Tin masha hopi konseho disponibel riba e tópiko akí. Pero no ta tur ta yuda. Por ehèmpel, tin hende ta bisa ku bo no mester yora òf ekspresá bo sintimentunan mes. Otronan ta bisa ku bo mester hasi nèt lo kontrario i saka afó tur loke bo ta sinti. Beibel ta duna un punto di bista mas balansá, un ku investigashonnan resien ta apoyá.

Hende di algun kultura ta haña ku no ta pas pa hende hòmber yora. Pero nos mester tin bèrgwensa pa yora, muchu ménos den públiko? Ekspertonan riba tereno di salú mental ta rekonosé ku ta normal pa nos yora ora nos ta tristu. I esei, ku tempu, lo yuda bo sigui padilanti apesar di e pèrdida di un ser kerí. Ma si bo tene bo tristesa aden, bo por hasi mas daño na bo mes. Beibel no ta apoyá e idea ku ta malu pa yora ni ku hende hòmber no mester yora di tristesa. Kòrda riba Hesus. Maske e tabatin poder pa resusitá hende, tòg el a yora ora su amigu stimá Lázaro a muri.—Huan 11:33-35.

Hopi biaha, e doló ku esnan ku a keda atras ta sinti por bai akompañá ku rabia, spesialmente ora e ser kerí fayesé ònferwagt. Tin hopi motibu pakiko nan por sinti asina. Por ehèmpel, un persona respetá por bisa algu sin pensa òf sin base. Un hòmber di Suráfrika ku yama Mike a bisa: “Mi tabatin apénas 14 aña tempu mi tata a fayesé. Na entiero, e pastor anglikano a bisa ku Dios tin mester di bon hende i ta tuma nan trempan den bida. * M’a rabia ora el a bisa esei pasobra nos ègt tabatin mester di nos tata. Despues di 63 aña, ainda mi ta sinti e doló.”

Awor, kiko si bo tin sintimentu di kulpa? Foral ora un persona fayesé inesperadamente, e famia òf amigu di e defuntu por pensa: ‘Ken sa ku e no por ta na bida awor akí si solamente mi a hasi tal i tal kos.’ Òf kisas e último biaha ku boso tabata huntu, boso tabatin un diskushon. Esaki por laga bo haña mas sintimentu di kulpa.

Si rabia i sintimentu di kulpa ta molestiá bo, ta importante pa bo no tene e emoshonnan ei aden. Mas bien, papia ku un amigu ku lo skucha bo i sigurá bo ku ta normal pa bo tin e sintimentunan ei ora bo pèrdè un ser kerí. Beibel ta rekordá nos: “Un amigu ta stima tur ora bai, i un ruman ta nasí pa tempu di atversidat.”—Proverbionan 17:17.

E mihó Amigu ku un hende ku a pèrdè un ser kerí por tin ta nos Kreador, Yehova Dios. Deshogá bo mes serka dje pasobra ‘e ta interesá den bo.’ (1 Pedro 5:7) Ademas, e ta primintí tur hende ku hasi esei ku “e pas di Dios ku ta surpasá tur komprondementu” lo por fria nan doló i trankilisá nan. (Filipensenan 4:6, 7) Anto laga Dios yuda bo rekuperá di e doló pa medio di e konsuelo di su Palabra, Beibel. Bo por traha un lista di teksto ku ta duna konsuelo. (Wak e  kuadro.) Bo por asta memorisá algun di nan. Ora bo meditá riba e  tekstonan akí, nan por yuda bo, spesialmente ora bo ta bo so òf ora bo no por drumi bon.—Isaías 57:15.

Resientemente, un hòmber di 40 aña, ku nos lo yama Jack, a pèrdè su kasá stimá debí na kanser. Jack ta bisa ku tin biaha un soledat pisá ta dal e. Pero orashon a yud’é hopi. El a bisa: “Ora mi resa na Yehova, nunka mi ta sinti mi mi so. Hopi biaha mi ta lanta den anochi i mi no por pega soño mas. Despues ku mi lesa un parti di e Skritura i meditá riba dje, i tambe deshogá mi mes den orashon, mi ta sinti un pas mas ayá di normal i mi mente i kurason ta trankil. Esei ta pone ku mi por drumi atrobe.”

Mama di un mucha muhé ku yama Vanessa a fayesé debí na malesa. Vanessa tambe a mira ku orashon ta yuda. El a bisa: “Den e momentonan di mas difísil, mi tabata djis menshoná e nòmber di Dios i basha na yoramentu. Yehova tabata skucha mi orashonnan, i semper el a duna mi e forsa ku mi tabatin mester.”

Algun konsehero ku ta yuda hende trata ku tristesa ta konsehá esnan ku ta lucha ku tristesa pa yuda otro hende òf pa hasi trabou boluntario pa komunidat. Esei por trese felisidat i fria e doló. (Echonan 20:35) Hopi kristian ku ta tristu a ripará ku nan ta haña konsuelo ora nan yuda otro hende.—2 Korintionan 1:3, 4.