Loke e Binida di Kristu Lo Logra

“TEROR NA SÃO PAULO.” Asina e revista Veja a deskribí e kuater dianan den mei 2006 ora krímen organisá a humiá e stat di mas grandi i mas riku di Brazil. Entre e mas o ménos 150 personanan ku a pèrdè nan bida durante “mas ku 100 ora di teror” tabatin polis, kriminal i siudadano komun.

Violensia ta alkansando titularnan di notisia den práktikamente tur skina di tera, i no ta parse ku lidernan humano por pone fin na dje. Nos mundu ta birando un lugá mas i mas peligroso pa biba ariba. Tal bes bo ta sinti bo desanimá pasobra unda ku bo bira, tin mal notisia. Sin embargo, e tempu pa un kambio ta tras di porta.

Hesus a siña su siguidónan pidi pa e Reino di Dios bini i pa Dios su boluntat sosodé “na tera meskos ku den shelu.” (Mateo 6:9, 10) E Reino aki ta un gobièrnu den kua Dios a nombra Kristu Hesus komo Rei. Lo e resolvé tur problema di humanidat. Sin embargo, pa e Reino di Dios trese kambio riba tera, gobernashon humano mester traha lugá pa e gobernashon di Kristu. I esaki ta eksaktamente loke e binida di Kristu lo logra.

Un Kambio Pasífiko?

E nashonnan lo someté nan pasífikamente na e gobernashon di Kristu? Apòstel Juan a haña un vishon ku ta duna e kontesta. E ta konta: “Mi a mira e bestia [e sistema polítiko di mundu] i e reinan di tera i nan ehérsitonan, reuní tur huntu pa hasi guera kontra esun [Hesus] ku tabata sintá riba e kabai, i kontra su ehérsito.” (Revelashon 19:19) Kiko lo para di e reinan di tera den e guera aki? Segun Beibel, e Rei ungí di Yehova lo “kibra nan ku bara di heru, lo [e] kibra nan na pida-pida manera kos trahá di klei.” (Salmo 2:9) Lo e kaba ku e sistema polítiko kompletamente. E Reino di Dios “lo garna i pone un fin na tur e reinonan [humano] aki, ma e mes lo dura pa semper.”—Daniel 2:44.

Kiko lo para di hende ku ta kontra e Reino di Dios? “Ora Señor Hesus wòrdu manifestá for di shelu ku su angelnan poderoso den kandela tur na vlam,” Beibel ta bisa ku Hesus lo “duna pago meresí na esnan ku no  konosé Dios i na esnan ku no ta obedesé e evangelio.” (2 Tesalonisensenan 1:7, 8) Proverbionan 2:22 ta bisa: “E malbadonan lo wòrdu kòrtá kitá for di tera, i e traidónan lo wòrdu ranká for di dje ku rais ku tur.”

Relashoná ku e binida di Kristu, Beibel ta bisa: “Mira, e ta bin ku e nubianan, i tur wowo lo mir’é.” (Revelashon 1:7) Hende lo no mir’é ku nan wowo literal. For di dia Hesus a subi na shelu, e ta un spiritu ku “ta biba den e lus inaksesibel; kende ningun hende no a mira ni por mira.”—1 Timoteo 6:16.

Hesus no tin nodi tuma un kurpa humano pa e habitantenan di tera “mir’é,” meskos ku Yehova tampoko no tabatin nodi aparesé visiblemente ora el a trese e Dies Plaganan riba e egipsionan den tempu di Moisés. E hendenan di e tempu ei no tabatin duda ku ta Yehova tabata kousando e plaganan, i nan a haña nan fòrsá ta rekonosé su poder. (Eksodo 12:31) Meskos tambe, ora Kristu tuma akshon komo Ehekutor di Dios, e malbadonan lo haña nan fòrsá ta “mir’é,” òf komprondé ku Dios ta husgando nan pa medio di Hesus. Nan lo sa esaki pasobra humanidat lo a ser spièrtá di antemano. Sí, “tur wowo lo mir’é [Hesus], . . . i tur e tribunan di tera lo lamentá pa su motibu.”—Revelashon 1:7.

Pa berdadero pas i prosperidat por ser restablesé riba tera, mester destruí e malbadonan i eliminá gobernashon malbado. I esei ta algu ku Kristu lo hasi. E ora ei lo e tuma mando kompletu di tur asuntu riba tera, i kambionan desisivo lo sigui.

Un Restorashon Ku Ta Trese Benefisio

Apòstel Pedro a papia tokante e “restorashon di tur kos, di kua Dios a papia pa medio di boka di su profetanan santu for di antigwedat.” (Echonan 3:21) E restorashon aki ta inkluí e transformashon ku lo tuma lugá riba tera durante e gobernashon di Kristu. Un di e profetanan pa medio di ken Dios a papia di e “restorashon di tur kos” riba tera ta profeta Isaias, kende a biba den siglo ocho promé ku nos era. El a profetisá ku Hesukristu, e “Prens di Pas,” lo restorá pas riba tera. Relashoná ku e gobernashon di Kristu, e profesia di Isaias ta deklará: “Lo no tin fin na e oumento di su gobernashon i di pas.” (Isaias 9:6, 7) Hesus lo eduká pueblonan di tera pa nan biba na pas. E habitantenan di e tera dje tempu ei “lo deleitá nan mes den pas abundante.”—Salmo 37:11.

Kiko lo sosodé ku pobresa i hamber bou di e gobernashon di Kristu? Isaias a bisa: “SEÑOR di ehérsitonan lo prepará un bankete luhoso pa tur pueblo riba e seru aki, un bankete di biña bieu, e mihó pida-pidanan di karni i tuti i biña bieu refiná.” (Isaias 25:6) E salmista a kanta: “Lo tin abundansia di maishi den e tera, riba kabes di e serunan [“lo tin sobreabundansia,” NW].” (Salmo 72:16) Ademas, relashoná ku e habitantenan di tera, nos ta lesa: “Nan lo traha kas i biba den nan; tambe nan lo planta kunukunan di wendrùif i kome nan fruta. Nan lo no traha kas pa otro hende biba aden, ni planta pa otro hende kome; pasobra manera e dianan di un palu, asina e dianan di mi pueblo lo ta; i mi skohínan lo disfrutá di e obra di nan mannan pa hopi tempu.”—Isaias 65:21, 22.

Isaias a profetisá tambe ku lo bini un fin na malesa i morto. Mediante Isaias, Dios a bisa: “E ora ei wowo di e siegunan lo mira, i orea di e surdunan lo tende. Anto e kohonan lo bula manera biná, i lenga di e muda lo grita di alegria.” (Isaias 35:5, 6) E tempu ei, “ningun habitante lo no bisa: ‘Mi ta malu.’” (Isaias 33:24) Dios “lo traga morto pa semper, i Señor DIOS lo seka awa di wowo for di tur kara.”—Isaias 25:8.

 Kiko di tur e mortonan “den graf”? (Juan 5:28, 29) Isaias a profetisá: “Bo mortonan lo biba; nan . . . lo lanta.” (Isaias 26:19) Sí, esnan ku a muri lo bolbe bek na bida!

“Dios Ta Bo Trono pa Semper”

E binida di Kristu lo hiba na e restorashon kompletu di planeta Tera. Tera lo ser transformá den un paradeis glorioso i humanidat lo ta uní den adorashon di e Dios berdadero. Nos por tin e siguransa ku Hesukristu lo logra eliminá maldat for di tera i krea kondishonnan hustu?

Pensa riba e fuente di e poder i outoridat ku Hesus a risibí. En konekshon ku e Yu, Beibel ta deklará: “Dios ta bo trono pa semper hamas, i e bara di bo reino ta e bara di hustisia. Bo a stima hustisia, i a odia maldat.” (Hebreonan 1:8, 9, NW) E fuente di Hesus su trono, esta, su funshon òf outoridat, ta Yehova. Dios ta esun ku a duna Hesus su trono. Lo no tin ningun problema muchu difísil pa Hesus resolvé.

Despues di Hesus su resurekshon, el a bisa su disipelnan: “Tur outoridat a wòrdu duná na mi den shelu i riba tera.” (Mateo 28:18) Promé Pedro 3:22 ta deklará: “Angelnan i outoridatnan i podernan a wòrdu sometí na dje.” Ningun poder òf outoridat ku bai kontra Hesus lo tin éksito. No tin nada ku por strob’é di trese benefisio duradero pa humanidat.

Ki Efekto e Binida di Kristu Tin Riba Hende?

Den e karta ku apòstel Pablo a skirbi na e Tesalonisensenan, el a bisa: “Nos ta tene presente tur ora boso fiel obra i boso amoroso labor i boso awante debí na boso speransa den nos Señor Hesukristu dilanti nos Dios i Tata.” (1 Tesalonisensenan 1:3, NW) Pablo a atribuí labor fruktífero i awante na speransa den Hesukristu. E speransa ei ta inkluí fe den e binida di Kristu i den e restorashon pa kua e ta habri kaminda. E mesun speransa ei por sostené kristiannan berdadero, òf yuda nan perseverá, apesar ku nan haña nan den situashonnan sumamente difísil.

Tuma por ehèmpel Carlos, kende ta biba na São Paulo, Brazil. Na ougùstùs 2003, Carlos a haña sa ku e tabatin kanser. Djei padilanti, el a hasi ocho operashon ku a debilit’é i kous’é hopi doló. Tòg, el a sigui ser un fuente di animashon pa otro hende. Por ehèmpel, un biaha ku e tabata prediká riba kaya dilanti di un hospital grandi, el a topa un Testigu di Yehova, kende su esposo tabata hañando kimoterapia. Komo ku Carlos mes tambe tabata sinti e efektonan devastador di kanser, e por a animá i konsolá tantu e esposo komo e esposa. Despues, e pareha a komentá ku e kòmbersashon ei a lanta nan ánimo. Asina Carlos a sinti ku en bèrdat e siguiente palabranan di Pablo a kumpli den su kaso: “[Dios] ta konsolá nos den tur nos aflikshon, pa asina nos tambe por konsolá esnan ku ta den kualke aflikshon ku e mesun konsuelo ku Dios a konsolá nos kuné.”—2 Korintionan 1:4.

Kiko ta yuda Carlos haña e forsa pa sigui animá otro hende apesar di su enfermedat? E speransa di e binida di Kristu i tur loke esei lo logra ta motivá Carlos pa sigui “hasi bon.”—Galationan 6:9.

Konsiderá tambe e kaso di Samuel, kende su ruman hòmber a ser asesiná apénas 50 meter for di e kas di nan tata. Su ruman a risibí dies tiru i e kadaver a keda ocho ora riba asera miéntras polis tabata investigá e krímen. Samuel no por lubidá loke a pasa e dia ei. Sin embargo, loke a sosten’é tabata e speransa ku Kristu lo kaba ku tur maldat for di riba tera i ku e gobernashon hustu ku lo sigui despues di esei lo trese bendishon pa humanidat. Hopi biaha e ta imaginá su  mes kon e ta brasa su ruman resusitá den Paradeis riba tera.—Echonan 24:15.

Kiko Bo Mester Hasi?

Lo bo haña hopi konsuelo den e speransa di e binida di Kristu i loke lo e logra. Sin duda, Hesukristu lo resolvé tur e kousanan básiko di e problemanan di humanidat i eliminá tur e maldat ku ta afligí nos.

Kiko bo mester hasi pa disfrutá di e bendishonnan ku e gobernashon di Kristu lo drama riba humanidat? Studia Beibel, e Palabra di Dios, kuidadosamente. Den un orashon na su Tata, Hesus a bisa: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Juan 17:3) Pone e meta pa analisá loke Beibel ta siña. Testigunan di Yehova den bo área lo ta kontentu pa yuda bo ku esaki. Nos ta invitá bo kalurosamente pa tuma kontakto ku nan òf pa skirbi e editornan di e revista aki.

[Plachinan na página 7]

E binida di Kristu lo hiba na e restorashon kompletu di tera

[Rekonosementu]

Potrèt chikitu, solamente den fondo: Rhino and Lion Park, Gauteng, South Africa