1. Kiko nos tin ku hasi pa keda ku un fe firme?

HOPI hende ta bisa ku nan ta kere solamente loke nan por mira. Kon nos por yuda hende asina haña fe den Yehova, ya ku Beibel ta bisa ku “ningun hende no a mira Dios nunka.” (Huan 1:18) De echo, kon nos por hasi sigur ku nos mes ta keda ku un fe firme den “e Dios invisibel,” Yehova? (Kol. 1:15) Di promé, nos tin ku sa kua doktrina ta skonde e bèrdat tokante Yehova. Di dos, nos tin ku hasi bon uso di Beibel pa proba ku tal “rasonamentu inkorekto” ta stroba hende di haña “e konosementu di Dios.”—2 Kor. 10:4, 5.

2, 3. Menshoná dos siñansa ku ta stroba hende di haña sa e bèrdat tokante Dios.

² Un siñansa falsu ku ta stroba hende di siña e bèrdat tokante Dios ta e doktrina di evolushon. E teoria akí ta hopi plamá i ta kontradisí loke tin skirbí den Beibel. Ademas, e ta laga hende kere ku no tin ningun speransa pa un mihó futuro. Básikamente, e siñansa di evolushon ta bisa ku bida a kuminsá di su mes. Si esei ta bèrdat, nos lo no por splika e ora ei pakiko nos ta na mundu.

³ Di otro banda, tin hende den kristiandat ta siña e doktrina ku universo, inkluso nos planeta Tera i tur forma di bida riba dje, a aparesé apénas un 10.000 aña pasá. E siñansa akí ta konosí komo kreashonismo. E hendenan ku ta kere den dje kisas tin masha rèspèt pa Beibel, pero nan ta pretendé ku Dios a krea tur kos den 6 dia di 24 ora. Nan ta rechasá tur evidensia sientífiko ku ta kontradisí nan punto di bista. Esei ta pone ku ta difísil pa otro hende konfia e Palabra di Dios pasobra e siñansa ei ta laga Beibel parse irasonabel i inkorekto. Personanan ku ta promové e siñansa di kreashonismo ta laga nos kòrda riba algun hende di promé siglo ku tabatin “zelo pa sirbi Dios, ma no segun konosementu eksakto.” (Rom. 10:2) Kon nos por usa e Palabra di Dios pa demostrá ku e doktrinanan fuertemente ankrá di evolushon i kreashonismo ta falsu? * Nos  por hasi esei solamente si nos hasi nos bèst pa haña un konosementu eksakto di loke Beibel ta siña.

4. Nos fe mester ta basá riba kiko?

⁴ Beibel ta siña nos pa buska i atkerí konosementu. (Pro. 18:15) Yehova ke pa nos fe den dje ta basá riba evidensia i rasonamentu lógiko, no riba filosofia humano ni tradishon religioso. (Lesa Hebreonan 11:1.) Pa kultivá un fe firme den Dios, nos mester ta, na promé lugá, konvensí ku Yehova ta eksistí. (Lesa Hebreonan 11:6.) I nos no ta kere djis pa kere, sino pasobra nos a analisá e echonan i a usa nos “kapasidat di pensa.”—Rom. 12:1.

5. Menshoná un motibu pakiko nos por ta konvensí ku Dios ta eksistí.

⁵ Apòstel Pablo a duna un motibu pakiko nos por ta konvensí ku Yehova Dios ta eksistí maske nos no por mir’é. Pablo a skirbi: “Su kualidatnan invisibel, esta, su poder eterno i Divinidat, ta ser mirá bon kla for di kreashon di mundu padilanti, ya ku nan ta bisto den e kosnan trahá.” (Rom. 1:20) Kon bo por yuda un hende ku ta duda ku Dios ta eksistí mira ku e palabranan inspirá ku Pablo a skirbi ta bèrdat? Bo por usa algun di e siguiente ehèmpelnan di kreashon ku ta duna prueba di Dios su poder i sabiduria.

6, 7. Kon Yehova ta revelá su poder pa medio di dos kos ku ta protehá nos?

⁶ Nos ta mira prueba di Yehova su poder den dos kos ku ta protehá nos: tera su atmósfera i su kampo magnétiko. * Por ehèmpel, e kapa di atmósfera no t’ei solamente pa perkurá aire pa nos hala rosea. E ta protehá nos tambe. Kon asina? Wèl, den espasio tin baranka grandi ta bula rònt ku lo por kousa hopi daño na nos planeta. Pero ora nan drenta e atmósfera di tera, mayoria di nan ta kima i ta krea rayonan di lus bunita i briante den shelu di anochi, i nos ta bisa ku un strea a kai.

⁷ E kampo magnétiko di tera tambe ta protehá nos. E kapa protektor akí ta originá den e núkleo òf sentro di planeta Tera. E parti mas pafó di e núkleo ei ta konsistí prinsipalmente di heru di smèlt ku ta drei rònt, i e ta krea un kampo magnétiko poderoso ku ta rondoná Tera i ta ekstendé hopi leu den espasio. E kapa akí ta protehá nos kontra di e radiashon di solo i di e erupshon- i eksploshonnan ku ta tuma lugá den e parti mas pafó di e kapa di solo. Danki na tera su kampo magnétiko, e eksploshonnan akí di solo no ta kaba ku tur bida riba tera. Mas bien, e kampo magnétiko ta apsorbá e radiashon perhudisial akí òf mand’é bèk den espasio. I den naturalesa tin kosnan visibel ku ta duna nos prueba di e kampo magnétiko akí, entre otro, e fenómeno di lus kolorido den shelu serka di Polo Norte i Polo Sur. No tin duda: Yehova su poder ta inmenso!—Lesa Isaías 40:26.

8, 9. Kon e siklonan ku ta sostené bida ta revelá Yehova su sabiduria?

⁸ Nos por mira e sabiduria di Yehova den e siklonan natural riba tera ku ta sostené bida. Un ehèmpel: Imaginá bo un stat ku tin miónes di habitante i ku ta rondoná pa un muraya. E stat no tin un manera pa trese awa dushi aden ni pa deshasí di sushi. E stat ei den poko tempu lo yena ku asina tantu sushi ku lo ta imposibel pa keda biba aden. Den algun sentido, planeta Tera ta meskos ku e stat ei: E tin un kantidat limitá di awa dushi, i no ta fásil pa saka sushi hiba den espasio. Pero tòg e tera tin e kapasidat pa sostené míles di  miónes di kriatura, generashon tras di generashon. Kon esei ta posibel? Debí na e manera asombroso ku Tera ta resiklá òf bolbe usa tur e elementonan ku ta esensial pa bida.

⁹ Laga nos konsiderá e siklo di oksígeno. Míles di miónes di hende i bestia ta hala oksígeno aden i ta saka dióksido di karbon afó. Apesar ku esaki ta sosodé henter dia, tòg oksígeno no ta kaba i nos no ta stek pa motibu di demasiado “desperdisio” di dióksido di karbon den atmósfera. Kon bini? Nos ta haña e kontesta den e proseso maravioso yamá fotosíntesis: Mata ta apsorbá dióksido di karbon, awa, lus di solo i supstansianan nutritivo pa produsí karbohidrato i oksígeno. Ora nos ta hala oksígeno aden i saka dióksido di karbon afó, nos ta kompletá e siklo. Yehova literalmente ta usa mata ku el a krea pa ‘duna tur hende bida i rosea.’ (Echo. 17:25) Ki un sabiduria asombroso!

10, 11. Kon e barbulètè monarka i yeye ta revelá Yehova su sabiduria ekstraordinario?

¹⁰ Un otro kos ku ta revelá Yehova su sabiduria ekstraordinario ta e kantidat grandi di kriatura ku el a diseñá pa biba riba nos planeta remarkabel. Sientífikonan ta kalkulá ku tin entre 2 pa 100 mion sorto di bida riba tera. (Lesa Salmo 104:24.) Tuma nota di e sabiduria ku ta bisto den e diseño di djis algun di e kriaturanan akí.

¹¹ Por ehèmpel, e barbulètè monarka tin un selebro tamaño di un kabe’i feneta. Pero maske su selebro ta asina chikí, tòg e tin e kapasidat pa bula un distansia di kasi 3.000 kilometer for di Canada te na un sierto mondi na México, i e ta usa solo pa yud’é orientá. Pero kon bini e por hasi esei siendo ku solo no ta keda para un kaminda den shelu? Yehova a diseñá e selebro chikititu ei di tal manera ku e por reahustá su rumbo di akuerdo ku e movementu di solo. Un otro ehèmpel ta e wowo di yeye. Kada wowo ta konsistí di mas o ménos 30.000 lèns. Pero asina mes, e selebro chikititu di yeye por kapta e señalnan di tur e lènsnan ei i detektá e moveshon di mas chikitu ku ta tuma lugá rònt di dje.

12, 13. Kiko ta impreshoná bo di e manera ku Yehova a diseñá e sèlnan di nos kurpa?

¹² E manera ku Yehova a diseñá e sèlnan di tur loke tin bida ta asta mas impreshonante ainda. Por ehèmpel, bo kurpa ta konsistí di 100 bion (100.000.000.000.000) sèl. Den kada un di e sèlnan ei tin un parti chikí ku parse un kabuya, konosí komo DNA (ásido desoksiribonukléiko). E ta kontené mayoria di e informashon nesesario pa traha henter bo kurpa.

¹³ Kuantu informashon DNA ta kontené? Laga nos kompará ún gram di DNA ku un disko kompakto (CD). Un CD por kontené tur e informashon ku tin den un dikshonario. Esei ta un kos impreshonante si tuma na kuenta ku un CD ta djis un disko chikí plat di plèstik. Pero un gram di DNA ta kontené mes tantu informashon ku 1 bion (1.000.000.000.000) CD! Un otro manera pa splika  esaki ta ku ún telep di DNA seku por kontené e informashon nesesario pa traha 2,5 bion hende (2.500.000.000.000)!

14. Ora bo mira loke sientífikonan a deskubrí, kiko bo ta sinti pa Yehova?

¹⁴ Segun Rei David, ta komo si fuera Yehova a skirbi den un buki tur e informashon nesesario pa krea e kurpa humano. David a bisa: “Bo wowo a mira asta mi èmbrio, i den bo buki tur su partinan a ser skirbí, enkuanto e dianan ora ku nan a ser formá i ainda no tabatin ningun di nan.” (Sal. 139:16, NW) Nos por komprondé dikon David kier a alabá Yehova ora el a pensa riba e manera ku su propio kurpa a ser kreá. E kosnan ku sientífikonan a deskubrí e último añanan akí a oumentá e atmirashon ku nos ta sinti pa e manera asina asombroso ku Yehova a traha nos. E deskubrimentunan akí ta duna nos mas motibu ainda pa bai eens ku loke David a bisa tokante Yehova: “Mi ta alabá bo, pasobra mi ta trahá na un manera temerosamente maravioso; maravioso ta bo obranan, i mi alma sa esei masha bon.” (Sal. 139:14) Ta bisto ku kreashon ta duna prueba palpabel ku ta eksistí un Dios bibu. Kon por ta posibel ku hende no ta mira e pruebanan ei?

15, 16. (a) Kon nos publikashonnan ta yuda hende haña mas apresio pa e kreashon di Yehova? (b) Menshoná un parti di e foyeto Bida Ta Obra di un Kreador? ku a impreshoná bo.

¹⁵ Pa hopi aña kaba, e revista ¡Despertad! ta yudando miónes di hende siña loke kreashon ta revelá tokante e Dios bibu. Por ehèmpel, na aña 2006, e edishon di sèptèmber tabatin komo título “Ta Eksistí un Kreador?” E edishon ei tabata kompletamente dediká na habri wowo di hende siegá pa e doktrinanan di evolushon i kreashonismo. Un ruman muhé na Merka a skirbi tokante e edishon spesial ei: “E kampaña pa ofresé e edishon spesial akí a bai masha bon mes. Un señora a pidi 20 revista. E ta dosente di biologia i tabata ke pa kada un di su alumnonan haña nan mes revista.” Un ruman hòmber a skirbi: “Mi ta aktivo den sirbishi di vèlt for di final di dékada di 1940 i mi tin kasi 75 aña. Pero nunka promé mi no a gosa asina tantu di sirbishi manera e luna akí ku nos a ofresé e edishon spesial di ¡Despertad!”

¹⁶ For di aña 2008, mayoria di edishon di ¡Despertad! tin un artíkulo di e seri titulá “Kasualidat òf Diseño?” E artíkulonan kòrtiku akí ta destaká kon asombroso kreashon ta i ta mustra maneranan ku hende a purba di kopia e kosnan inkreibel ku nos Kreador a diseñá. Na 2010, nos a haña tambe e foyeto Bida Ta Obra di un Kreador? E bunita diagram- i plachinan den e foyeto ei ta diseñá pa yuda nos haña mas apresio pa Yehova su kreashon. E preguntanan na final di kada sekshon ta pa yuda e lektor pensa riba e informashon ku el a kaba di lesa. Bo tabatin oportunidat di usa e foyeto akí den e trabou di prediká di kas pa kas, den kaya òf informalmente?

17, 18. (a) Ki responsabilidat mayornan tin? (b) Kon abo a usa e foyetonan tokante kreashon den bo adorashon komo famia?

¹⁷ Mayornan, boso a konsiderá e foyeto kolorido akí ku boso yunan komo parti di boso adorashon komo famia? Esei lo por yuda nan haña mas fe den Yehova i mas apresio p’e. Tal bes bo tin yu tiner ku ta bai skol sekundario; i hopi biaha hende ku ta siña e doktrina falsu di evolushon ta gusta pone preshon riba nan. Sientífikonan, maestronan di skol, dokumentalnan tokante naturalesa i asta mundu di entretenimentu—via programa di televishon i pelíkula—ke laga hóbennan kere ku evolushon ta un echo komprobá, miéntras ku esei no ta e kaso. Bo por yuda bo yunan tiner defendé e bèrdat usando e foyeto Sinku Pregunta Importante Tokante Orígen di Bida, ku tambe a keda publiká na 2010. E foyeto akí, meskos ku esun Bida Ta Obra di un Kreador?, ta yuda hóbennan desaroyá  nan “kapasidat di pensa.” (Rom. 12:1) E foyeto Orígen di Bida no ta disponibel na papiamentu, pero sí na hulandes òf spañó. Lo ta bon pa bo hasi bo bèst pa familiarisá bo mes ku nan, ya asina bo por yuda bo yunan kombatí e siñansa falsu di evolushon. E dos foyetonan akí ta siña nan kon pa determiná si loke nan ta siña na skol ta basá riba lógika òf nò. *

¹⁸ Tin biaha ta sali den notisia informenan sensashonal ku ta bisa ku sientífikonan a deskubrí fosil ku supuestamente ta proba ku evolushon ta un echo real. Òf nos ta tende di sierto eksperimentonan sientífiko ku a logra krea bida den laboratorio. E foyeto Orígen di Bida ta skirbí di tal manera ku e por yuda muchanan di skol disidí pa nan mes si e informenan akí ta bèrdat, esta, si nan realmente ta proba ku hende a evolushoná di kriatura inferior. Mayornan, usa e foyetonan akí pa yuda boso yunan haña mas konfiansa ora nan ta splika dikon nan ta kere den un Kreador.—Lesa 1 Pedro 3:15.

19. Ki privilegio nos tur tin?

¹⁹ Den e publikashonnan ku nos ta haña for di e organisashon di Yehova tin informashon bon dokumentá ku ta siña nos hopi kos tokante Su bunita kualidatnan ku ta bisto den e mundu rònt di nos. Tur e evidensianan akí ta motivá nos pa alabá Yehova di kurason. (Sal. 19:1, 2) Nos tin e gran privilegio di duna Yehova, e Kreador di tur kos, e onor i gloria ku tantu e ta meresé!—1 Tim. 1:17.