Konta nos algu di bo mes.

Mi a nase na aña 1959 den e stat Fuzhou, (provinsia di Jiangksi, China). Tempu mi tabatin ocho aña, e pais tabata eksperensiando e efektonan di loke awor nan ta yama e Revolushon Kultural. Mi tata, un ingeniero sivil, a haña enkargo pa traha un spoorban den un desierto ku ta keda hopi leu. Pa hopi tempu, ta un bes pa aña so e por a bishitá nos. E tempu ei mi tabata biba ku mi mama, kende tabata un maestra na un skol básiko. Eigenlijk, nos tabata biba na e skol kaminda e tabata duna lès. Na 1970, nos mester a muda bai Liufang. E tempu ei, Liufang tabata un pueblito pober den e distrito di Linchuan, kaminda tabatin skarsedat di kuminda.

Den kiko bo famia tabata kere?

Mi tata no tabata interesá den religion ni polítika. Mi mama tabata budista. Na skol e maestronan a siña mi ku bida a evolushoná mediante prosesonan natural, i mi a kere nan.

Kon bini bo a studia matemátika?

Mi gusta matemátika pasobra bo tin ku usa lógika pa haña e bèrdat. Mi a bai universidat na 1976, e aña ku Mao Tse-tung, lider di e revolushon, a muri. Mi a skohe matemátika komo mi vak prinsipal. Despues ku mi a haña mi master’s degree, mi promé trabou a enserá hasi investigashon matemátiko pa yuda produsí energia atómiko.

Kiko tabata bo promé impreshon di Beibel?

Na 1987, mi a bai Merka pa buska mi doktorado na e Universidat di Texas A&M. Mi tabata sa ku na Merka hopi hende ta kere den Dios i ta lesa Beibel. I mi a tende ku Beibel ta kontené hopi bon konseho,  p’esei mi a pensa ku mi mester les’é.

E siñansanan di Beibel a zona práktiko. Pero komo ku mi a topa ku un par di kos ku tabata difísil pa komprondé, mi a stòp di les’é.

Kiko a bolbe lanta bo interes den Beibel?

Na 1990, un Testigu di Yehova a bini na mi kas i a mustra mi loke Beibel ta bisa tokante un mihó futuro pa humanidat. El a pidi un pareha kasá pa yuda mi komprondé Beibel mas mihó. Despues, mi esposa, Liping, kende tambe tabata un ateo, a kuminsá studia Beibel. Na China e tabata duna lès di natuurkunde na skol sekundario. Nos a siña loke Beibel ta bisa tokante e orígen di bida. Nunka mi a yega di tende di un Kreador, pues mi a disidí di hasi mi propio investigashon.

Kiko presis bo a hasi?

Komo matemátiko, mi a haña entrenamentu pa kalkulá ki probabilidat tin ku algu ta sosodé. Tambe mi a siña ku pa bida por kuminsá diripiente mester di proteina. P’esei mi a purba di kalkulá kon grandi e chèns ta pa proteina yega na eksistensia di su mes. Proteina ta un di e molekülnan di mas kompliká ku ta eksistí, i sèlnan bibu por tin míles di diferente tipo di proteina ku tin kontakto físiko ku otro ku hopi presishon. Meskos ku hopi otro hende, mi a realisá ku ta improbabel, òf mihó bisa, asta imposibel pa un proteina forma di su mes. No tin nada ku mi a siña for di e teoria di evolushon ku a konvensé mi ku e molekülnan sumamente kompliká akí por a krea nan mes, pa no papia mes di e organismonan bibu ku no por funshoná sin proteina. Pa mi, tur e pruebanan ta indiká ku mester tin un Kreador.

Kiko a konvensé bo ku Dios ta e outor di Beibel?

Segun ku Testigunan di Yehova tabata duna mi lès di Beibel, mi a siña ku tin hopi profesia di Beibel ku a kumpli. Tambe mi a kuminsá mira ku ta benefisioso pa apliká prinsipionan bíbliko. Mi a puntra mi mes: Kon eskritornan di Beibel ku a biba míles di aña pasá por a skirbi konsehonan ku te awe ta práktiko? Pokopoko pero sigur mi a realisá ku Beibel ta e Palabra di Dios.

Kiko mas ta konvensé bo ku tin un Kreador?

Ora mi pensa riba loke tin den naturalesa, mi ta konkluí outomátikamente ku mester tin un Kreador. Aktualmente mi ta diseñá software pa kòmpiuter, i hopi bes mi ta keda asombrá pasobra nos mente ta hopi mas mihó ku e programanan di kòmpiuter. Por ehèmpel, e kapasidat ku nos mente tin pa komprondé abla ta impreshonante. Mayoria di nos por komprondé kiko un hende ta bisa fásilmente, asta si su frase ta inkompleto, si e ta gaga, hari, tosa, si e tin un aksènt pekuliar, si tin bochincha, si algu ta zona den background òf si e telefòn ta krak. Kisas bo ta pensa ku esaki ta masha normal. Pero diseñadónan di software sa ku no ta asina. Asta e mihó software ku por rekonosé abla ta leu for di loke nos selebro por hasi.

Distinto for di e kòmpiuternan di mas kompliká, nos selebro por diserní emoshon, rekonosé aksènt pekuliar i identifiká ken ta papiando a base di e karakterístikanan di e stèm. Diseñadónan di software ta buskando manera pa imitá e kapasidat ku e selebro humano tin pa komprondé abla. Mi ta konvensí ku hasiendo esei, en realidat nan ta studiando e kreashon di Dios.