Mi a nase na Ciudad Mante, un region bunita den e estado di Tamaulipas, México. Por lo general, e habitantenan di e stat ta amabel i generoso. Pero lamentablemente, debí na krímen organisá, e área tabata masha peligroso.

Mi ta e di dos di kuater ruman hòmber. Mi mayornan a batisá mi den iglesia katóliko, i mas despues mi a forma parti di e kor di parokia. Mi kier a agradá Dios pasobra mi tabatin miedu di ser husgá i di kima pa semper den fièrnu.

Tempu mi tabatin sinku aña, mi tata a bai laga nos. Esei a hasi mi hopi doló i a laga un bashí den mi kurason. Nos tabata stim’é mashá, i p’esei mi no por a komprondé ta dikon el a bandoná nos. Mi mama tabatin ku traha hopi ora pa e por a kria ami ku mi tres ruman hòmbernan.

Mi a probechá di e situashon i a keda sin bai skol pa asina mi por a asosiá ku muchanan mas grandi. Nan a siña mi papia palabra malu, huma, hòrta i bringa ku moketa. Komo ku mi tabata gusta dominá otro hende, mi a siña bòks, lucha libre, arte marsial i tambe kon pa usa arma. Mi a bira un adolesente violento. Hopi biaha mi tabata enbolbí den tiroteo, i vários biaha mi a keda tur na sanger i kasi morto bentá riba kaya. Mi tabata kousa mi mama hopi doló ora e tabata haña mi den e situashon ei i mester a hisa mi i hiba mi hospital masha lihé.

Tempu mi tabatin 16 aña, un di mi amigunan di infansia ku yama Jorge a bini na nos kas. El a bisa nos ku e ta un Testigu di Yehova i ku e kier a kompartí un mensahe importante ku nos. El a kuminsá splika nos su kreensianan i a usa Beibel pa hasi esei. Nunka mi a lesa Beibel, i mi tabata fasiná pa siña tokante Dios su nòmber i su propósito. Jorge a ofresé nos un kurso di Beibel, i nos a aseptá.

Mi a sinti un gran alivio ora mi a siña ku fièrnu no ta un siñansa di Beibel. (Salmo 146:4; Eklesiástes 9:5) Unabes mi a siña esei, mi no tabatin miedu mas di Dios. Mas bien, mi a kuminsá mir’é komo un Tata ku ta stima su yunan i ku ke lo mihó pa nan.

 Segun ku mi tabata siña mas durante mi kurso di Beibel, mi a mira e nesesidat pa hasi kambio den mi personalidat. Mi mester a kultivá humildat i stòp di akudí na violensia. E konseho na 1 Korintionan 15:33 a yuda mi. E ta bisa ku “mal kompania ta daña bon kustumber.” Mi a realisá ku si mi kier a transformá mi personalidat, mi mester a stòp di asosiá ku hende ku tabatin mal influensia riba mi. Pues mi a kambia mi amigunan di ántes pa miembronan di e berdadero kongregashon kristian; hende ku no tabata resolvé nan desakuerdonan ku moketa òf otro forma di violensia, ma ku prinsipionan di Beibel.

Un otro pasashi di e Skritura ku tabatin un efekto riba mi ta esun di Romanonan 12:17-19. E ta bisa: “No paga malu ku malu. . . . Si ta posibel, te asina leu ku ta dependé di boso, keda na pas ku tur hende. No tuma vengansa, . . . pasobra ta pará skirbí: ‘“Vengansa ta di mi; ami lo paga bèk,” Yehova ta bisa.’” Mi a bin aseptá ku Yehova lo atendé ku inhustisia na su mes manera i na su mes tempu. Pokopoko mi a kambia mi estilo di bida violento.

Nunka lo mi lubidá loke a pasa ku mi un anochi ora mi tabata bai kas. Un grupo di hóben di un gang rival di ántes a ataká mi, i e lider di e grupo a dal mi den mi lomba i a grita: “Defendé bo mes awor!” Na e momento ei, mi a hasi un orashon kòrtiku na Yehova i a pidié yuda mi kontrolá mi mes. Aunke mi tabatin masha gana di defendé mi mes, mi a logra skapa. Su manisé, mi a topa e lider di e gang ora e tabata su so. Mi sanger a herebé den mi kurpa, pero den silensio mi a bolbe pidi Yehova yuda mi kontrolá mi mes. Pa mi sorpresa, e hóben a kana bini serka mi i a bisa: “Pordoná mi pa loke a pasa ayera nochi. Bèrdat ta ku lo mi tin gana di ta manera bo. Mi ke studia Beibel.” Mi tabata masha kontentu ku mi por a dominá mi rabia. Danki na esei, el a kuminsá un kurso di Beibel.

Lamentablemente, mi sobrá famia no a sigui studia Beibel e tempu ei. Ma mi a tuma un desishon firme pa sigui studia i no laga nada ni niun hende stroba mi. Mi tabata sa ku asosiashon riba un base regular ku e pueblo di Dios lo a kura mi heridanan emoshonal i duna mi e famia ku mi tabatin mester di dje. Mi a sigui hasi progreso, i na 1991, mi a batisá komo Testigu di Yehova.

Mi tabata un persona amargá, violento i ku tabata gusta dominá otro hende. Pero e Palabra di Dios a transformá mi bida por kompleto. Pa e último 23 añanan, mi tin e privilegio di sirbi komo un predikadó di tempu kompleto i ta kompartí e mensahe bíbliko di pas ku ken ku ke skucha.

Pa un tempu, mi a hasi trabou boluntario na e sukursal di Testigunan di Yehova na México. Einan mi a konosé Claudia, un mucha muhé kristian yen di energia, i nos a kasa na 1999. Mi ta masha gradisidu na Yehova ku el a bendishoná mi ku un fiel kompañera.

Nos a sirbi den un kongregashon di idioma di seña di México i tabata yuda hende surdu siña tokante Yehova. Mas despues, nos a ser invitá pa muda bai Belize pa siña hende tokante Beibel. Aunke nos bida ta muchu mas simpel akinan, nos tin tur loke nos mester pa ta felis. Nos lo no kambi’é pa nada.

Ku tempu, mi mama a bolbe sigui un kurso di Beibel i a batisá. Ademas, awor mi ruman hòmber di mas grandi, su kasá i nan yunan tambe ta Testigu di Yehova. Algun di mi amigunan di ántes ku kende mi a kompartí e mensahe di Reino tambe ta sirbi Yehova.

Ta tristu pa bisa ku algun miembro di mi famia a muri debí ku nan no a kambia nan karakter violento. Si mi a sigui e kaminda ei, probablemente mi tambe lo a muri. Mi ta gradisidu na Yehova ku el a hala mi serka dje i su sirbidónan, kendenan ku bondat i pasenshi a siña mi pa apliká prinsipionan bíbliko den mi bida.