1 Siña Konfia den Beibel

“Tur Skritura ta inspirá pa Dios i ta útil pa siñansa, pa reprendementu, pa korekshon.”​—2 Timoteo 3:16.

KIKO TA E OPSTÁKULO? Hopi hende ta pensa ku Beibel ta djis un buki di sabiduria humano. Algun hende ta kere ku e relatonan históriko den Beibel no ta eksakto. Otronan ta bisa ku Beibel su konsehonan no ta práktiko pa nos tempu.

KON BO POR VENSE E OPSTÁKULO? Hopi bes, hende ku no tin konfiansa den Beibel òf ku ta pensa ku e no ta práktiko no a analisá e asuntu pa nan mes. Nan ta djis ripití loke otro hende ta bisa. Sinembargo, Beibel ta duna e spièrtamentu akí: “E hende simpel ta kere tur kos, ma e hòmber prudente ta wak bon unda e ta bai.”​—Proverbionan 14:15.

En bes di kere siegamente loke otro hende ta bisa, pakiko no sigui e ehèmpel di e kristiannan di promé siglo ku tabata biba na Berea, ku ta situá den e parti nort di Gresia aktual? Nan no a djis kere loke otro hende a bisa nan. Mas bien, nan tabata konosí komo personanan ku “tabata skudriñá e Skrituranan tur dia, pa mira si e kosnan akí tabata asina.” (Echonan 17:11) Laga nos konsiderá brevemente dos motibu pakiko bo por tin konfiansa ku Beibel ta e Palabra inspirá di Dios.

Relatonan históriko den Beibel ta eksakto. Atraves di añanan, hende a ekspresá nan deskonfiansa den Beibel su eksaktitut pa loke ta nòmber di hende i lugánan ku e ta menshoná. Pero, bes tras bes hende a haña evidensia ku ta proba ku no tin base pa e deskonfiansa akí i ku Beibel su relatonan ta konfiabel.

Por ehèmpel, tabatin un tempu ku komentaristanan di Beibel tabata duda si Sargon, rei di Asiria, menshoná na Isaias 20:1, realmente a yega di eksistí. Sinembargo, den dékada di 1840, arkeólogonan a deskubrí e palasio di e rei akí. Awor, Sargon ta un di e reinan di Asiria mas konosí.

Hende a lanta duda tambe tokante e eksistensia di e gobernadó romano, Ponsio Pilato, kende a duna òrdu pa mata Hesus. (Mateo 27:​1, 22-24) Pero na aña 1961, den serkania di e stat Cesarea na Israel, nan a deskubrí un piedra ku a menshoná Pilato su nòmber i su posishon.

Relashoná ku e eksaktitut di Beibel su relatonan históriko, e revista U.S.News & World Report di 25 di òktober 1999 a bisa: “Na manera ekstraordinario, arkeologia di nos tempu a konfirmá ku relatonan históriko di e Tèstamènt Bieu i Nobo ta eksakto. El a apoyá esei ku pasashinan importante di e relatonan tokante e patriarkanan di Israel, e éksodo di e israelitanan for di Egipto, e  monarkia di David i bida den e tempu di Hesus.” Maske ku fe den Beibel no ta basá riba deskubrimentunan arkeológiko, lo bo ferwagt ku relatonan históriko di un buki ku ta inspirá pa Dios ta eksakto.

Sabiduria práktiko di Beibel ta benefisiá hende di tur background. Hopi tempu promé ku hende a deskubrí mikro-organismo i nan papel den transmití enfermedat, Beibel a rekomendá reglanan di higiena ku ta práktiko i esensial te den nos tempu. (Levítiko 11:​32-40; Deuteronomio 23:​12, 13) Miembronan di famia ku ta apliká e konseho bíbliko relashoná ku e manera pa trata otro ta mas felis. (Efesionan 5:​28–6:4) Un hende ku ta biba segun prinsipionan bíbliko por bira un trahadó mas diligente òf un doño di trabou mas rasonabel. (Efesionan 4:28; 6:​5-9) Ademas, hende ku ta apliká prinsipionan di Beibel ta mehorá nan salú den sentido emoshonal. (Proverbionan 14:30; Efesionan 4:​31, 32; Kolosensenan 3:​8-10) E konsehonan práktiko ei ta loke nos por spera di nos Kreador.

KIKO TA E REKOMPENSA? E sabiduria ku nos ta haña den Beibel por hasi asta un hende sin eksperensia bira sabí. (Salmo 19:7) Ademas, unabes nos haña konfiansa den Beibel, e por yuda nos mas ku kualke otro buki pa dal e siguiente paso pa por tin un fe mas fuerte.

Pa mas informashon, wak e buki Kiko Beibel Ta Siña Realmente? kapítulo 2 ku tin e tema “Beibel​—Un Buki for di Dios.” *

[Nota]