Notisia a plama ku Hesus a bolbe for di Dekápolis. E hudiunan ku tabata biba na kosta nortwèst di Laman di Galilea a haña e notisia i hopi di nan a tende tambe ku Hesus a kalma bientu i laman durante un tormenta. Algun di nan lo a tende tambe ku Hesus a kura e hòmber ku tabata poseí pa demoño. P’esei, “un gran kantidat di hende” a reuní na e laman, probablemente den área di Kapernaum, pa duna Hesus un bonbiní. (Marko 5:21) Ora el a baha for di boto, nan tabata ansioso pa sa kiko e tabata bai bisa òf hasi.

Un di e hendenan ku tabata ansioso pa mira Hesus tabata Yairo, kende tabata un kabesante di snoa. El a kai na pia di Hesus i a rog’é bes tras bes: “Mi yu muhé chikitu ta hopi malu. Por fabor, bin pone man riba dje pa e por bira bon i keda na bida.” (Marko 5:23) Kon Hesus a reakshoná ora Yairo a suplik’é pa yuda su úniko yu muhé, kende e tabata stima mashá i ku tabatin solamente 12 aña di edat?—Lukas 8:42.

Na kaminda pa kas di Yairo, Hesus a hañ’é ku un otro situashon ku a lanta hopi emoshon. Hopi di e hendenan ku tabata kompañá Hesus tabata ansioso pa wak si e tabata bai hasi un otro milager. Den e multitut, tabatin un señora ku un problema serio di salú i ku tabata masha preokupá.

Diesdos aña largu, e señora hudiu akí tabatin un sangramentu ku a pon’é sufri masha hopi mes. El a buska yudansa di hopi dòkter i a gasta tur su sèn na tratamentu sin ku esakinan a yud’é. Bon mirá, su problema a bira pió.—Marko 5:26.

Ta di komprondé ku su malesa tabata kaba ku su energia i lag’é pasa bèrgwensa. Generalmente, hende no tabata papia di e tipo di problema akí abiertamente. Ademas, segun e Lei di Moises, un muhé ku derame di sanger ta impuru i no tabatin mag di adorá Dios huntu ku otro hende. P’esei, ken ku a mishi kuné òf ku su pañanan manchá ku sanger mester a baña i laba nan pañanan i keda impuru te anochi.—Levítiko 15:25-27.

Awor, e señora tabata buska Hesus pasobra el a tende “e kosnan ku e hendenan tabata konta di Hesus.” Pero komo ku e tabata impuru, el a drenta ketu ketu den e multitut pa e hendenan no ripará i tabata bisa den su mes: “Si mi djis mishi ku su paña, mi ta bira bon.” Anto manera el a mishi ku zòm di Hesus su paña, el a sinti ku e sangramentu a stòp! Sí, mesora “el a kura di su malesa penoso.”—Marko 5:27-29.

Anto Hesus a puntra: “Ta ken a mishi ku mi?” Kon bo ta kere e señora lo a sintié ora el a tende e palabranan ei? Pedro, kende na fini manera kier a mustra ku Hesus su pregunta tabata ilógiko, a bisa Hesus: “Maestro, ta masha hopi hende tin rònt di bo ku ta pèrta riba bo.” Pero dikon Hesus a puntra ta ken a mishi kuné? Hesus mes a splika: “Un hende a mishi ku mi, pasobra mi a sinti ku poder a sali for di mi.” (Lukas 8:45, 46) Sí, e milager ei a tuma energia di Hesus.

Ora e señora a realisá ku loke el a hasi no a keda skondí, morto spantá i temblando el a kai na rudia dilanti di Hesus i a konfesá tur kos. Dilanti di tur hende, el a konta tokante su malesa i kon el a kaba di ser kurá. Pero Hesus a trankilis’é: “Mi yu, bo fe a kura bo. Bai na pas, sea salú i ku e malesa penoso akí no molestiá bo mas.”—Marko 5:34.

No tin duda, e Persona ku Dios a skohe pa goberná tera ta un persona bondadoso i ku komprenshon, ku no solamente ta interesá den hende ma tin poder tambe pa yuda nan!