FOR di ora ku mi yu hòmber Gary a nase na aña 1958, mi a sinti ku tabatin algu ku no ta bon. Pero a tuma dòkternan dies luna pa por a saka afó kiko tabata falta e mucha i sinku aña mas pa spesialistanan na Lònden por a konfirmá e diagnóstiko. Tempu Gary tabatin nuebe aña, mi yu muhé Louise a nase. Ora mi a mira ku su kondishon tabata pió ku esun di Gary, mi a keda kibrá.

Na un manera masha bondadoso, dòkternan a bisa mi ku ‘tur mi dos yunan tin e síndrome di LMBB’ * i ku desafortunadamente no tin kura pa e malesa genétiko akí. E tempu ei, hende no tabata sa mashá enkuanto e malesa hereditario i inkomun akí. E karakterístikanan típiko di e malesa akí ta entre otro problema ku bista ku por pone hende bira asta siegu, obesidat, èkstra dede na man i/òf na pia, retraso den desaroyo, falta di koordinashon, diabétis, artrítis i diferente problema ku nir. P’esei, no tabata fásil pa mi lanta mi yunan. Un investigashon resien a mustra ku 1 di kada 125.000 habitante di Gran Bretaña tin e malesa akí; el a mustra tambe ku kisas tin hopi hende mas ku e malesa akí pero ménos grave.

Djis despues ku mi a kasa, mi tabatin un kòmbersashon ku un Testigu di Yehova; mesora mi a sinti ku nan ta siña hende e bèrdat di Beibel. Pero mi kasá sí no tabata niun tiki interesá. I debí ku nos tabatin ku muda konstantemente pa motibu di su trabou, mi no por a asistí na e reunionnan. No opstante, mi a sigui lesa Beibel i hasi orashon na Yehova. Ora mi a lesa ku Yehova ‘lo ta un refugio pa e oprimínan i un refugio den tempu di angustia’ i ku lo e no ‘bandoná esnan ku ta busk’é,’ mi a haña berdadero konsuelo.—Sal. 9:9, 10.

Gary no por a mira bon. P’esei, for di tempu ku e tabatin seis aña di edat, nos a lag’é bai un internat situá na kosta sur di Inglatera p’e haña edukashon spesial. E tabata yama mi regularmente pa papia di e kosnan ku tabata preokup’é; durante e kòmbersashonnan ei mi por a yud’é komprondé prinsipionan básiko di Beibel. Algun aña despues ku Louise a nase, mi tambe a bira malu. Mi a kuminsá sufri di múltiple sklerósis i fibromialgia. Ku 16 aña di edat, Gary a sali for di internat. Pero su bista a sigui bai atras i, na aña 1975, nan a deklar’é ofisialmente siegu. I komo si fuera esei no tabata basta, na 1977, mi esposo a bandoná nos.

Despues ku Gary a bini kas bèk, nos a kuminsá asistí na e reunionnan di un dushi kongregashon, i na aña 1974 mi a batisá. Mi a keda masha kontentu ku un ansiano tabata yuda Gary trata ku e kambionan físiko ku e tabata eksperensiá durante su hubentut. Algun otro ruman tabata yuda mi ku mi trabounan di kas, i, ku tempu, servisio di asuntunan sosial a kontratá sinku di nan pa yuda nos ofisialmente ku nos keasernan di kas. Esei sí tabata un gran bendishon!

Gary a progresá bon den e bèrdat i a batisá na 1982. Debí ku e tabatin masha gana di traha pionero ousiliar, mi a disidí di kompañ’é den e trabou i nos a traha pionero ousiliar pa vários aña. Gary mi yu a keda masha kontentu ora ku algun aña despues nos superintendente di sirkuito  a puntr’é: “Gary, dikon bo no ta traha pionero regular?” Esei tabata nèt e animashon ku e tabatin mester, i na 1990 el a ser nombrá komo tal.

Gary a hasi dos transplante di hep; e promé biaha tabata na aña 1999 i esun di dos na 2008. Pero Louise su problemanan ku salú tabata muchu mas serio. El a nase kompletamente siegu, i ora mi a mira ku e tin un dede di pia èkstra, mi a komprondé ku e tambe tin síndrome di LMBB. Saminashon médiko a revelá ku vários di su órganonan ta afektá. Atraves di añanan, el a hasi vários operashon grandi, di kua sinku tabata operashon di nir. I e ta diabétiko, meskos ku Gary.

Nos ta konsiente ku durante kualke operashon por surgi komplikashon. P’esei, di antemano Louise ta papia ku e siruhanonan, anestesiólogonan, i tambe ku e personal atministrativo di hospital pa splika nan dikon e no ta aseptá sanger. Esei a pone ku e tin bon relashon ku tur esnan ku ta kuid’é i yud’é.

Nos ta hasi masha hopi aktividat teokrátiko na kas. Promé ku aparatonan elektróniko a bira disponibel, mi tabata pasa oranan largu ta lesa pa Gary i Louise. Awor ku nos tin vários CD, DVD i tambe otro grabashonnan riba www.mr1310.com na nos disposishon, nos kada un por sigui un programa semanal di estudio di Beibel na e momento kumbiniente; di e manera ei, nos por ta prepará pa duna komentario na reunion.

Tin ora Gary ta duna komentario ku el a siña for di kabes; pero ora e ta duna parti den e Skol di Ministerio Teokrátiko, e ta hasié na un manera natural, ku su mes palabra. Na 1995, el a bira sirbidó ministerial. E ta yuda ku zonido, i e ta semper kla pa yama tur hende bonbiní na Salòn di Reino.

Hopi biaha, rumannan ku sali den sirbishi ku Gary ta yud’é kore su ròlstul. E ta usa ròlstul pasobra e tin artrítis. Un ruman hòmber ta yud’é dirigí un estudio di Beibel ku un hòmber interesá. Ademas, Gary a animá un ruman muhé ku tabata inaktivo pa mas ku 25 aña. Awor, tur e dos personanan akí ta bini Salòn.

Na edat di nuebe aña, Louise a siña brei serka su wela, i ami i un di e personanan ku ta kuid’é a siñ’é bòrda. Debí ku e ta gusta e kosnan akí, el a kuminsá brei laken kolorido pa bebi i tambe pa rumannan di edat den kongregashon. Ademas, e ta traha karchi i pega steker riba nan. Esnan ku risibí su karchinan ta apresiá esakinan mashá. For di tiner, Louise a siña blind typen. Awor, ku un kòmpiuter spesial ku ta papia, e ta komuniká regularmente ku su amigunan via e-mail. Louise a batisá ku 17 aña di edat. Ora tin kampaña spesial di prediká, nos tur ta traha pionero ousiliar huntu. Meskos ku Gary, Louise tambe ta siña teksto di Beibel for di kabes pa e por papia tokante su fe den Dios su promesa di un mundu den kua “wowo di e siegunan lo mira” i kaminda “ningun habitante lo no bisa: ‘Mi ta malu.’”—Isa. 33:24; 35:5.

Nos ta masha gradisidu na Yehova pa e bèrdatnan presioso ku nos ta haña den su Palabra inspirá! Nos ta masha kontentu tambe ku e yudansa i amor ku nos ta risibí di nos kongregashon, pasobra sin nan yudansa nos lo no por a hasi tur loke ku nos ta hasiendo. I ta danki spesialmente na Yehova su yudansa ku nos bida a haña berdadero propósito.