“Señor, Dikon Bo A Keda Ketu?”

ASINA Papa Benedikto XVI a puntra ora el a bishitá e eks-kampo di konsentrashon na Auschwitz, Polonia, dia 28 di mei 2006. Na e sitio kaminda e nazinan a mata sientos di míles di hudiu i otro hende, el a bisa mas aleu: “E lugá aki ta lanta masha hopi pregunta! Kada bes e pregunta ta presentá: Unda Dios tabata den e dianan ei? Dikon el a keda ketu? Kon e por a permití e matansa sinfin aki, e triunfo aki di maldat? . . . Nos mester sigui sklama na Dios humildemente pero insistentemente: Hasi algu! No lubidá riba humanidat, bo kreashon!”

E diskurso di papa a provoká reakshonnan fuerte. Algun hende a ripará ku deliberadamente el a evitá di papia riba sierto temanan. Por ehèmpel, e no a menshoná e prehuisio i odio kontra hudiu ku tabata ligá ku e krueldatnan di Auschwitz. Otronan a interpretá su palabranan komo un intento pa minimisá e pidimentu di pordon di parti di Papa Juan Pablo II pa e pikánan ku iglesia a kometé. Un periodista katóliko, Filippo Gentiloni, a remarká: “Pero tabata lógiko ku hopi komentarista, ora nan a haña nan konfrontá ku e pregunta difísil relashoná ku unda Dios tabata—un pregunta sin kontesta—a pidi na su lugá un kontesta pa e pregunta mas fásil: Unda Pio XII tabata?” E komentaristanan tabata referí na e silensio ku Papa Pio XII a mantené durante e Holokousto.

E Holokousto i tur e otro aktonan di genosidio ku hende a kometé atraves di historia humano ta demostrá ku “hende a ehersé outoridat riba . . . otro hende pa su daño.” (Eklesiastés 8:9) Ademas, e Kreadó di hende no a keda ketu en bista di asina tantu krueldat. Mediante e páginanan di Beibel, el a revelá pakiko e ta permití maldat. Tambe Dios a garantisá nos ku e no a lubidá riba humanidat. De echo, pronto e periodo di tempu ku Dios a permití hende goberná nan mes lo yega na su fin. (Jeremias 10:23) Abo ke sa mas tokante ki propósito Dios tin pa nos? Testigunan di Yehova gustosamente lo yuda bo haña e kontesta ku Beibel ta duna riba e preguntanan ku Papa Benedikto XVI no por a sali afó.

[Rekonosementu pa Potrèt na página 32]

Oświęcim Museum