Pronto Lo No Tin Odio Mas!
Asta si nos logra saka odio for di nos mes kurason, nos no por fòrsa otro hende pa hasi meskos. P’esei, hende inosente lo sigui ta víktima di odio. Pues, ta ken por kaba ku odio pa semper?
Ta Yehova Dios so por kaba ku odio pa semper. I esei ta eksaktamente loke Beibel ta primintí ku Dios lo hasi.—Proverbionan 20:22.
DIOS LO ELIMINÁ TUR LOKE TA KOUSA ODIO
-
1. SATANAS E DIABEL. Ta Satanas ta responsabel pa e odio ku nos ta mira awe. Dios lo destruí Satanas i tur esnan ku meskos kuné ta odia otro hende.—Salmo 37:38; Romanonan 16:20.
-
2. SATANAS SU MUNDU MALBADO. Dios lo kaba ku tur loke ku ta promové odio, inkluso polítikonan korupto i lidernan religioso ku ta promové odio. Ademas, Dios lo eliminá e sistema komersial ku ta golos i ku ta probechá di hende.—2 Pedro 3:13.
-
3. IMPERFEKSHON DI HENDE. Beibel ta splika ku tur hende a heredá imperfekshon, esta, e tendensia di pensa, sinti i hasi loke ta robes. (Romanonan 5:12) E tendensia pa odia otro hende ta un di e sintimentunan robes ku imperfekshon ta kousa. Dios lo yuda nos eliminá tur e pensamentu- i sintimentunan robes ei, i e ora ei lo no tin odio mas.—Isaías 54:13.
BEIBEL TA PRIMINTÍ UN MUNDU SIN ODIO
-
1. LO NO TIN INHUSTISIA MAS. E Reino di Dios, un gobièrnu hustu den shelu, lo goberná riba tera pa semper. (Daniel 2:44) Lo no tin prehuisio ni intoleransia mas. Dios lo kaba ku tur inhustisia ku hende ta enfrentando awor.—Lukas 18:7.
-
2. TUR HENDE LO BIBA NA PAS. Ningun hende lo no sufri pa motibu di violensia òf guera. (Salmo 46:9) Komo ku tur hende riba tera lo ta pasífiko, tera lo ta un lugá safe pa biba.—Salmo 72:7.
-
3. TUR HENDE LO BIBA DEN KONDISHON PERFEKTO. Tur hende riba tera lo demostrá amor berdadero na otro. (Mateo 22:39) Nada lo no pone hende sufri mas; hende lo no sinti nan tristu mas pa motibu di pensamentu- òf rekuerdonan doloroso. (Isaías 65:17) Den e tempu ei, lo no tin odio mas, i hende “lo deleitá nan mes den pas abundante.”—Salmo 37:11.
Abo lo tin gana di biba den un mundu asina? For di awor, prinsipionan di Beibel ta yudando hende vense odio. (Salmo 37:8) Esei ta loke miónes di Testigunan di Yehova rònt mundu ta hasiendo. Aunke nan ta bini for di diferente kultura i background, nan ta manera un famia uní ku ta stima otro.—Isaías 2:2-4.
Testigunan di Yehova lo ta kontentu pa yuda otro hende haña sa kon nan ta trata ku inhustisia i diskriminashon. Loke bo siña por yuda bo tiki tiki pa remplasá bo odio pa amor. Bo por siña kon pa trata tur hende bon—asta hende ku por parse di ta malagradesí òf yen di odio. Komo resultado, lo bo ta felis for di awor, i bo amistat ku otro hende lo bira mas mihó. I e parti mas importante ta ku lo bo siña kon pa biba bou di Dios su Reino ku lo kaba ku odio pa semper.—Salmo 37:29.
Otro Artíkulo Interesante
E TOREN DI VIGILANSIA
Kiko e Reino di Dios Lo Logra?
Hesus tabata sa ku e Reino di Dios ta e úniko gobièrnu ku por resolvé e problemanan ku tin riba tera. Kiko e Reino a hasi kaba ku ta duna nos e konfiansa ei?
SPIÈRTA!
Kon Prehuisio Por Ser Eliminá?
Kiko ta kuater kos ku e Reino di Dios lo hasi pa eliminá prehuisio?
