Hende ku tin norma i balor haltu tin un komprondementu kla tokante loke ta bon i loke ta malu. Nan norma- i balornan no ta kambia debí na sirkunstansia; mas bien, nan ta basá riba e prinsipionan ku ta guia nan kondukta asta ora ningun hende no ta wak.

Awendia kompañero di skol, músika, pelíkula i programanan di televishon ta bombardiá mucha ku diferente idea robes tokante loke ta bon i loke ta malu. E ideanan akí por pone nan kuminsá duda tokante e norma- i balornan ku nan a siña.

Esaki ta un problema grandi pa tiner. Segun e buki Beyond the Big Talk, na e edat ei, un tiner “mester komprondé ku e medionan di komunikashon i nan pareunan lo preshoná nan pa komportá nan mes na un sierto manera pa otro hende gusta nan. I nan mester siña tuma desishon di akuerdo ku loke nan a siña, asta si nan amigunan no gusta esei.” Klaru, e mayornan mester siña nan yunan esaki promé ku nan yu bira tiner.

Siña bo yu bon kla kiko ta bon i kiko ta malu.

PRINSIPIO DI BEIBEL: “Hende madurá . . . a entrená [nan kapasidat di komprondé] pa distinguí loke ta bon for di loke ta malu.”—Hebreonan 5:14.

• Bis’é klaramente kiko ta bon i kiko ta malu. Usa situashon den bida di tur dia pa e mira e diferensia entre loke ta bon i loke ta malu. Por ehèmpel, bo por bisa bo yu: “Esei ta onesto; esei no ta onesto.” “Esei ta bon; esei ta malu.” “Esei ta lif; esei no ta lif.” Ku tempu, bo yu lo siña kiko ta bon pa hasi i kiko no ta bon pa hasi.

• Splika dikon algu ta bon òf malu. Por ehèmpel, hasi pregunta manera: Dikon ta mihó pa ta onesto? Kon gañamentu por kibra amistat? Dikon ta malu pa hòrta? Splika bo yu dikon algu ta bon òf malu pa asina yud’é siña tuma bon desishon.

• Enfatisá dikon ta bon pa nos tin norma i balor. Bo por bisa bo yu: “Si bo ta onesto, otro hende lo konfia bo” òf “si bo ta lif, otro hende lo ke ta bo amigu.”

Hasi sigur ku bo famia ta bon konosí pa su norma- i balornan.

PRINSIPIO DI BEIBEL: “Sigui pone boso mes na prueba pa demostrá ki tipo di hende boso ta.”—2 Korintionan 13:5.

•   Bo famia mester ta bon konosí pa su norma- i balornan haltu, pa asina bo por bisa ku tur sinseridat:

  • “Nos famia no ta gaña.”

  • “Nos no ta dal òf zundra otro hende.”

  • “Nos no ta insultá otro hende.”

Bo yu lo ripará ku boso norma- i balornan haltu no ta simpel regla ku nan mester sigui, sino ku esakinan ta identifiká boso famia.

• Usa situashon di tur dia pa papia ku bo yu tokante boso norma- i balornan. Bo por kompará boso norma- i balornan ku situashon ku ta presentá na televishon òf na skol. Puntra bo yu: “Kiko abo lo hasi den e situashon ei?” òf “Kon nos famia lo tin ku trata ku e situashon akí?”

Yuda bo yunan pa nan ta determiná pa hasi loke ta bon.

PRINSIPIO DI BEIBEL: “Mantené un konsenshi limpi.”—1 Pedro 3:16.

• Elogiá nan. Si bo yu ta komportá su mes na un manera korekto, lag’é sa ku el a hasi bon i dikon el a hasi bon. Por ehèmpel, bo por bis’é: “Bo tabata onesto. Mi ta orguyoso di bo.” I si bo yu konfesá ku el a hasi algu malu, gradisié sinseramente pa su onestidat promé ku bo korigié.

• Korigí nan. Yuda bo yu aseptá ku su komportashon no tabata bon. Un yu mester sa kiko el a hasi malu i dikon den boso famia no ta tolerá kondukta asina. Algun mayor no ke korigí nan yu pa nan yu no sinti malu. Pero ora bo korigí mal kondukta di bo yu, esei por yud’é entrená su konsenshi i distinguí kiko ta bon i kiko ta malu.