falsu ku Testigunan di Yehova a saka na kla.
Haña kontesta pa algun pregunta ku bo por tin tokante Testigunan di Yehova.
“Pregunta Ku Hopi Hende Sa Hasi Tokante Testigunan di Yehova” (sekshon riba jw.org)
Un hòmber ku yama Stephen tabata odia hende di otro rasa i tabata trata nan na un manera violento. Wak kiko a motiv’é pa kambia.
“Mi Bida Tabata Bai di Malu pa Pió” (E Toren di Vigilansia di 1 di yüli 2015)
a Desde 1879, e pueblo di Yehova ta publiká nos revista prinsipal, E Toren di Vigilansia, pa splika e bèrdatnan ku tin den Beibel.
Otro Artíkulo Interesante
PREGUNTA KU HOPI HENDE SA HASI
Kon un Kurso di Beibel Ku Testigunan di Yehova Ta Bai?
Pa sigui un kurso di Beibel interaktivo grátis ku Testigunan di Yehova, bo por usa kualke tradukshon di Beibel ku bo ta preferá. Sinti bo liber pa invitá henter bo famia òf kualke amigu pa sigui e kurso di Beibel huntu ku bo.
