Hindú ta kere ku hende ta sufri debí na e kosnan ku nan a hasi den nan bida aktual òf den nan bida anterior. Un persona ta stòp di sufri ora e alkansá moksha, esta, ora e ser librá di e siklo di renasementu. Pa logra esei, e tin ku alkansá un estado mental liber di e kosnan di e mundu akí.

Mòslem ta kere ku sufrimentu ta kastigu pa piká i prueba di fe. Segun Dr. Sayyid Syeed, Presidente di Fundashon Islámiko di Norteamérika, sufrimentu ta pone nos kòrda ku “semper nos mester gradisí Dios pa tur nos bendishonnan i ku nos mester yuda hende ku ta den nesesidat.”

Segun tradishon hudiu, nos ta sufri pa motibu di nos propio echonan. Algun hudiu ta bisa ku lo tin un resurekshon, i ku despues lo tin hustisia pa hende ku a sufri sin ku nan tabata meresé esei. Pero hudiu místiko, òf kabbalah, ta siña ku reenkarnashon ta duna un hende vários oportunidat pa libra di su pikánan.

Budista ta kere ku kada bes nos ta reenkarná i ku nos ta sufri den kada bida te ora nos no ta hasi malu mas, no tin mal deseo mas ni mal sintimentu mas. Nan ta kere tambe ku, danki na sabiduria, bon obra i dominio riba nos pensamentunan, un hende por logra alkansá nirvana, esta, un estado den kua no tin sufrimentu mas.

Segun e dikshonario A Dictionary of Comparative Religion, hende ku ta sigui Konfusio ta pensa ku sufrimentu ta bini “prinsipalmente debí na fout i eror di hende.” Aunke nan ta rekonosé ku por evitá vários tipo di sufrimentu si un hende hiba un bida bon, nan ta kere ku den mayoria di kaso sufrimentu ta ser kousá pa “forsa spiritual ku hende no tin kontrol riba dje. Den e kasonan ei, hende no tin otro opshon i mester aseptá ku esei ta destino.”

Algun religion di tribu ta bisa ku bruheria ta kousa sufrimentu. Tin hende ta kere ku e personanan ku ta hasi bruheria por duna nan suerte òf pone nan haña un aksidente. Nan ta pensa ku lo por kombatí bruheria hasiendo sierto rito. P’esei, ora un hende bira malu, nan ta bai un kurandero pa e duna nan remedi òf hasi rito pa kontrarestá e bruheria.

Un kristian ta relashoná sufrimentu ku e piká di e promé pareha, manera e buki di Génesis ta konta. Pero hopi iglesia a agregá nan propio ideanan. Por ehèmpel, algun katóliko ta kere ku nan sufrimentu ta manera un ofrenda na Dios pa Dios bendishoná nan iglesia òf salba un hende.