E Evangelio di Lukas ta bisa ku Hesus a habri e ròl di Isaías, a lesa for di dje, i despues a lor’é ser’é bèk. Huan tambe a papia di un ròl. Na final di su Evangelio, el a bisa ku e no por a inkluí tur e milagernan ku Hesus a hasi den su ròl.—Lukas 4:16-20; Huan 20:30; 21:25.

Kon hende tabata traha ròl? Wèl, nan tabata plak pida pida di material manera kueru, pèrkamènt òf papiro na otro pa forma un ròl largu. Nan tabata lor’é rònt di un bara ku e banda skirbí paden. Nan tabata skirbi di ariba bai abou den kolumnanan kòrtiku i tabatin vários kolumna banda di otro. Si e ròl tabata largu, nan tabata pone un bara na kada ekstremo ku e lesadó por a usa pa habri e ròl ku un man i ser’é ku e otro te ora e yega kaminda e mester tabata.

The Anchor Bible Dictionary ta bisa ku “e bon di un ròl tabata ku e tabata sufisiente largu (hopi biaha mas o ménos 10 meter) pa kontené un buki kompleto i no tabata tuma hopi espasio.” Por ehèmpel, segun kálkulo, e ròl di e Evangelio di Lukas lo tabata mas o ménos 9,5 meter largu. Tin biaha, nan tabata kòrta e rant ariba i abou di un ròl i tabata usa un tipo di piedra gròf pa hasié fini. Despues, nan tabata tinzja e rantnan.

For di ora Dios a kuminsá nombra saserdote pa e israelitanan, ta solamente un hòmber tabata sirbi komo sumo saserdote te dia el a muri. (Numbernan 35:25) Aron tabata e promé sumo saserdote, i generalmente e yu hòmber mayó tabata sigui su tata den e puesto ei. (Éksodo 29:9) Hopi di e desendientenan maskulino di Aron a sirbi komo saserdote, pero masha poko di nan a sirbi komo sumo saserdote.

Ora Israel tabata bou di dominio di otro nashon, gobernantenan ku no tabata israelita tabata kita i pone sumo saserdote hudiu manera nan a haña tabata bon. Pero ta parse ku esnan ku a ser nombrá komo sumo saserdote kasi semper tabata bini di algun famia privilegiá, mayoria di biaha di e famia di Aron. Aparentemente, e ekspreshon “saserdotenan prinsipal” ta referí na miembronan destaká di e saserdosio. E saserdotenan prinsipal kisas tabata inkluí kabes di e 24 divishonnan di saserdote, esta, miembronan prominente di famia di sumo saserdote i eks sumo saserdotenan ku a ser bahá for di nan puesto, manera Anas.—1 Krónikanan 24:1-19; Mateo 2:4; Marko 8:31; Echonan 4:6.