SEKSHON 2
Keda Fiel na Otro
“No laga ningun hende separá loke Dios a uni bou di un yugo.”—Marko 10:9
Yehova ke pa nos ta fiel. (Mikéas 6:8, BPK) Fieldat ta masha importante, spesialmente den matrimonio, pasobra kaminda no tin fieldat, no tin konfiansa. I sin konfiansa, amor no ta bona.
Awendia tin tur sorto di influensia ku por pone parehanan bira infiel na otro. Pa bo protehá bo matrimonio, bo mester ta determiná pa hasi dos kos.
1 DUNA BO MATRIMONIO PRIORIDAT
LOKE BEIBEL TA BISA: “Hasi sigur kiko ta e kosnan mas importante.” (Filipensenan 1:10) Bo matrimonio ta un di e kosnan di mas importante den bo bida. E meresé pa bo dun’é prioridat.
Yehova ke pa bo kasá ta importante den bo bida i pa boso ‘gosa di bida’ huntu. (Eklesiástes 9:9) Beibel ta mustra bon kla ku nunka bo mester neglishá bo kasá. Al kontrario, boso tin ku buska maneranan pa hasi otro felis. (1 Korintionan 10:24) Laga bo kasá sinti ku bo ta apresi’é i ku bo tin mester di dje.
LOKE BO POR HASI:
-
Hasi sigur ku regularmente boso ta pasa tempu huntu i ku na momentonan asina bo kasá tin tur bo atenshon
-
Pensa i papia di “nos” i no di “ami”
2 PROTEHÁ BO KURASON
LOKE BEIBEL TA BISA: “Ken ku sigui wak un muhé ku pashon, ya kaba a kometé adulterio kuné den su kurason.” (Mateo 5:28) Si un hende ta keda pensa riba kos inmoral, den un sentido e ta infiel na su kasá.
Yehova ke pa bo protehá bo kurason. (Proverbionan 4:23; Yeremías 17:9) Pa hasi esei, bo mester paga bon tinu kiko bo ta wak. (Mateo 5:29, 30) Sigui ehèmpel di e patriarka Yòb. El a sera un aliansa ku su wowonan pa nunka wak un otro hende muhé ku deseo inmoral. (Yòb 31:1) Disidí firmemente pa nunka wak pornografia. Ademas, nunka kuminsá un laso romántiko ku un persona ku no ta bo kasá.
LOKE BO POR HASI:
-
Laga hende mira bon kla ku bo ta determiná pa keda fiel na bo kasá
-
Tene kuenta ku sintimentu di bo kasá, i si bo relashon ku un otro hende ta laga bo kasá sintié inkómodo, termin’é mesora
