Mará manera un kriminal, nan a hiba Hesus serka Anas. Anas tabata sumo saserdote tempu ku Hesus, komo mucha, a laga e maestronan den tèmpel keda asombrá. (Lukas 2:42, 47) Despues, algun di Anas su yu hòmbernan a sirbi komo sumo saserdote. Awor, Kaifas, kende tabata kasá ku yu muhé di Anas, tabata okupá e puesto ei.

Ora ku Hesus tabata na kas di Anas, Kaifas a probechá di e tempu pa reuní e miembronan di Sanedrin. E korte ei tabata konsistí di 71 hende, inkluso e sumo saserdote i personanan ku a yega di okupá e puesto ei.

Anas tabata interogá Hesus “tokante su disipelnan i tokante su siñansanan.” Hesus a bis’é: “Mi a papia públikamente ku mundu. Semper mi tabata siña hende den snoa i den tèmpel, kaminda tur hudiu ta bini huntu, i mi no a bisa nada den sekreto. Pakiko bo ta interogá mi? Puntra esnan ku a tende loke mi a papia ku nan. Nan sa kiko mi a bisa.”—Huan 18:19-21.

Un ofisial ku tabata pará einan a pas’é un wanta i a skual e, bisando: “Ta asina bo ta kontestá e saserdote prinsipal?” Anto Hesus, sabiendo ku e no a hasi nada malu, a puntr’é: “Si mi a bisa algu malu, bisa mi kiko ta e kos malu ku mi a bisa; ma si loke mi a bisa ta korekto, pakiko bo ta dal mi?” (Huan 18:22, 23) E ora ei Anas a laga nan hiba Hesus serka Kaifas.

 Pa e ora ei, tur e miembronan di Sanedrin—esta, e sumo saserdote, e ansianonan di e pueblo i e eskribanan—a haña chèns di bini huntu. Nan a reuní na kas di Kaifas. No tabatin mag di trata un kaso riba e anochi di Pasku Hudiu. No opstante, esei no a stroba nan di sigui ku nan plan malbado.

Mayoria di miembro di Sanedrin tabatin prehuisio. For di dia ku Hesus a resusitá Lázaro, Sanedrin a kondená Hesus na morto. (Huan 11:47-53) Algun dia promé, e lidernan religioso a konspirá ku otro pa gara Hesus i mat’é. (Mateo 26:3, 4) Pues, Hesus tabata kondená kaba na morto promé ku nan a trata su kaso.

Fuera di a reuní ilegalmente, e saserdotenan prinsipal i otro miembronan di Sanedrin tabata purba di haña testigu pa duna testimonio falsu kontra Hesus pa asina konden’é. De echo, nan a haña hopi testigu, pero e testimonionan no tabata kuadra ku otro. Na final di kuenta, dos hòmber a bini dilanti i a bisa: “Nos a tend’é bisa: ‘Lo mi basha e tèmpel akí abou, ku man di hende a traha, i den tres dia lo mi lanta un otro ku man di hende no a traha.’” (Marko 14:58) Ma ni e testimonionan akí no tabata kuadra kompletamente ku otro.

Kaifas a puntra Hesus: “Bo no ta kontestá nada? Bo no ta tende kiko e hendenan akí ta testiguá kontra bo?” (Marko 14:60) Hesus a keda ketu i no a refutá e akusashonnan falsu akí di e testigunan, kendenan nan testimonionan no tabata ni kuadra ku otro. P’esei, Sumo Saserdote Kaifas a disidí di usa un otro táktika.

Kaifas tabata sa ku e hudiunan tabata rabia mashá ora un hende pretendé ku e ta Yu di Dios. Por ehèmpel, mas promé, ora Hesus a yama Dios su Tata, e hudiunan kier a mat’é pasobra segun nan e tabata “hasiendo su mes igual ku Dios.” (Huan 5:17, 18; 10:31-39) P’esei, sabiendo kon e hendenan akí lo a reakshoná, Kaifas a purba na un manera astuto di laga Hesus deklará ku e ta Yu di Dios. El a bisa Hesus: “Mi ke pa bo hura den nòmber di e Dios bibu ku lo bo papia bèrdat i bisa nos si bo ta Kristu, e Yu di Dios!” (Mateo 26:63) Vários biaha Hesus a yega di bisa ku e ta Yu di Dios. (Huan 3:18; 5:25; 11:4) Pues, si e no a atmití esei na e momento akí, lo por a parse ku e tabata nenga ku e ta Yu di Dios i e Kristu. P’esei Hesus a bisa: “Sí, ta mi, i boso lo mira e Yu di hende sintá na man drechi di e Poderoso, i boso lo mir’é bini ku e nubianan di shelu.”—Marko 14:62.

Ora Kaifas a tende esei, na un manera dramátiko el a sker su paña i a sklama: “El a blasfemá! Pakiko nos tin mester di mas testigu? Wak! Awor boso mes a tende e blasfemia. Kiko boso ta pensa?” Mesora Sanedrin a dikta e siguiente sentensia inhustu: “E meresé morto!”—Mateo 26:65, 66.

Anto nan a kuminsá hasi bofon di Hesus i dal e moketa. Otronan a dal e wanta i skupi den su kara. Nan a tapa su kara i tabata dal e. I nan tabata bisa sarkástikamente: “Profetisá no? Bisa nos ta ken a dal bo!” (Lukas 22:64) Imaginá bo, nan a tene un huisio ilegal i a trata e Yu di Dios kruelmente!