1. (a) Ki speransa Yehova a duna nos? (b) Kiko ta nifiká “spera riba” Yehova? (Wak e “Splikashon.”)

 YEHOVA a duna tur hende ku stim’é un bunita speransa. Un bes akí, lo e kaba ku malesa, tristesa i morto. (Rev. 21:3, 4) Lo e yuda e humildenan ku ta sperando riba dje pa transformá e tera den un paradeis. (Sal. 37:9-11) I nos por tin un amistat muchu mas será kuné i muchu mas mihó ku esun ku nos tin aworakí. Esta un bunita speransa! Pero, kon nos por tin sigur ku Yehova lo kumpli ku tur e promesanan ei? Yehova semper ta kumpli ku su palabra. Ta p’esei nos por spera riba Yehova. * (Sal. 27:14) Awor, kon nos por hasi esei? Esei ta ora nos ta keda kontentu i ta warda ku pasenshi pa Yehova kumpli ku tur su promesanan.—Isa. 55:10, 11.

2. Kiko Yehova a hasi kaba?

² Yehova ya a mustra ku e ta kumpli ku tur su promesanan. Wak un ehèmpel aki. Den Revelashon, Yehova a primintí ku den nos tempu lo e reuní un grupo di hende for di tur nashon, tribu i idioma pa ador’é. Awe nos konosé e grupo ei komo e “multitut grandi.” (Rev. 7:9, 10) Aunke tin hende hòmber, hende muhé i mucha di tur parti di mundu den grupo akí, nan ta uní i na pas ku otro. (Sal. 133:1; Huan 10:16) Nan ta prediká yen di entusiasmo i semper ta dispuesto pa kòmbersá ku ken ku ke skucha e  bon notisia. (Mat. 28:19, 20; Rev. 14:6, 7; 22:17) Si bo ta forma parti di e multitut grandi ei, sin duda e speransa di un mihó mundu ta masha balioso pa bo.

3. Ki meta Satanas tin?

³ Diabel ke kita tur speransa for di nos. E motibu pakiko e ke hasi esei ta pasobra e ke pa nos kere ku Yehova no ta wòri ku nos i ku lo E no kumpli ku su promesanan. Si Satanas logra ranka nos speransa for di nos, nos lo pèrdè kurashi i asta stòp di sirbi Yehova. I manera nos lo mira, ta esei el a purba di hasi ku Yòb.

4. Kiko nos lo trata den e artíkulo akí? (Yòb 1:9-12)

⁴ Den e artíkulo akí, nos lo analisá e táktikanan ku Satanas a usa pa purba di kibra Yòb su lealtat na Yehova. (Lesa Yòb 1:9-12.) Tambe nos lo mira kiko nos por siña for di Yòb su ehèmpel, i dikon ta asina importante pa nos keda kòrda ku Yehova ta stima nos i ku lo E kumpli ku su promesanan.

5-6. Kon Yòb su bida a kambia di un dia pa otro?

⁵ Tur kos tabata bai bon den Yòb su bida. E tabata amigu ku Yehova, e tabatin un famia grandi masha felis i e tabata masha riku mes. (Yòb 1:1-5) Pero, den un solo dia el a pèrdè kasi tur kos. Pa kuminsá, el a pèrdè tur su rikesanan. (Yòb 1:13-17) Despues, tur su yunan a muri. Laga nos pone nos mes den su sapatu. Morto di un yu ta laga mayornan keda kibrá. Pues, imaginá bo e sla i doló ku é ku su kasá a sinti ora ku nan a pèrdè no ún, pero tur nan dies yunan. Ta di komprondé dikon Yòb a sker su paña i a tira su kurpa abou.—Yòb 1:18-20.

⁶ Pero ainda Satanas no tabata kla ku Yòb. El a dal e ku un malesa doloroso i humiante. (Yòb 2:6-8; 7:5) Yòb tabata un hende masha respetá den su komunidat. Hende tabata bin pidié konseho. (Yòb 31:18) Pero awor nan tabata kore p’e. Su rumannan, su bon amigunan i te asta su kriánan tabata trat’é manera hende straño.—Yòb 19:13, 14, 16.

7. (a) Kiko Yòb a pensa ku tabata e motibu pakiko el a sufri, i kiko el a nenga di hasi? (b) Kiko un kristian por pasa aden ku por parse loke tin riba e plachi?

⁷ Satanas tabata ke pa Yòb pensa ku e tabata sufri pasobra Yehova tabata rabiá kuné. Por ehèmpel, Satanas a usa un bientu fuerte pa pone e kas kai riba e dies yunan di Yòb ora ku nan tabata kome huntu. (Yòb 1:18, 19) Tambe, el a laga kandela baha for di shelu i a mata no solamente Yòb su tounan pero tambe su kriánan ku tabata kuida nan. (Yòb 1:16) Ta opvio ku e bientu i e kandela no tabata un fenómeno natural. P’esei, Yòb a yega na e konklushon ku ta Yehova mes a manda nan. I esei a lag’é pensa ku e mester a hasi algu ku Yehova no a gusta. Pero apesar di tur e kosnan ei, Yòb no a maldishoná su Tata den shelu. El a rekonosé ku durante añanan el a haña hopi kos bon di Yehova. Pues, el a pensa, si el a aseptá e kosnan bon, e tin ku aseptá e kosnan malu tambe. P’esei el a bisa: “Bendishoná sea e nòmber di SEÑOR.” (Yòb 1:20, 21; 2:10) Maske Yòb a pèrdè tur su rikesa, tur su yunan i su salú, el a keda leal na Yehova. Pero te ainda Satanas no tabata kla ku Yòb.

8. Ki otro táktika Satanas a usa?

⁸ Satanas a bai pa un otro táktika. El a usa tres supuesto amigu di Yòb pa laga  Yòb sinti ku e no tabata bal nada. Nan a laga Yòb pensa ku e tabata sufri pasobra el a hasi hopi kos malu den su bida. (Yòb 22:5-9) Nan a trata di konvens’é tambe ku ni maske kuantu kos bon e hasi, lo e no por hasi Yehova kontentu. (Yòb 4:18; 22:2, 3; 25:4) Eigenlijk nan tabata ke pa Yòb kere ku Yehova no stim’é, no ta interesá den dje i ku no ta bale la pena sirbiÉ. Nan palabranan kisas por a pone Yòb sinti ku e no tin niun speransa.

9. Dikon Yòb por a keda fuerte i ku kurashi?

⁹ Djis imaginá e esena. Yòb ta sintá den shinishi i dia aden, dia afó, doló ta kom’é. (Yòb 2:8) Su supuesto amigunan tabata blo keda bis’é ku e ta mal hende i ku nunka e no a hasi nada bon. E pruebanan ku Yòb a pasa aden, inkluso morto di su yunan, tabata hopi pisá p’e i a laga su kurason na wèrki. P’esei, na kuminsamentu e no a papia nada. (Yòb 2:13–3:1) Pero si Yòb su amigunan a pensa ku su silensio a nifiká ku lo e bandoná Yehova, nan tabata kiboká. Dado momento, Yòb kisas a lanta kabes i wak nan stret den nan kara i a bisa: “Te na mi morto lo mi no bandoná mi integridat”! (Yòb 27:5) Kon Yòb a logra keda fuerte i ku kurashi? Pasó ora e tabata desanimá, nunka el a pèrdè speransa ku Yehova, kende stim’é, lo bin yud’é. E tabata sa ku si asta e muri, Yehova lo lant’é bèk.—Yòb 14:13-15.

10. Kiko e relato di Yòb ta siña nos?

¹⁰ E relato tokante Yòb ta siña nos ku Satanas no por fòrsa nos pa bandoná Yehova i ku Yehova sa tur kos ku nos ta pasa aden. Loke ku Yòb a pasa aden tambe ta siña nos otro lèsnan importante. Laga nos wak algun di nan.

11. Di kiko nos por tin sigur si nos sigui konfia den Yehova? (Santiago 4:7)

 ¹¹ Loke Yòb a pasa aden ta mustra ku si nos sigui konfia den Yehova, nos por soportá kualke prueba i logra oponé Satanas. I ki lo ta e resultado? Beibel ta sigurá nos ku Diabel lo hui for di nos.—Lesa Santiago 4:7.

12. Kon e speransa di resurekshon a fortalesé Yòb?

¹² Nos tin ku tene duru na e speransa di resurekshon. Manera nos a mira den e artíkulo anterior, hopi biaha Satanas ta usa miedu di muri pa purba di pone nos bira lomba pa Yehova. Si nos wak den e kaso di Yòb, Satanas a bisa ku Yòb lo hasi loke sea ta nesesario pa keda na bida. Asta si esei a nifiká bira lomba pa Yehova. Pero, Satanas tabata ful fout. Pasobra, te asta ora Yòb a pensa ku e tabata bai muri, el a keda leal na Yehova. Kiko a yuda Yòb wanta tur e kosnan ei? E tabatin konfiansa ku Yehova ta bon, i e tabatin speransa ku Yehova lo drecha tur kos na e debido tempu. E tabatin fe ku, si Yehova no yud’é miéntras e ta na bida, den futuro Yehova lo yud’é i lant’é for di morto. Pa Yòb, e speransa di resurekshon tabata real. Si esei tambe ta nos kaso, nos lo no bira lomba pa Yehova ni maske ku nan menasá nos ku morto.

13. Dikon nos mester konosé e táktikanan ku Satanas a usa ku Yòb?

¹³ Nos tin ku konosé e táktikanan ku Satanas a usa ku Yòb bon, pasobra ta e mesun táktikanan ei e ta usa awe. Wak e akusashon ku el a lansa, no kontra Yòb so, sino kontra tur hende. El a bisa: “Tur loke un hende tin lo e duna pa su bida.” (Yòb 2:4, 5) Pues, Satanas a insinuá ku nos no stima Yehova di kurason i ku asina ku nos haña nos kara kara ku morto, nos ta kla pa bira lomba pa Yehova. Ademas, el a bisa ku Dios no stima nos i ku e no ta wòri su kabes mes ku tur e esfuerso ku nos ta hasi pa agrad’É. Komo nos sa kiko Satanas ke logra, nos no ta kai pa su mentiranan.

14. Kiko por sali na kla ora nos pasa den prueba?

¹⁴ Nos mester mira pruebanan komo oportunidat pa siña konosé nos mes mihó. E pruebanan ku Yòb a pasa aden, a yud’é realisá ku e tabatin ku traha riba algun kos. (Yòb 42:3) Por ehèmpel, el a mira ku e mester a bira mas humilde. Nos tambe por siña hopi ora nos haña nos ku prueba. Nikolay, * un ruman ku a bai será apesar ku su salú no tabata bon, a bisa: “E tempu ku mi tabata será a yuda mi mira e kualidatnan ku mi mester a traha riba dje.” Ora ku nos mira ki ta nos puntonan débil, nos mester hasi esfuerso pa drecha nan.

15. Ken nos tin ku skucha, i dikon?

¹⁵ Nos mester skucha Yehova, no nos enemigunan. Yòb a skucha bon ora Yehova a papia kuné. Yehova a rasoná kuné i den un sentido el a bis’é: ‘Bo no a wak mi poder den tur e kosnan ku mi a krea? Mi sa delaster un kos ku bo a pasa aden. Bo no ta kere ku mi por yuda bo?’ Den Yòb su kontesta nos por a sinti su humildat i ku e tabata masha gradisidu pa e echo ku Yehova tabata bon kuné. El a bisa Yehova: “Ta tende mi a tende di bo, ma awor mi wowo ta mira bo.” (Yòb 42:5) Ora Yòb a bisa e palabranan ei, probablemente e tabata sintá meimei di shinishi ku su kurpa tur na herida habrí i  ketu bai den pena pa morto di su yunan. Apesar ku e tabata den e situashon ei, Yehova a lag’é sa ku E tabata stim’é i a sigurá Yòb ku e tabatin Su aprobashon.—Yòb 42:7, 8.

16. Segun Isaías 49:15 i 16, kiko nos tin ku keda kòrda ora nos ta pasa den prueba?

¹⁶ Awe tambe hende por insultá nos i menospresiá nos. Nan por purba di daña nos reputashon òf reputashon di e organisashon i saka “tur sorto di mentira malisioso kontra” nos. (Mat. 5:11) E relato di Yòb ta siña nos ku Yehova tin konfiansa ku nos lo keda leal na dje asta ora nos haña nos den prueba. Yehova stima nos i nunka lo e bira lomba pa esnan ku ta spera riba dje. (Lesa Isaías 49:15, 16.) No lanta e kalumnianan di Dios su enemigunan for di tera. James, un ruman na Turkia kende su famia a pasa den hopi prueba, a bisa: “Nos a realisá ku si nos para skucha ki hende bisa òf lag’i bisa di Yehova su pueblo, esei lo desanimá nos. P’esei, nos a enfoká riba nos speransa di e Reino, i nos a bira hopi mas aktivo den nos sirbishi na Yehova. I debí na esei nos a keda ku nos goso.” Meskos ku Yòb, nos tambe ta skucha Yehova. E mentiranan di nos enemigunan lo no kita nos speransa.

17. Kiko nos ta siña di e ehèmpel di sirbidónan fiel di Yehova menshoná na Hebreonan kapítulo 11?

¹⁷ Yòb no ta e úniko sirbidó di Yehova ku tabatin kurashi i a keda fuerte durante  su pruebanan. Kon nos sa esei? Den e karta ku Apòstel Pablo a skirbi e hebreonan, el a menshoná hopi otro sirbidó di Yehova ku a keda fiel. El a yama nan “un nubia . . . grandi di testigu.” (Heb. 12:1) Nan a pasa den hopi prueba difísil, pero nan a keda leal na Yehova. (Heb. 11:36-40) Akaso tur esaki tabata pòrnada? Niun ora so! Ta bèrdat ku nan no a mira e promesanan di Yehova kumpli, pero nan a sigui spera riba Yehova. Anto komo ku nan tabatin sigur ku nan tabatin Yehova su aprobashon, nan no a duda ku nan lo mira e promesanan ei kumpli den futuro. (Heb. 11:4, 5) Nan ehèmpel por duna nos forsa pa sigui spera riba Yehova.

18. Kiko bo ta determiná pa hasi? (Hebreonan 11:6)

¹⁸ Mundu ta bai di malu pa pió. (2 Tim. 3:13) Satanas ta sigui pone Yehova su sirbidónan na prueba. Sea kual sea e prueba ku nos haña nos kuné den futuro, nos lo sigui sirbi Yehova ku henter nos kurason pasobra “nos a pone nos speransa den e Dios bibu.” (1 Tim. 4:10) Kòrda kon Yehova a rekompensá Yòb na final. Esei ta yuda nos “mira ku Yehova tin masha kariño, kompashon i miserikòrdia.” (Sant. 5:11) Laga nos tambe semper keda leal na Yehova konvensí ku lo e rekompensá tur esnan “ku ta hasi esfuerso pa busk’é.”—Lesa Hebreonan 11:6.