Blessing * a yega Europa ku e promesa di haña trabou komo pelukera. Pero despues di dies dia di gòlpi i menasa ku nan lo hasi su famia daño, nan a fòrs’é pa traha komo prostituta.

Blessing mester a gana entre 200 i 300 euro pa anochi pa e por a paga e debe di mas ku 40.000 euro * ku e señora enkargá ku e kas di prostitushon a imponé riba dje. Blessing a splika: “Hopi biaha mi a pensa pa hui, pero mi tabatin miedu di loke nan lo a hasi ku mi famia. Mi tabata den un trampa.” E relato di Blessing ta parse ún di e mas o ménos kuater mion hendenan ku ta sklabisá den e industria internashonal di sèks.

Kasi 4.000 aña pasá, e rumannan hòmber di un adolesente ku yama Yosef a bend’é den sklabitut. Yosef a hañ’é ta sirbi komo esklabo di un famia prominente na Egipto. Kompará ku Blessing, na promé instante Yosef sí no a haña maltrato serka su doño. Pero ora Yosef a rechasá di drumi ku e esposa di su doño, e señora a akus’é falsamente di intento di violashon. Nan a sera Yosef den prizòn i mar’é na kadena.—Génesis 39:1-20; Salmo 105:17, 18.

Yosef tabata un esklabo di den pasado, i Blessing ta un esklabo di siglo 21. Pero nan tur dos tabata víktima di e práktika di hopi tempu di trafikashon di hende, ku ta un negoshi ku ta trata hende manera opheto ku e solo meta pa hasi hopi ganashi.

E manera di mas fásil ku e nashonnan por a yega na esklabo ta mediante guera. Nan ta bisa ku despues di un solo kampaña militar ku e rei egipsio Tutmosis III a hiba na Kanan, el a bini bèk ku 90.000 prizonero. E egipsionan a pone e prizoneronan  traha komo esklabo pa traha tèmpel, koba kanal i den mina.

Ademas, bou di e Imperio Romano, guera a produsí esklabo na abundansia, i tin bes e demanda pa esklabo a hiba na guera. Segun kálkulo, rònt di e promé siglo, kasi mitar di e habitantenan di Roma tabata konsistí di esklabo. Nan a abusá kruelmente di hopi esklabo egipsio i romano. Por ehèmpel, esklabonan ku tabata traha den minanan romano tabata yega mas o ménos 30 aña di edat so.

Segun ku tempu a pasa, e situashon no a mehorá. Entre siglo 16 i siglo 19, e trafikashon di esklabo entre Afrika ku Amérika tabata un di e negoshinan mas lukrativo na mundu. Segun un informe di UNESCO, ‘a sekuestrá i bende entre 25 pa 30 mion hòmber, muhé i mucha.’ Sientos di míles di hende a muri ora nan mester a krusa Oséano Atlántiko. Olaudahi Equiano, un esklabo ku a sobrebibí e biahe, a bisa: “E manera ku hende muhé tabata grita i e manera ku esnan ku tabata muriendo tabata keña a krea un esena hororoso ku bo no por imaginá.”

Lamentablemente, sklabitut no ta djis un historia trágiko. Segun e Organisashon Internashonal di Labor (ILO), mas o ménos 21 mion hende hòmber, muhé i mucha ta traha ainda komo esklabo ku tiki òf niun pago. Esklabonan di tempu moderno ta traha den mina, na fábrika di tela, fábrika di blòki, kas di prostitushon i kasnan privá. Aunke ku esaki ta ilegal, e forma di sklabitut akí ta sigui oumentá.

Trato kruel a motivá hopi esklabo pa bringa pa nan libertat. Den e promé siglo promé ku Kristu, e gladiadó Spartako i rònt di 100.000 esklabo a lanta un rebelion kontra Roma ku a frakasá. Den siglo 18, esklabonan riba e isla karibense di Hispañola a lanta kontra nan doño. E maltrato ku e esklabonan a haña na e plantashon di suku a provoká un guera sivil ku a dura 13 aña largu i ku finalmente a hiba na formashon di e nashon independiente di Haiti na aña 1804.

E liberashon di mas eksitoso den historia sin duda ta ora e israelitanan a bandoná Egipto. Aparentemente, henter un nashon di mas o ménos tres mion hende a ser librá for di sklabitut na Egipto. Sin duda, nan a meresé nan libertat. Beibel ta splika ku e egipsionan tabata amargá nan bida ku “tur e trabou ku rigurosamente nan tabata  imponé riba nan.” (Éksodo 1:11-14) Un sierto fárao a asta kuminsá un kampaña pa mata tur yu resien nasí di e israelitanan pa dominá e kresementu di e nashon di Israel.—Éksodo 1:8-22.

E manera ku e israelitanan a keda librá di e trato inhustu di parti di e egipsionan tabata algu úniko pasobra ta Dios mes a intervení. Dios a bisa Moises: “Mi ta konsiente di nan sufrimentunan. P’esei mi a baha bini pa libra nan.” (Éksodo 3:7, 8) Te ku dia djawe, tur aña hudiunan rònt mundu ta selebrá Pasku Hudiu pa konmemorá e evento ei.—Éksodo 12:14.

Beibel ta bisa ku “SEÑOR nos Dios lo no tin parti den inhustisia,” i e ta sigurá nos ku Dios no a kambia. (2 Krónikanan 19:7; Malakías 3:6) Dios a manda Hesus pa “proklamá liberashon na e prezunan . . . , pa duna libertat na esnan oprimí.” (Lukas 4:18) Esaki ta nifiká ku un hende por ta liber di tur tipo di sklabitut? Aparentemente ku nò. Hesus a bini na tera pa libra hende di sklabitut na piká i morto. Hesus a bisa: “E bèrdat lo hasi boso liber.” (Huan 8:32) Awe tambe, e bèrdat ku Hesus a siña hende a libra nan den hopi manera.—Wak e kuadro “ Librá for di un Otro Tipo di Sklabitut.”

En realidat, Dios a yuda libra Yosef i Blessing, kada un na un manera, for di sklabitut. Bo por lesa e relato ekstraordinario di Yosef den kapítulo 39 pa 41 den e buki bíbliko di Génesis. Blessing su lucha pa libertat tambe tabata remarkabel.

Despues ku nan a saka Blessing for di un pais europeo, el a bai Spaña. Einan el a topa ku Testigunan di Yehova i a tuma un kurso di Beibel serka nan. Blessing tabata determiná pa kambia su bida. El a haña un trabou i a konvensé e señora enkargá ku e kas di prostitushon pa baha su debe di tur luna. Un dia, Blessing a risibí un yamada di e señora. E kier a kanselá Blessing su debe i pidié pordon. Kiko a sosodé? Wèl, e señora tambe a tuma un kurso di Beibel serka Testigunan di Yehova. Blessing a bisa: “E bèrdat ta hasi bo liber den maneranan maravioso.”

E maltrato ku e esklabonan israelita tabata haña na Egipto a hasi Yehova tristu. Dios ta sinti meskos awe ora e mira e inhustisianan akí. Ta bèrdat ku mester bini un kambio grandi den sosiedat humano pa por eliminá tur tipo di sklabitut. Pero Dios a primintí di trese e kambio akí. Beibel ta bisa: “Segun su promesa nos ta spera shelu nobo i un tera nobo, i den esakinan hustisia lo biba.”—2 Pedro 3:13.