1, 2. Dikon Yehova ta kompará su mes ku un wardadó di karné?

YEHOVA ta kompará su mes ku un wardadó di karné. (Eze. 34:11-14) Esei ta yuda nos komprondé ki sorto di persona Yehova ta. Un wardadó amoroso ta sinti su mes responsabel pa e bida i bienestar di e tou di karné ku ta bou di su kuido. Pues, e ta hiba nan kaminda tin yerba i awa (Sal. 23:1, 2); e ta vigilá nan di dia i anochi (Luk. 2:8); e ta protehá nan kontra bestia salbahe (1 Sam. 17:34, 35); e ta karga e lamchinan resien nasí (Isa. 40:11); e ta buska e karnénan pèrdí i ta sòru bon pa esnan heridá.—Eze. 34:16.

² Den tempu antiguo, gran parti di e pueblo di Dios tabata wardadó di karné i kunukero. Pues, nan a komprondé mesora dikon Yehova a kompará su mes ku un wardadó amoroso. Nan tabata sa ku karné mester di kuido i atenshon pa nan sobrebibí i keda salú. Den un sentido spiritual, esei ta e kaso ku hende tambe. (Mar. 6:34) Sin un bon kuido i liderato spiritual, es desir, sin Yehova su guia i atenshon, hende ta sufri. Nan no sa kiko ta bon ni kiko ta malu, i nan ta indefenso. Anto meskos ku “karné ku no tin wardadó,” nan ta keda tur plamá. (1 Rei. 22:17) Pero Yehova sí ta perkurá pa su pueblo haña tur loke e tin mester.

3. Kiko nos lo bai trata den e artíkulo akí?

³ Nos tambe ta komprondé dikon Yehova ta deskribí su mes komo un wardadó di karné. Te awe e ta perkurá bon pa su pueblo. Laga nos wak kon e ta guia su karnénan i satisfasé nan nesesidat. Despues nos lo analisá kiko e karnénan mester hasi pa benefisiá di Yehova su guia i kuido.

4. Kon Hesus ta perkurá pa e karnénan di Yehova?

⁴ Yehova a apuntá Hesus komo Kabes di e kongregashon kristian. (Efe. 1:22, 23) Hesus, komo “e bon wardadó,” ta meskos ku su Tata i ta desplegá e mesun interes, propósito i kualidatnan ku su Tata. Hesus asta a “entregá su alma pa e karnénan.” (Huan 10:11, 15) Ki un regalo maravioso Kristu su sakrifisio di reskate ta pa humanidat! (Mat. 20:28) Figura bo! E propósito di Yehova ta “pa tur ku pone fe den [Hesus] no bai pèrdí, ma haña bida eterno”!—Huan 3:16.

5, 6. (a) Ken Hesus a nombra pa kuida su karnénan, i kiko e karnénan mester hasi pa nan benefisiá di esaki? (b) Kiko mester ta e motibu prinsipal pakiko nos ke obedesé e ansianonan?

⁵ Kon e karnénan ta demostrá ku Hesukristu ta nan Wardador? Hesus a bisa: “Mi karnénan ta skucha mi stèm, i mi konosé nan, i nan ta sigui mi.” (Huan 10:27) E karnénan ta mustra ku nan ta skucha e stèm di e Bon Wardador ora nan ta sigui su guia den tur kos. Esaki ta enserá ku nan ta obedesé e otro wardadónan ku Hesus a nombra pa yud’é pastoriá e tou. Hesus a indiká ku su apòstel- i disipelnan mester a sigui ku e trabou ku el a kuminsá kuné. Nan mester a siña ‘su lamchinan’ i kuida nan. (Mat. 28:20; lesa Huan 21:15-17.) Segun ku e bon notisia a sigui plama, mas i mas hende a bira disipel di Kristu. I Hesus a sòru pa por tin kristiannan maduro pa pastoriá, òf kuida, e kongregashonnan.—Efe. 4:11, 12.

⁶ Mas despues, ora apòstel Pablo tabata papia ku e ansianonan di e kongregashon di Efeso, el a bisa nan ku ta spiritu santu a nombra nan komo superintendente pa nan “pastoriá e kongregashon di Dios.” (Echo. 20:28) Esei ta konta tambe pa e superintendentenan kristian djawe, ya ku nan ta ser nombrá a base di rekisitonan ku ta pará den e Palabra di Dios ku a ser inspirá pa spiritu santu. Ora nos ta obedesé e ansianonan, nos ta demostrá anto nos rèspèt pa Yehova ku Hesus, e dos Wardadornan di mas grandi. (Luk. 10:16) Sin duda, esaki ta e motibu prinsipal pakiko nos ke ta sumiso na e ansianonan. Pero tin mas motibu pakiko ta sabí pa nos sigui nan guia i instrukshon.

7. Kon e ansianonan ta yuda bo mantené un bon relashon ku Yehova?

⁷ Ora ansianonan ta duna animashon, konseho i guia na e rumannan, nan ta sòru hasié semper a base di e Skritura mes òf a base di prinsipionan bíbliko. Ansianonan no ta duna e guia ei pasobra nan ke dikta kon e rumannan mester hiba nan bida. (2 Kor. 1:24) Mas bien, nan ke yuda e rumannan tuma bon desishon i promové union i pas den e kongregashon. (1 Kor. 14:33, 40) E ansianonan ‘ta vigilá nos alma’ den e sentido ku nan ke yuda delaster un persona den e kongregashon mantené un bon relashon ku Yehova. Pues, nan ta kla pa ofresé yudansa si nan ripará ku un ruman ta a punto di “dal un paso robes.” (Gal. 6:1, 2; Hudas 22) Nos tin bon motibu anto pa “obedesé esnan ku ta dirigí” e kongregashon.—Lesa Hebreonan 13:17.

8. Kon ansianonan ta protehá e tou di Dios?

⁸ Apòstel Pablo tambe tabata un wardadó amoroso, i el a spièrta su rumannan na Kolósas: “Tene kuidou pa ningun hende no kue boso den nan gara pa medio di filosofia i engaño bano ku ta basá riba tradishon di hende, segun e kosnan básiko di mundu i no segun e siñansanan di Kristu.” (Kol. 2:8) E spièrtamentu akí ta yuda nos mira un otro motibu mas pakiko ta importante pa skucha e konseho bíbliko di e ansianonan. Nan ta protehá e  tou dor di spièrta nan rumannan pa tene kuidou ku personanan ku lo ke purba di desviá nan for di Yehova. Apòstel Pedro a spièrta ku “profeta falsu” i “maestro falsu” lo purba di “sedusí almanan instabil,” esta, kristiannan débil, pa pone nan hasi malu. (2 Ped. 2:1, 14) Ansianonan djawe tambe mester duna e tipo di spièrtamentunan ei ora ta nesesario. Siendo ku nan ta hòmbernan kristian maduro, nan tin eksperensia di bida. Es mas, nan a ser nombrá komo ansiano pasobra nan a demostrá ku nan ta komprondé e Skritura bon i ta kualifiká pa duna siñansa ku ta sano. (1 Tim. 3:2; Tito 1:9) Nan madures, aktitut balansá i sabiduria basá riba Beibel ta kapasitá nan pa duna e rumannan guia.

9. Kon Hesus ta dirigí i alimentá e kongregashon kristian awe?

⁹ Yehova ta usa su organisashon pa perkurá un abundansia di alimento spiritual pa henter e hermandat mundial. Nos ta haña hopi konseho bíbliko via di nos publikashonnan. Ademas, tin biaha e organisashon ta duna guia direktamente na e ansianonan di kongregashon, sea via karta òf via instrukshon ku e superintendentenan biahero ta duna nan. Asina e karnénan ta risibí instrukshon bon kla.

10. Ki responsabilidat wardadónan amoroso tin ora ku un ruman dual bai for di e tou?

¹⁰ Den un sentido spiritual, ansianonan  tin e responsabilidat di protehá i kuida e karnénan. Nan ta preokupá spesialmente pa e miembronan di kongregashon kende nan fe a bira suak òf ku a kometé fayonan grave. (Lesa Santiago 5:14, 15.) Algun di e rumannan akí kisas a dual bai for di e tou i a stòp di partisipá den aktividatnan kristian. Den un kaso asina, kiko un wardadó amoroso lo hasi pa yuda? Wèl, lo e hasi tur loke ta na su alkanse pa buska kada karné pèrdí i animá nan pa bolbe na e tou, esta, na e kongregashon. Hesus a bisa: “Mi Tata ku ta den shelu no ta deseá pa ni ún di e chikitunan akí bai pèrdí.”—Mat. 18:12-14.

11. Dikon algun ruman tin difikultat pa sigui guia di e ansianonan?

¹¹ Yehova ku Hesus ta Wardadornan perfekto. Ma e wardadónan humano ku nan ta usa pa kuida e kongregashon sí no ta perfekto, i esaki ta pone ku algun ruman tin difikultat pa sigui guia di e ansianonan. Kisas nan ta pensa: ‘E ansianonan ta hende imperfekto meskos ku nos. Dikon mi tin ku skucha nan konseho?’ Ta bèrdat ku e ansianonan ta imperfekto. Pero nos no mester enfoká riba nan imperfekshon- i fayonan.

12, 13. (a) Den pasado, ki fayo sirbidónan di Yehova ku tabatin puesto di responsabilidat a kometé? (b) Dikon Yehova a laga e fayonan di hòmbernan ku tabatin responsabilidat keda registrá den su Palabra?

¹² E Skritura ta papia frankamente di e fayonan di hende ku Yehova a usa pa dirigí su pueblo den pasado. Por ehèmpel, Dios a ungi David komo rei i lider di Israel. Ma despues el a kai den tentashon i a kometé adulterio i asesinato. (2 Sam. 12:7-9) Pensa tambe riba apòstel Pedro. Aunke el a ser konfiá ku gran responsabilidat den e kongregashon kristian di promé siglo, e tambe a kometé fayo grave. (Mat. 16:18, 19; Huan 13:38; 18:27; Gal. 2:11-14) Ku eksepshon di Hesus, ningun hende ku a biba despues di Adam ku Eva no tabata perfekto.

¹³ Dikon Yehova a laga e eskritornan di Beibel skirbi tokante e fayonan ku e hòmbernan ku el a enkargá ku responsabilidat a kometé? Un di e motibunan ta pa mustra ku e por usa hende imperfekto pa dirigí su pueblo. De echo, semper el a hasi esei. Pues, nos no mester usa imperfekshon di e rumannan ku ta dirigí nos awe komo un èksküs pa murmurá, òf keha, kontra nan òf pa ignorá nan outoridat. Yehova ta ferwagt di nos ku nos ta respetá e rumannan ei i obedesé nan.—Lesa Éksodo 16:2, 8.

14, 15. Kiko nos por siña for di e manera ku Yehova a duna instrukshon na su pueblo den pasado?

¹⁴ Ta sumamente importante pa nos obedesé e ansianonan awe. Dikon? Wèl, pensa un ratu riba e manera ku Yehova a komuniká ku su pueblo den pasado durante tempunan krítiko. Por ehèmpel, ora e pueblo di Israel a bandoná Egipto, Dios a usa Moises ku Aron pa duna e pueblo instrukshon importante. Ademas, pa e israelitanan por a sobrebibí e di dies plaga, nan mester a obedesé sierto instrukshon: Nan mester a kome un sena spesial, mata un karné i spat un poko di su sanger riba e kozeinnan na banda i ariba di e porta di nan kas. Ta un stèm a papia ku nan for di shelu? Nò, nan mester a skucha e ansianonan di Israel ku, na nan turno, a risibí instrukshonnan spesífiko for di Moises. (Éks. 12:1-7, 21-23, 29) Den e kaso ei, Moises i e ansianonan tabata esnan ku a transmití e instrukshonnan di Yehova pa e pueblo. Awe, Yehova ta usa e ansianonan kristian pa kumpli ku e mesun funshon importante ei.

¹⁵ Sin duda, bo por pensa riba vários  otro okashon den Beibel kaminda Yehova a usa hende òf angel pa duna instrukshon na su pueblo. Hopi biaha e instrukshonnan akí a skapa nan bida. Den tur e kasonan ei, Yehova a disidí di duna otro hende e outoridat pa papia den su nòmber i nan, na nan turno, a bisa su pueblo kiko nan mester a hasi pa nan por a sobrebibí e tempu peligroso ei. Nos tin tur motibu pa ferwagt ku Yehova lo hasi algu similar pa su pueblo na Armagedon. Klaru ku e ansianonan ku awe tin e responsabilidat di representá Yehova òf su organisashon mester tene masha kuidou pa no abusá di e outoridat ku nan a risibí.

16. Kua ta e “palabra” ku nos tin ku presta atenshon na dje?

¹⁶ E pueblo di Yehova ta “ún tou bou di ún wardadó,” Hesukristu. (Huan 10:16) Hesus a indiká ku lo e ta ku su disipelnan “tur e dianan, te na konklushon di e era akí.” (Mat. 28:20) Komo Rei selestial, e tin kontrol riba tur suseso ku lo hiba na destrukshon di e mundu di Satanas. Kon nos por keda uní i sano i salvo den e organisashon di Dios? Beibel ta bisa: “Bo orea lo tende un palabra tras di bo ta bisa: ‘Esaki ta e kaminda, kana den dje.’” E “palabra” akí ta enserá loke Dios su spiritu santu ta bisa via Beibel i loke Yehova ku Hesus ta bisa via e wardadónan ku nan a nombra.—Lesa Isaías 30:21; Revelashon 3:22.

17, 18. (a) Ki peliger ta menasá e tou, pero di kiko nos por ta sigur? (b) Kiko nos lo bai analisá den e siguiente artíkulo?

¹⁷ Beibel ta bisa ku Satanas “ta kana rònt manera un leon ku ta grita, buskando ken e por habraká.” (1 Ped. 5:8) Meskos ku un bestia salbahe i hambrá, asina e ta slùip e tou, wardando un bon chèns p’e ataká e karnénan ku ta suak òf ku a dual bai for di e tou. Esaki ta duna nos mas motibu ainda pa keda hopi serka di e kongregashon i di Yehova, “e wardadó i superintendente di [nos] alma.” (1 Ped. 2:25) Revelashon 7:17 ta papia tokante e hendenan ku lo sobrebibí e tribulashon grandi. E ta bisa ku e Lamchi, Hesus, “lo ta nan wardadó, i lo e guia nan na fuentenan di awa di bida. I Dios lo seka tur lágrima for di nan wowo.” Ki un promesa maravioso!

¹⁸ Despues di a konsiderá e papel sumamente importante ku e ansianonan kristian tin komo wardadó di e kongregashon, kada ansiano ta hasi bon di puntra su mes: Kon mi por hasi sigur ku mi ta trata e karnénan di Hesus manera mester ta? Den e siguiente artíkulo nos lo analisá e kontesta riba e pregunta ei.