Hende por tin prehuisio kontra un persona no solamente debí na su nashonalidat, rasa, tribu òf idioma, sino tambe debí na su religion, sekso òf klase sosial. Tin hende ta husga otro hende robes debí na nan edat, edukashon, limitashon físiko òf aparensia. Asina mes, nan ta sinti ku nan no tin prehuisio.

Ta posibel ku abo a ser kontagiá ku prehuisio? Mayoria di nos ta ripará ora un hende tin prehuisio. Pero kisas ta mas difísil pa ripará ora nos mes tin prehuisio. E bèrdat ta ku nos tur, di un manera òf otro, tin un sierto grado di prehuisio. Profesor David Williams, un sosiólogo, a bisa ku ora un hende ta pensa malu di un sierto grupo i despues ta sera konosí ku un persona di e grupo ei, “lo e trata e persona ei diferente sin ku e sa.”

Por ehèmpel, na un pais den zùitost Europa, unda un hòmber ku yama Jovica ta biba, tin un grupo minoritario. Jovica a bisa: “Mi a pensa ku niun hende di e grupo ei por ta bon hende. Pero mi no a pensa ku mi tabatin prehuisio pasobra mi a kere ku loke mi tabata pensa di nan ta bèrdat.”

Hopi gobièrnu ta pasa lei pa purba di kombatí rasismo i otro forma di prehuisio. Tòg nan no a logra kaba ku prehuisio. Dikon nò? Pasobra e leinan ei no ta gara e toro na su kachu, nan tin efekto solamente riba loke un persona ta hasi. Pero nan no tin efekto riba loke un persona ta pensa òf sinti. I prehuisio ta kuminsá den un persona su mente i kurason. Akaso esei ke men ku no ta bale la pena pa purba di vense prehuisio? Ta posibel pa kaba ku prehuisio?