Dami tabatin seis aña dia su tata a muri di un aneurisma selebral. Derrick tabatin nuebe aña dia su tata a muri di malesa di kurason. I Jeannie tabatin shete aña dia su mama a muri despues di a lucha un aña largu ku kanser na ovario. *

E hóbennan akí a enfrentá morto di un ser kerí ora nan tabata hopi chikitu. Abo a yega di pasa den e mesun tipo di situashon? Si ta asina, e artíkulo akí por yuda bo dil ku bo pèrdida. * Pero promé, laga nos ban trata algun punto tokante tristesa ku ta bon pa bo sa.

No ta ún manera di ekspresá tristesa so tin. Esei ke men ku e manera ku abo ta ekspresá bo tristesa kisas no ta meskos ku otro hende ta ekspresá di nan. E buki Helping Teens Cope With Death ta bisa: “No ta eksistí un manera simpel òf sierto regla ku bo mester sigui pa dil ku morto di un ser kerí.” Loke ta importante ta pa bo no tene bo tristesa aden. Dikon nò? Pasobra . . .

Si bo tene bo tristesa aden, esei por hasi bo malu. Jeannie, kende nos a menshoná na komienso di e artíkulo akí, a bisa: “Mi a pensa ku mi mester ta fuerte pa mi ruman muhé chikitu. P’esei mi a hasi duru. Te awe mi tin tendensia di no ekspresá mi sintimentunan di pena. Esei no ta bon.”

Ekspertonan ta bai di akuerdo ku Jeannie. E buki The Grieving Teen ta bisa: “Bo no por keda sin ekspresá bo sintimentunan. Sino, tardi òf trempan, podisé nèt ora bo no ta ferwagt, lo bo eksplotá emoshonalmente òf bira malu físikamente.” Ademas, algun hende a kuminsá bebe di mas i usa droga pa purba di lubidá nan doló.

Tristesa por lanta otro sintimentunan desagradabel. Por ehèmpel, algun hende ta rabia ku e defuntu pasobra el a “bandoná” nan. Otronan ta kulpa Dios pasobra nan ta pensa ku Dios no mester a laga e hende muri. I tin hopi hende ta sinti nan mes kulpabel pa kosnan ku nan a hasi òf bisa e defuntu, i nan no por drecha e asuntu mas.

 Sin duda, e tristesa ku bo ta sinti ora bo pèrdè un ser kerí por ta un proseso kompliká. Kon bo por haña alivio i yudansa pa sigui padilanti?

Papia ku un hende. Kisas bo ta sinti ku bo ke ta bo so durante e temporada difísil akí. Pero si bo deshogá bo mes serka un miembro di famia òf un amigu, esei lo yuda bo dil ku bo emoshonnan i evitá ku e tragedia akí ta bira insoportabel pa bo.—Prinsipio di Beibel: Proverbionan 18:24.

Tene un dagboek. Skirbi tokante e mayor ku bo a pèrdè. Por ehèmpel, kiko ta e kos di mas bunita ku bo ta kòrda di dje? Skirbi tokante su bon kualidatnan. Kua di nan abo ke imitá?

Si pensamentunan negativo ta torturá bo, por ehèmpel, si bo no por stòp di pensa riba e manera brutu ku bo a papia ku bo mayor promé ku el a muri, skirbi loke bo ta sinti i dikon. Por ehèmpel: “Mi ta sinti mi kulpabel pasobra e dia promé ku mi tata a muri mi a diskutí kuné.”

Despues, analisá si bo sintimentu di kulpa realmente ta na su lugá. E buki The Grieving Teen ta bisa: “Bo no por kulpa bo mes p’e echo ku bo no tabata sa ku nunka mas lo bo por pidi despensa. No ta realístiko pa pensa ku un hende nunka no mester bisa ni hasi nada robes pa e no tin nodi di pidi despensa despues.”—Prinsipio di Beibel: Yòb 10:1.

Kuida bo kurpa. Sosegá bon, hasi sufisiente ehersisio i kome bon. Si bo no tin gana di kome, en bes di kome kuminda grandi, purba di kome snack saludabel vários biaha durante dia te dia bo apetit habri bèk. No purba di konsolá bo mes ku junk food òf alkohòl. E kosnan ei lo hasi bo situashon pió.

Papia ku Dios den orashon. Beibel ta bisa pa bo “tira bo karga riba [Yehova], i e lo sostené bo.” (Salmo 55:22) Orashon no ta algu ku bo ta hasi djis pa bo sinti bo mas mihó. Ora bo hasi orashon, bo ta ègt komuniká ku Dios kende “ta konsolá nos den tur nos tribulashonnan.”—2 Korintionan 1:3, 4.

Un manera ku Dios ta konsolá hende tristu ta mediante Beibel. Bo no ta kere ku ta un bon idea pa eksaminá loke Beibel ta siña enkuanto e berdadero kondishon di hende morto i e speransa di resurekshon? *—Prinsipio di Beibel: Salmo 94:19.